ព័ត៌មានជាតិ

ពលរដ្ឋដែលរងការប៉ះពាល់ដោយសារទិញអចលនទ្រព្យអាចស្នើរៀបចំឥណទានឡើងវិញ

បានផុស

៣ years មុន

នៅ

ថ្ងៃអង្គារ ១៤ វិច្ឆិកា ២០២៣

ដោយ

ប្រជាពលរដ្ឋដែលរងការប៉ះពាល់ពិតប្រាកដពាក់ព័ន្ធនឹងការទិញអចលទ្រព្យអាចដាក់ស្នើរៀបចំឥណទានឡើងវិញ បន្ទាប់ពីប្រមុខដឹកនាំរាជរដ្ឋាភិបាលសម្ដេចធិបតី ហ៊ុន ម៉ាណែតបានលើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុរៀបចំឡើងវិញចំពោះអ្នកទិញដីធ្លីផ្ទះសម្បែងដែលរងផលប៉ះពាល់ដោយសារវិបត្តិសេដ្ឋកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីរៀបចំឥណទានឡើងវិញរបស់គ្រឹះស្ថានមីក្រូហិរញ្ញវត្ថុធ្លាប់អនុវត្តម្ដងរួចមកហើយអំឡុងពេលដែលកម្ពុជារងផលប៉ះពាល់ដោយសារជំងឺកូវីដ១៩ ហើយបានចប់នៅដំណាច់ឆ្នាំ ២០២១។ កាលនោះគ្រឹះស្ថានមីក្រូហិរញ្ញវត្ថុអាចរៀបចំជូនអតិថិជនបានដោយមិនមានផលប៉ះពាល់អ្វីទៅលើប្រវត្តិអតិថិជននោះទេ។

លោក កាំង តុងងី អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុ បានប្រាប់កម្ពុជាថ្មី នៅថ្ងៃទី ១៤ ខែវិច្ឆិកា ឆ្នាំ ២០២៣នេះថា រាជរដ្ឋាភិបាលបានប្រកាសអនុញ្ញាតឱ្យគ្រឹះស្ថានធនាគារ ហិរញ្ញវត្ថុរៀបចំឥណទានឡើងវិញជូនដល់ប្រតិបត្តិករវិស័យទេសចរណ៍ក្នុងខេត្តសៀមរាប និងពិនិត្យមើលលទ្ធភាពវិស័យអចលនទ្រព្យ។

លោកថាក្នុងករណីនេះ គ្រឹះស្ថានមីក្រូហិរញ្ញវត្ថុអាចរៀបចំឥទានឡើងវិញបានជូនដល់ពលរដ្ឋដូចបរិបថកូវីដ១៩ដែរគឺរៀបចំបន្ធូរបន្ថយសម្រួលការបង់សងត្រឡប់ជូនពួកគាត់។

ដោយឡែកវិស័យផ្សេងទៀត បើពលរដ្ឋពិតជារងផលប៉ះពាល់មែន គាត់នៅតែស្នើសុំរៀបចំឥណទានឡើងវិញជាមួយគ្រឹះស្ថាន។

លោកបញ្ជាក់ថា៖«គាត់ត្រូវស្នើទៅគេប្រាប់គេថា គាត់រងផលប៉ះពាល់ ចំណូលគាត់ធ្លាក់ចុះគាត់មានលទ្ធភាពបង់ប៉ុណ្ណា ពីព្រោះការរៀបចំឥណទានឡើងវិញត្រូវធ្វើតាមលក្ខណ្ឌជាស្ដែងនីមួយៗ របស់អតិថិជន ដើម្បីឱ្យមានប្រសិទ្ធិភាព»។

អំឡុងពេលកូវីដ១៩ មានអតិថិជនរបស់គ្រឹះស្ថានមីក្រូហិរញ្ញវត្ថុជាង ៣៧ ម៉ឺនគណនី បានស្នើរៀបចំឥទានឡើងវិញ ដែលមានទំហំទឹកប្រាក់ជាង ១ ពាន់ ៧០០ លានដុល្លារ៕

អត្ថបទ៖ ឡេង ដេត