អ្នកជំនាញលើកទឹកចិត្តឱ្យអតិថិជន​ប្រឈមហានិភ័យ​សងត្រឡប់​យកបញ្ហាទៅជជែកជាមួយធនាគារ

លោក កាំង តុងងី​ អ្នក​នាំពាក្យ​សមាគម​គ្រឹះស្ថាន​មីក្រូហិរញ្ញវត្ថុ​កម្ពុជា មានប្រសាសន៍នៅថ្ងៃទី ១០ ខែកក្កដា ឆ្នាំ ២០២៣នេះថា វិបត្តិសេដ្ឋកិច្ច តែងតែកើតមានជាប្រចាំ អតិថិជនត្រូវមានផែនការច្បាស់លាស់មុនពេលខ្ចី ដែលរៀបចំកម្ចីឱ្យមានគោលដៅហើយមានប្រាក់បំរុងដើម្បីប្រើប្រាស់នៅពេលដែលមានបញ្ហាសេដ្ឋកិច្ចតឹងតែងកើតឡើង។

លោកថា ប្រសិនបើអតិថិជនប្រឈមបញ្ហាបង់សងត្រឡប់ទៅធនាគារសូមឱ្យយកបញ្ហាទៅជជែកជាមួយមន្ត្រីធនាគារ ឬមន្ត្រីមីក្រូហិរញ្ញវត្ថុ និងរកដំណោះស្រាយដោយភាពស្មោះត្រង់ជាមួយគ្នា នោះខាងធនាគារ ឬគ្រឹះស្ថាន​មីក្រូហិរញ្ញវត្ថុ អាចនឹងមានជម្រើសមួយចំនួនផ្ដល់ឱ្យអតិថិជន តែអាស្រ័យលើភាពស្មោះត្រង់របស់អតិថិជន។

លោកបញ្ជាក់ថា នៅកម្ពុជា គ្មានគ្រឹះស្ថានមីក្រូហិរញ្ញវត្ថុ ឬធនាគារណាមួយអាចរឹបអូសទ្រព្យបញ្ចាំរបស់អតិថិជនដោយមិនឆ្លងកាត់ដំណោះស្រាយ ឬនិតិវិធីតុលាការបានឡើយ។

ការដោះស្រាយតម្រូវឱ្យលក់ទ្រព្យបញ្ចាំ ឬមិនលក់ជាជម្រើសរបស់អតិថិជន ប្រសិនបើអតិថិជនមិនចង់លក់ទេ មិនមាននរណាមាសិទ្ធិបង្ខំឱ្យលក់ទេ ហើយប្រសិនបើមានករណីបង្ខំ គំរាមកំហែង អតិថិជនអាចប្ដឹងទៅគ្រឹះស្ថានផ្ទាល់ក៏បាន ប្ដឹងទៅធនាគារជាតិ ឬប្ដឹងអាជ្ញាធរក៏បាន។

បើតាមលោក កាំង តុងងី វិស័យធនាគារហិរញ្ញវត្ថុ ឥណទានប្រឈមហានិភ័យនៅកម្ពុជាមានការកើនឡើងពី ១ ភាគរយដល់ជិត ៥​ ភាគរយ ក្រោយវិបត្តិកូវីដ១៩ តែលោកបញ្ជាក់ថា តាមស្ដង់ដាអន្តរជាតិវាយតម្លៃថា ប្រសិនបើឥណទានមានហានិភ័យក្រោម ៥ ភាគរយ មានន័យថា វិស័យនេះនៅមានសុខមាលភាពល្អប្រសើរ។

វិស័យធនាគារ និងហិរញ្ញវត្ថុនៅកម្ពុជាបច្ចុប្បន្នមានអតិថិជនជិត ៤ លានគណនី ដែលមានទឹកប្រាក់កម្ចីសរុបប្រមាណ ៥០ ពាន់លានដុល្លារ ក្នុងនោះមានកម្ចីដែលមានហានិភ័យជិត ៥ ភាគរយ ដែលអន្តរជាតិចាត់ទុកថា ភាគរយនេះស្ថិតក្នុងស្ថានភាពល្អប្រសើរនៅឡើយ៕

អត្ថបទ៖ ឡេង ដេត