ព័ត៌មានជាតិ
ក្រសួងអប់រំ គ្រោងបង្កើតក្លិបសិក្សា បំប៉នសិស្សខ្សោយ នៅភ្នំពេញ
ក្រសួងអប់រំ យុវជន និងកីឡា គ្រោងនឹងបង្កើតក្លិបសិក្សានៅតាមសាលារៀនមួយចំនួននៅក្នុងរាជធានីភ្នំពេញ ដើម្បីបំប៉នដល់សិស្សដែលរៀនខ្សោយទៅតាមមុខវិជ្ជានីមួយៗ ចាប់ពីថ្នាក់ទី៧ ដល់ទីថ្នាក់១២។
កញ្ញា ហេង លីហ័រ មន្ត្រីក្រុមការងាររបស់ មជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយ នៃក្រសួងអប់រំ យុវជន និងកីឡា មានប្រសាសន៍នៅរសៀលថ្ងៃទី១២ ខែមករា នេះថា គម្រោងបង្កើតក្លិបសិក្សានៅតាមសាលានៅរាជធានីភ្នំពេញដើម្បីបំប៉នដល់សិស្សខ្សោយនេះ ជាជំហានដំបូង ក្រសួងនឹងបង្កើតចំនួន ១៥ សាលាជាមុនសិន ហើយប្រសិនបើដំណើរការទៅរលូន ក្រសួងនឹងបន្តពង្រីកទៅតាមសាលានៅក្នុងរាជធានីភ្នំពេញ និងតាមបណ្តាខេត្តផ្សេងៗទៀត។
កញ្ញា ហេង លីហ័រ បានបន្តថា ក្រុមការងារនឹងបើកយុទ្ធនាការអប់រំឌីជីថលនៅតាមសាលារៀនចំនួន ៣៨ នៅក្នុងរាជធានីភ្នំពេញនាពេលខាងមុខ ដើម្បីផ្សព្វផ្សាយពីការបង្កើតក្លិបសិក្សានេះដល់សាលានីមួយៗ ហើយពិនិត្យមើលថា តើសាលាណាខ្លះអាចបង្កើតក្លិបសិក្សាបាន និងសាលាខ្លះមិនអាចបង្កើតបាន។
កញ្ញា ហេង លីហ័រ បានបន្តទៀតថា ចំពោះសាលាដែលអាចបង្កើតក្លិបបាន ត្រូវមានបន្ទប់មួយសមរម្យសម្រាប់ដាក់សម្ភារបរិក្ខាផ្សេងៗដែលក្រសួងជាអ្នកចំណាយដោយផ្ទាល់ដូចជា ទូរដាក់សៀវភៅសម្រាប់សិស្សអាន និងទូរទស្សន៍សម្រាប់សិស្សមើលជាក្រុមពេលផ្សាយផ្ទាល់តាមរយៈគេហទំព័រ ទូរសិក្សារបស់មជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយ។
កញ្ញា ហេង លីហ័រ បានបន្ថែមថា ការបង្កើតក្លិបសិក្សាតាមសាលារៀននេះ ពិតជាមានសារសំខាន់ណាស់ក្នុងការជួយបំប៉នដល់សិស្សដែលរៀនយឺតតាមមុខវិជ្ជានីមួយៗ ពីថ្នាក់ទី៧ ដល់ទី១២ ឱ្យបានប្រសើរឡើងវិញ ពិសេសនៅក្នុងក្លិបតម្រូវឱ្យសិស្សពូកែជួយបង្ហាត់បង្រៀនដល់សិស្សដែលខ្សោយ។
ពាក់ព័ន្ធនឹងការបង្កើតក្លិបសិក្សានេះ កាលពីថ្ងៃទី១១ ខែមករា ឆ្នាំ២០២៤ បណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា និងជាប្រធានលេខាធិការដ្ឋានមជ្ឈមណ្ឌលអប់រំឌីជីថល និងការអប់រំពីចម្ងាយ បានអញ្ជើញពិនិត្យលើដំណើរការរៀបចំប្រព័ន្ធបង្រៀនសមកាលកម្ម (Live teaching system) នៅកម្មវិធីសាលារៀនជំនាន់ថ្មី វិទ្យាល័យព្រះយុគន្ធរ។ បណ្ឌិត សាន វឌ្ឍនា បានថ្លែងអំណរគុណចំពោះការចំណាយពេលវេលា កម្លាំងកាយ និងប្រាជ្ញារបស់ លោកគ្រូអ្នកគ្រូ ក្នុងកិច្ចខិតខំប្រឹងប្រែងបង្រៀន និងចូលរួមជម្រុញឱ្យដំណើរការរៀបចំប្រព័ន្ធបង្រៀនសមកាលកម្មប្រព្រឹត្តទៅបាន។
គួរបញ្ជាក់ថា សម្រាប់ការបង្រៀនជាលក្ខណៈសមកាលកម្ម (Synchronized ឬ Live Teaching) ជាការផ្សាយបន្តផ្ទាល់ទៅកាន់សិស្សានុសិស្សទូទាំងប្រទេស ដើម្បីជួយបំប៉នសមត្ថភាពក្នុងទម្រង់ជាក្លិបសិក្សា ជូនដល់សិស្សដែលរៀនយឺតតាមមុខវិជ្ជានីមួយៗ ពីថ្នាក់ទី៧ ដល់ទី១២ តាមរយៈគេហទំព័រទូរសិក្សា របស់មជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយ៕
អត្ថបទ៖ សំអឿន
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ