កម្ពុជាបំពាក់ មេដាយមុនីសារាភ័ណ្ឌ ជូនសាស្ត្រាចារ្យជប៉ុន ស្រាវជ្រាវជំងឺថ្លើម

រាជរដ្ឋាភិបាលកម្ពុជាបានបំពាក់គ្រឿងឥស្សរិយយស មេដាយមុនីសារាភ័ណ្ឌ ជូនលោកស្រីសាស្ត្រាចារ្យ ជុនកូ តាណាកា (Junko Tanaka) សាកលវិទ្យាធិការរង នៃសាកលវិទ្យាល័យហ៊ីរ៉ូស៊ីម៉ា ប្រទេសជប៉ុន ដើម្បីជាការតបស្នងចំពោះលោកស្រីដែលបានផ្តួចផ្តើមការងារស្រាវជ្រាវអំពីជំងឺថ្លើមនៅក្នុងប្រទេសកម្ពុជាចាប់តាំងពីឆ្នាំ២០០៩។

ពិធីបំពាក់ គ្រឿងឥស្សរិយយសនេះ ធ្វើឡើងនៅព្រឹកថ្ងៃទី៥ មេសា នៅទីតាំងទី២ នៃសាកលវិទ្យាល័យវិទ្យាសាស្ត្រសុខាភិបាល ក្រោមអធិបតីភាព លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល។

លោកសាស្ត្រាចារ្យ សាផុន វឌ្ឍនៈ សាកលវិទ្យាធិការសាកលវិទ្យាល័យវិទ្យាសាស្ត្រសុខាភិបាល មានប្រសាសន៍ថា លោកស្រីសាស្ត្រាចារ្យ ជុនកូ តាណាកា បានផ្តួចផ្តើមការងារស្រាវជ្រាវអំពីជំងឺថ្លើមចាប់តាំងពីឆ្នាំ២០០៩ រហូតមកដល់បច្ចុប្បន្ន ហើយលោកស្រីបានផ្សព្វផ្សាយលទ្ធផលស្រាវជ្រាវអំពីជំងឺថ្លើមនៅប្រទេសកម្ពុជាមកដល់ពេលនេះបានចំនួន ១២អត្ថបទវិទ្យាសាស្ត្រក្នុងនិន្នានុវត្តន៍វិទ្យាសាស្ត្រអន្តរជាតិ ដែលលទ្ធផលស្រាវជ្រាវទាំងនេះបានចូលរួមចំណែកយ៉ាងសំខាន់ជំរុញគំនិតស្រឡាញ់ការងារស្រាវជ្រាវរបស់មន្ត្រីបុគ្គលិក និងនិស្សិតសាកលវិទ្យាល័យវិទ្យាសាស្ត្រសុខាភិបាល។

លោកសាស្ត្រាចារ្យបានបន្តថា ជាច្រើនឆ្នាំកន្លងមកនេះ លោកស្រីបានដើរតួនាទីយ៉ាងសំខាន់ក្នុងការផ្តួចផ្តើមនៃកិច្ចសហប្រតិបត្តិការរវាងសាកលវិទ្យាល័យវិទ្យាសាស្ត្រសុខាភិបាល និងសាកលវិទ្យាល័យហ៊ីរ៉ូស៊ីម៉ា ប្រទេសជប៉ុនដើម្បីជំរុញការកសាងធនធានមនុស្សក្នុងវិស័យសុខភាពសាធារណៈ។ ក្នុងនោះលោកស្រីបានជួយរកអាហារូបករណ៍ និងជួយបណ្តុះបណ្តាលនិស្សិតកម្ពុជាថ្នាក់បណ្ឌិតវិទ្យាសាស្ត្រចំនួន ៣នាក់ និងថ្នាក់បរិញ្ញាបត្រជាន់ខ្ពស់ចំនួន ១នាក់ សិក្សានៅសាកលវិទ្យាល័យហ៊ីរ៉ូស៊ីម៉ា និងគ្រោងបន្តជួយផ្តល់អាហារូបករណ៍ជូននិស្សិតកម្ពុជាពី ២ ទៅ៣នាក់ទៀត ក្នុង១ឆ្នាំសម្រាប់រយៈពេល ៣ឆ្នាំខាងមុខ។

លោកសាស្ត្រាចារ្យ បានសំដែងការអបអរសាទចំពោះ លោកស្រី ជុនកូ តាណាកា ដែលទទួលបានការទទួលស្គាល់ស្នាដៃពីរាជរដ្ឋាភិបាលកម្ពុជា បានសម្រេចផ្តល់ជូនលោកស្រីនូវគ្រឿងឥស្សរិយយសមេដាយមុនីសារាភ័ណ្ឌ។ លោកសាស្ត្រាចារ្យសង្ឃឹមថា លោកស្រីនឹងបន្តជួយគាំទ្រសាកលវិទ្យាល័យវិទ្យាសាស្ត្រសុខាភិបាលជាបន្តទៀត។

លោក សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល កោតសរសើរដល់លោកស្រី ជុនកូ តាណាកា ដែលបានផ្តួចផ្តើមការងារស្រាវជ្រាវអំពីជំងឺថ្លើមនៅប្រទេសកម្ពុជាច្រើនឆ្នាំកន្លងមកនេះ និងបានផ្សព្វផ្សាយលទ្ធផលស្រាវជ្រាវអំពីជំងឺថ្លើមនៅប្រទេសកម្ពុជាបានជាច្រើនអត្ថបទក្នុងនិន្នានុវត្តវិទ្យាសាស្ត្រអន្តរជាតិដែលលទ្ធផលទាំងនេះបានក្លាយជាធាតុចូលយ៉ាងសំខាន់សម្រាប់ក្រសួងសុខាភិបាល និងរាជរដ្ឋាភិបាលកម្ពុជា អន្តរាគមន៍សុខភាពសាធារណៈឱ្យកាន់តែមានប្រសិទ្ធភាព និងចូលរួមលើកកម្ពស់សុខមាលភាពប្រជាជនកម្ពុជា។

លោករដ្ឋមន្ត្រី មានប្រសាសន៍បន្តថា ស្នាដៃស្រាវជ្រាវ និងបណ្តុះបណ្តាលរបស់លោកស្រី គឺជាគំរូស្រាប់ដែលបង្ហាញឱ្យឃើញនូវការផ្សារភ្ជាប់គ្នាដោយមិនអាចខ្វះបានរវាងការបណ្តុះបណ្តាល និងការស្រាវជ្រាវក្នុងវិស័យសុខាភិបាល។ លោករដ្ឋមន្ត្រីបានបញ្ជាក់ថា ដើម្បីជាសក្ខីភាពនៃការដឹងគុណចំពោះកិច្ចខិតខំប្រឹងប្រែងរបស់លោកស្រី រាជរដ្ឋាភិបាលកម្ពុជាបានសម្រេចផ្តល់នូវគ្រឿងឥស្សរយយសមេដាយមុនីសារាភ័ណ្ឌជូនលោកស្រីសាស្ត្រាចារ្យ៕

អត្ថបទ៖ សំអឿន