ព័ត៌មានអន្ដរជាតិ

អាជ្ញាធរមីយ៉ាន់ម៉ាចាប់ខ្លួនគ្រូហោរាម្នាក់ដែលទស្សន៍ទាយពីការរញ្ជួយដីមិនពិតនៅលើ TikTok

បានផុស

១ ខែ មុន

នៅ

ថ្ងៃសៅរ៍ ២៦ មេសា ២០២៥

ដោយ

អាជ្ញាធរមីយ៉ាន់ម៉ា បានចាប់ខ្លួនគ្រូហោរាសាស្រ្តម្នាក់ពីបទបង្កការភ័យស្លន់ស្លោដល់ប្រជាជនដោយសារការទស្សន៍ទាយពីការរញ្ជួយដីថ្មីនៅក្នុងវីដេអូ TikTok ដ៏ល្បីមួយ។ នេះបើយោងតាមការចេញផ្សាយរបស់សារព័ត៌មានBBC នៅថ្ងៃទី២៦ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក John Moe The បានបង្ហោះការព្យាកររបស់គាត់នៅថ្ងៃទី៩ខែមេសា ត្រឹមតែពីរសប្តាហ៍បន្ទាប់ពីការរញ្ជួយដីកម្រិត ៧.៧ រ៉ិចទ័របានសម្លាប់មនុស្ស៥ ៣៥២នាក់ស្លាប់ របួស៧ ១០៨នាក់ និងបាត់ខ្លួនចំនួន ៥៣៨នាក់ ព្រមទាំងបានបំផ្លាញប្រាសាទដែលមានអាយុកាលរាប់សតវត្សនៅក្នុងប្រទេសនេះ។

ក្រសួងព័ត៌មានមីយ៉ាន់ម៉ា បាននិយាយថា លោក John Moe The ត្រូវបានចាប់ខ្លួនកាលពីថ្ងៃអង្គារពីបទនិយាយពាក្យមិនពិត ជាមួយនឹងចេតនាធ្វើឱ្យមានការភ្ញាក់ផ្អើលជាសាធារណៈ។ គាត់ត្រូវបានចាប់ខ្លួនអំឡុងពេលប៉ូលិសវាយឆ្មក់លើផ្ទះរបស់គាត់ក្នុងទីក្រុង Sagaing ភាគកណ្តាលប្រទេសមីយ៉ាន់ម៉ា។

នៅក្នុងវីដេអូ Tik Tok នោះលោក John Moe The បានព្រមានថា ការរញ្ជួយដីថ្មីនឹង វាយប្រហារគ្រប់ទីក្រុងទាំងអស់ក្នុងប្រទេសមីយ៉ាន់ម៉ា នៅថ្ងៃទី២១ ខែមេសា ខណៈអ្នកជំនាញនិយាយថា ការរញ្ជួយដីគឺមិនអាចទាយទុកជាមុនបាន ដោយសារតែភាពស្មុគស្មាញនៃកត្តាដែលពាក់ព័ន្ធនឹងគ្រោះមហន្តរាយបែបនេះ។

គណនី TikTok របស់លោក John Moe The ដែលពេលនេះលែងដំណើរការហើយ មានអ្នកតាមដានច្រើនជាង ៣ម៉ឺននាក់ អះអាងថានឹងធ្វើការទស្សន៍ទាយដោយផ្អែកលើហោរាសាស្រ្ត និងបាតដៃ។ នៅក្នុងវីដេអូរបស់គាត់ដែលមានអ្នកចូលមើលច្រើនជាង ៣លានដង លោក John Moe The បានជំរុញមនុស្សឱ្យយករបស់សំខាន់ៗទៅជាមួយ ហើយរត់ចេញពីអគារក្នុងអំឡុងពេលរញ្ជួយ។

អ្នកស្រុកនៅទីក្រុងYangon ម្នាក់បានប្រាប់ AFP ថាអ្នកជិតខាងជាច្រើនរបស់គាត់ជឿជាក់លើការទស្សន៍ទាយនេះ ដោយពួកគេមិនស្នាក់នៅក្នុងផ្ទះរបស់ខ្លួន ហើយបានបោះជុំរុំនៅខាងក្រៅនៅថ្ងៃដែលលោក John Moe The បាននិយាយថា ការរញ្ជួយដីនឹងកើតឡើង។

គួរបញ្ជាក់ថា តំបន់នៃទីក្រុង Mandalay និង Sagaing បានរងការវាយប្រហារយ៉ាងខ្លាំងដោយការរញ្ជួយដីកាលពីថ្ងៃទី២៨ខែមីនា ដែលបានជំរុញឱ្យមានសំណើដ៏កម្រពីរបបសឹកមីយ៉ាន់ម៉ាសម្រាប់ជំនួយបរទេស។ មកដល់ពេលនេះមនុស្សប្រមាណ ៤ ម៉ឺននាក់កំពុងស្នាក់នៅក្នុងតង់បណ្ដោះអាសន្ន ខ្វះទឹកស្អាតដែលបង្កើននិភ័យឆ្លងជំងឺផ្សេងៗ៕