លើកនេះ រុស្ស៊ី ដាក់លក្ខខណ្ឌស្រួលមួយទៅអ៊ុយក្រែន បើចង់ចរចា ឈានទៅការបញ្ចប់សង្គ្រាមមែន

លើកនេះ ទីក្រុងមូស្គូ បានដាក់លក្ខខណ្ឌថ្មីមួយទៀតទៅអ៊ុយក្រែន ហើយនេះគឺជាលក្ខខណ្ឌដ៏ស្រួលមួយ ពោលគឺគ្រាន់តែទីក្រុងកៀវ លុបចោលបម្រាមបោះបង់គំនិតឈប់ប្រកាន់ចិត្តមិនចរចាជាមួយមេដឹកនាំវិមានក្រឹមឡាំងលោក វ្ល៉ាឌីមៀរ ពូទីន ទៀតទៅ នោះភាគីទាំងពីរអាចចូលមកកាន់តុពិភាក្សាគ្នាស្តីពីវិធីឈានទៅរកការបញ្ចប់សង្គ្រាមបានហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រម្លឹកទៅខែតុលាឆ្នាំ២០២២ កាលនោះ លោក វ៉ូឡូឌីមៀរ ហ្សេលេនស្គី បានចុះហត្ថលេខាលើក្រឹត្យមួយ ដោយហាមឃាត់រាល់កិច្ចពិភាក្សាជាមួយរុស្ស៊ី ដរាបណាលោកពូទីន នៅកាន់អំណាច ដោយសារតែមេដឹកនាំអ៊ុយក្រែន រូបនេះលែងមានជំនឿចិត្តលើទីក្រុងមូស្គូទៀតហើយ។

យ៉ាងណា តាមការចុះផ្សាយរបស់ RT កាលពីថ្ងៃអង្គារទី២២ខែមេសាឆ្នាំ២០២៥ ទីក្រុងមូស្គូ បានដាក់ចេញនូវលក្ខខណ្ឌថ្មីនេះ ដោយអ្នកនាំពាក្យវិមានក្រឹមឡាំង Dmitry Peskov ប្រាប់ទៅអ្នកសារព័ត៌មានថា បម្រាមរបស់អ៊ុយក្រែន លើការហាមឃាត់មិនឲ្យពិភាក្សាដោយផ្ទាល់ជាមួយរុស្ស៊ីគឺជា ឧបសគ្គដ៏ធំ។

លោកនិយាយថា បើខាងអ៊ុនក្រែនបើកចិត្តនិងបង្ហាញឆន្ទៈនោះ ឧបសគ្គបែបនេះគួរតែជម្នះបាន ដើម្បីបើកផ្លូវឆ្ពោះទៅកាន់ទំនាក់ទំនងរវាងប្រទេសទាំងពីរ។ ស្ថានភាពជាក់ស្តែង គឺនៅពេលអ៊ុយក្រែនខ្លួនឯង បានហាមឃាត់ទំនាក់ទំនងបែបនេះ ហើយមិនព្រមចាត់វិធានការណាមួយ ដើម្បីលុបចោលបម្រាម។

ការបង្ហាញលក្ខខណ្ឌនេះកើតឡើងត្រឹមមួយថ្ងៃប៉ុណ្ណោះ បន្ទាប់ពីលោកពូទីន ប្រកាសក្តែងៗថា លោកបើកចិត្តជានិច្ចចំពោះការចរចាសន្តិភាពដោយផ្ទាល់ជាមួយអ៊ុយក្រែន។

សេចក្តីប្រកាសនេះទៀតសោត កើតឡើងបន្ទាប់ពីបទឈប់បាញ់ពិធីបុណ្យ Easter រយៈពេល៣០ម៉ោង ដែលលោកពូទីន ប្រកាសជាឯកតោភាគី បានផុតកំណត់។

ងាកទៅខាងអ៊ុយក្រែនឯណោះ លោក ហ្សេលេនស្គី ក៏ប្រកាសដែរថា អ៊ុយក្រែនត្រៀមខ្លួន​រួច​រាល់​ដើម្បីចូលរួមការចរចាដោយផ្ទាល់ជាមួយរុស្ស៊ី ប៉ុន្តែបន្ទាប់ពីមានបទឈប់បាញ់ពេញលេញត្រូវបានអនុវត្ត​ជា​មុន​សិន៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី ប្រាប់​ថា រុស្ស៊ី​លួច​បច្ចេកវិទ្យា​ដ្រូន​ពី​ចិន