សក្តានុពលសម្បូរបែបធ្វើឲ្យស្រុកសេសានប្រែមុខមាត់ថ្មី

អស់រយៈពេលជាង៣០ឆ្នាំ ស្រុកសេសានដែលមានដងទន្លេចំនួន៣ និងមានព្រំប្រទល់ជាប់ជាមួយខេត្តតនគិរី ខេត្ត មណ្ឌលគិរី និងក្រចេះ សម្បូរទៅដោយសក្តានុពធនធានធម្មជាតិផងនោះ បានផ្លាស់ប្ដូរការអភិវឌ្ឍន៍បន្តិចម្ដងៗរហូតមកទល់បច្ចុប្បន្ននេះ។

ជាង៣០ឆ្នាំមុនស្រុកនេះមានសភាពស្ងាត់ជ្រងំក៏ប៉ុន្តែក្រោយមកស្រុកសេសានបានបោះជំហានទៅមុខរីកចំរើនលើគ្រប់វិស័យតាមដងទន្លេសេសានដីអំណោយផលសម្រាប់ធ្វើកសិកម្មរួមានសក្តានុពលជាច្រើនទៀតដូចជាទេសចរណ៍ក្នុងចំណោមស្រុកក្រុងទាំង៦ នៃខេត្តស្ទឹងត្រែង។

លោក សុវណ្ណ ពិសេដ្ឋ អភិបាលស្រុកសេសានបានរៀបរាប់ថា ស្រុកសេសានត្រូវបានកាត់ចេញពីស្រុកស្ទឹងត្រែង ខេត្តស្ទឹងត្រែង នៅឆ្នាំ១៩៨៥ ហើយបានដាក់ឈ្មោះជាស្រុកសេសាន។ ប្រជាពលរដ្ខប្រមាណ៧០ភាគរយភាគច្រើនរស់នៅតាមដងទន្លេចំនួន៣ គឺទន្លេសេកុង សេសាន និងស្រែពក ពួកគាត់ស្ទើរតែ៩០ភាគរយបានប្រកបមុខរបរកសិកម្មធ្វើស្រូវ ដាំបន្លែផ្សេងៗ ដំណាំហូបផ្លែ ចិញ្ចឹមសត្វ និងនេសាទត្រី។

ស្រុកនៅជាប់មាត់ទន្លេមួយនេះរីកចម្រើនគ្រប់វិស័យជាពិសេសហេដ្ឋារចនាសម្ព័ន្ធផ្លូវថ្នល់តភ្ជាប់ពីតំបន់ជនបទក្នុងឃុំចំនួន៧ មកកាន់ទីប្រជុំជនស្រុក និងខេត្តស្ទឹងត្រែង បង្កលក្ខណៈងាយស្រួលដល់ការធ្វើដំណើររបស់ប្រជាពលរដ្ឋ និងដឹកកសិផលមកកាន់ទីផ្សារបម្រើសេវាសាធារណៈ បម្រើសេវារបស់រដ្ឋជាច្រើនបានទៅដល់ប្រជាពលរដ្ឋជាបណ្ដើៗ។
លើសពីនេះស្រុកសេសានក៏មានទំនប់វារីអគ្គិសនីសេសានក្រោមពីរធំជាងគេបង្អស់នៅប្រទេសកម្ពុជាបានលេចធ្លោនៅប៉ែកឦសានជាមួយនឹងការអភិវឌ្ឍវិស័យជាច្រើនមានដូចជាផ្លូវថ្នល់រមណីយដ្ឋានទេសចរណ៍ វិស័យឯកជនតាមដងទន្លេសេសាន។

មុននឹងទៅដល់ស្រុកសេសានយើងត្រូវធ្វើដំណើរចេញពីក្រុងស្ទឹងត្រែងតាមផ្លូវមាត់ទន្លេសេសាន យើងក៏អាចទស្សនារមណីយដ្ឋាននៅតាមដងទន្លេជាច្រើនកន្លែងក្នុងរដូវប្រាំង ឬរដូវវស្សាអាចទស្សនាពីទេសភាពតាមមាត់ច្រាំងទន្លេជិះកង់កម្សាន្តហាត់ប្រាណផ្សាភ្ជាប់ជាមួយបរិស្ថានទេសចរណ៍ធម្មជាតិ និងទស្សនាភូមិជនជាតិដើមភាគតិចមើលប្រាសាទបុរាណ និងទេសភាពស្រុកស្រែតាមបែបធម្មជាតិតំបន់ជនបទ។ ភ្ជាប់ផ្លូវកៅស៊ូស្ពានថ្មនៅតាមផ្លូវមាត់ទន្លេស្រុកសេសានធ្វើឲ្យវិស័យដីធ្លីមានសន្ទុះតម្លៃខ្លាំងប្រជាពលរដ្ឋលក់ដូរជូនភ្ញៀវបានប្រាក់កម្រៃបន្ថែមលើជីវភាពប្រចាំថ្ងៃ។

លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង បានប្រាប់ថា វិស័យទេសចរណ៍នៅស្រុកសេសានមានពីររដូវកាល គឺនៅរដូវប្រាំងមានរៀបចំជាកន្លែងរមណីយដ្ឋានកម្សាន្តនៅតាមដងទន្លេនៅរដូវវស្សាភ្ញៀវទេសចរជាតិ និងអន្តរជាតិអាចជិះកង់កម្សាន្តតាមមាត់ទន្លេ និងទស្សនាទេសភាពការរស់នៅរបស់ប្រជាពលរដ្ឋ។

ប្រធានមន្ទីរទេសចរណ៍បាននិយាយបន្ថែមទៀតថា​ ក្រៅពីរមណីយដ្ឋានសម្រាប់ទទួលភ្ញៀវជាតិ និងអន្តរជាតិនៅរដូវប្រាំង​រដូវវស្សាវិស័យឯកជនកំពុងរៀបចំភោជនីយដ្ឋានសម្រាប់ទទួលភ្ញៀវទេសចរណ៍គ្រប់រដូវកាល។

លោក កៃ តុលា ដៃគូអភិវឌ្ឍន៍វិស័យទេសចរណ៍បានគាំទ្រចំពោះចក្ខុវិស័យនេះ ព្រោះប្រជាពលរដ្ឋនៅ ក្នុងស្រុកសេសាន ពួកគាត់សប្បាយចិត្ត ដោយមិនបាច់ឲ្យកូនចៅទៅធ្វើការឆ្ងាយពីផ្ទះ នាំព្រួយបារម្ភពីបញ្ហាផ្សេងៗ។ លោកបន្ថែមថា នៅពេលមានភ្ញៀវទេសចរមកលេងច្រើនអាចផ្តល់ផលប្រយោជន៍ដល់ប្រជាសហគមន៍និងកសិករនៅភូមិនេះ តាមរយៈការលក់ ដូរកសិផលរបស់ខ្លួននិងបាន ការពារសម្បត្តិធនធានធម្ម ជាតិនៅតំបន់នេះថែមទៀត៕

អត្ថបទ៖ ងិនលីម