សម្តេចធិបតី៖ ការប្រគល់វត្ថុបុរាណពីថៃជូនកម្ពុជាវិញ ជាការវិលត្រឡប់ដួងព្រលឹងបុព្វបុរសខ្មែរ

នាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត បានថ្លែងអំណរគុណយ៉ាងជ្រាលជ្រៅចំពោះការសម្រេចចិត្តរបស់ភាគីប្រទេសថៃ ដែលបានប្រគល់វត្ថុបុរាណខ្មែរចំនួន ២០ ជូនដល់កម្ពុជាវិញ។ សម្តេចបានថ្លែងបែបនេះ នាឱកាសអញ្ជើញធ្វើសន្និសីទសារព័ត៌មានរួមគ្នា ជាមួយនាយករដ្ឋមន្ត្រីនៃព្រះរាជាណាចក្រថៃ លោកជំទាវ ផែថងថាន ស៊ីណាវ៉ាត្រ នៅវិមានសន្តិភាព នាថ្ងៃទី ២៣ ខែមេសានេះ។

ឆ្លៀតក្នុងឱកាសនោះ សម្តេចធិបតី មានប្រសាសន៍ថា ចំពោះវិស័យវប្បធម៌ សូមថ្លែងអំណរគុណយ៉ាងជ្រាលជ្រៅចំពោះការសម្រេចចិត្តរបស់ប្រទេសថៃ ក្នុងការប្រគល់ជូនកម្ពុជាវិញនូវវត្ថុបុរាណខ្មែរចំនួន ២០ ដែលបានរឹបអូសពីក្រុមទុច្ចរិត។ សម្តេចបញ្ជាក់ថា៖«ការប្រគល់នេះ មិនត្រឹមតែជាវត្ថុបុរាណប៉ុណ្ណោះទេ ប៉ុន្តែជាដួងព្រលឹងបុព្វបុរសរបស់ខ្មែរ ដែលបានព្រាត់ប្រាសពីមាតុភូមិដោយសារសង្គ្រាមកន្លងទៅ»។

បើតាមសម្តេចធិបតី ប្រទេសថៃ នឹងប្រគល់វត្ថុបុរាណជូនកម្ពុជាវិញក្នុងសប្តាហ៍នេះ។  វត្ថុបុរាណទាំងនោះត្រូវបានជនទុច្ចរិតលួចចេញពីកម្ពុជាអំឡុងឆ្នាំ ១៩៨០-១៩៩០ លក់ទៅឱ្យបរទេស គ្រាពេលដែលខ្មែរកំពុងមានជម្លោះ។

បើតាមការចុះផ្សាយរបស់គេហទំព័រ Thai PBS កាលពីខែឧសភា ឆ្នាំ ២០២៤ វត្ថុបុរាណទាំង ២០ ដែលថៃព្រមប្រគល់ជូនកម្ពុជាវិញ គឺ​ស្ថិត​ក្នុង​ចំណោម​វត្ថុ​បុរាណ​ចំនួន​៤៣ ដែលរត់ពន្ធពី​សិង្ហ​បុរី ចូលប្រទេសថៃ ​កាលពី​ឆ្នាំ​២០០០។​

ពាក់ព័ន្ធបញ្ហានេះដែរ អ្នកនាំពាក្យរងរដ្ឋាភិបាលថៃ លោកស្រី Radklao Inthawong Suwankiri លើកឡើងថា គណៈរដ្ឋមន្ត្រី បានឯកភាពសំណើរបស់នាយកដ្ឋានវិចិត្រសិល្បៈ ប្រគល់វត្ថុបុរាណមកឱ្យកម្ពុជាវិញ ស្របតាមកិច្ចព្រមព្រៀងទ្វេភាគី កម្ពុជា-ថៃ។

តាមការបញ្ជាក់ពីលោកស្រី តាមពិតទៅមានវត្ថុបុរាណកម្ពុជាដល់ទៅ ៤៣ឯណោះដែល​អាជ្ញាធរ​ថៃ ​រឹបអូស​បានពីអ្នករត់ពន្ធ​ ហើយក្រោយពេលនាយកដ្ឋាន​វិចិត្រសិល្បៈ ពិនិត្យជាក់លាក់ពីប្រភពដើម ក្នុងឆ្នាំ២០០៨និង២០១៥ ថៃ ក៏បានប្រគល់ឲ្យកម្ពុជានូវវត្ថុបុរាណចំនួន២៣រួចទៅហើយដែរ ទើបមកដល់ឆ្នាំ២០២៤នេះ ថៃ បានឯកភាពប្រគល់ចំនួន ២០ទៀត។

រដ្ឋមន្រ្តីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា ធ្លាប់មានប្រសាសន៍ថា ជាអកុសល ទោះបីជាមានកិច្ចប្រឹងប្រែងរបស់រាជរដ្ឋាភិបាល ដែលមានក្រសួងវប្បធម៌និងវិចិត្រសិល្បៈជាសេនាធិការ ដើម្បីការពារបេតិកភណ្ឌវប្បធម៌របស់យើងក៏ដោយ ក៏ការលួច និងការបំផ្លិចបំផ្លាញទីតាំងបុរាណវិទ្យានៅតែបន្ត។ ដើម្បីប្រយុទ្ធប្រឆាំងនឹងការជួញដូរដោយខុសច្បាប់នៃ វត្ថុបុរាណដែលជាសម្បត្តិវប្បធម៌របស់ជាតិឱ្យមានប្រសិទ្ធភាព យើងត្រូវសម្របសម្រួលកិច្ចខិតខំប្រឹងប្រែង និងលើកកម្ពស់ការសហការគ្នារវាងស្ថាប័នពាក់ព័ន្ធ អង្គការជាតិ និងអន្តរជាតិ និងប្រទេសនៅក្នុងតំបន់ក៏ដូចជាលើឆាកអន្តរជាតិ។

លោកស្រីបានសង្កត់ធ្ងន់ថា កិច្ចសហប្រតិបត្តិការអន្តរជាតិនៅតែជាកត្តាដ៏មានសារៈសំខាន់បំផុត ដើម្បីទប់ស្កាត់ការជួញដូរដោយខុសច្បាប់នូវសម្បត្តិវប្បធម៌។ លោកស្រីបន្តថា ដោយឡែកព្រះរាជាណាចក្រកម្ពុជាបានពង្រឹងកិច្ចសហប្រតិបត្តិការអន្តរជាតិរបស់ខ្លួនតាមរយៈការ ចុះហត្ថលេខាលើកិច្ចព្រមព្រៀងជាមួយព្រះរាជាណាចក្រថៃឡង់ដ៍ សហរដ្ឋអាមេរិច ក៏ដូចជាមួយបណ្តាប្រទេស ផ្សេងៗទៀតជាច្រើន ដើម្បីអន្តរាគមន៍លើបញ្ហានេះ។

លោកស្រីបញ្ជាក់ថា៖«ការធ្វើការរួមគ្នា គឺជាគន្លឹះក្នុងការថែរក្សាបេតិកភណ្ឌសហគមន៍ និងសម្រាប់មនុស្សជាតិទាំងមូល ហើយកិច្ចសហប្រតិបត្តិការអន្តរជាតិក៏មានន័យថាធ្វើការយ៉ាងជិតស្និទ្ធជាមួយនឹងអង្គការអន្តរជាតិដូចជា អង្គការយូណេស្កូ ដើម្បីជួយដល់ប្រទេសរបស់យើង ក្នុងការប្រយុទ្ធប្រឆាំងនឹងការជួញដូរដោយខុសច្បាប់ដូចជាការលួច ការនាំចេញ-នាំចូលសម្បត្តិវប្បធម៌»៕