វិញ្ញាសាជម្រើសសម្រាប់ការប្រឡងបាក់ឌុបឆ្នាំនេះ មិនខុសពីឆ្នាំមុនៗឡើយ

ក្រសួងអប់រំ​យុវជន និងកីឡា បានចេញសេចក្តីជូនដំណឹងនៅរសៀលថ្ងៃទី១៩ ខែមិថុនា ឆ្នាំ២០២៥ ពីវិញ្ញាសាជម្រើសសម្រាប់ការប្រឡងបាក់ឌុបឆ្នាំ២០២៥ខាងមុខ គឺមិនខុសពីឆ្នាំមុនៗនោះទេ។

ក្រសួងអប់រំ បានបញ្ជាក់ថា វិញ្ញាសាជម្រើសសម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១៨ សីហា ២០២៥ ត្រូវបានកំណត់ថា សម្រាប់ថ្នាក់វិទ្យាសាស្ត្រ៖ ប្រវត្តិវិទ្យា ចំណែកថ្នាក់វិទ្យាសាស្ត្រសង្គម ៖ផែនដី និងបរិស្ថានវិទ្យា។

គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) គឺមានចំនួន ៧មុខវិជ្ជា។ សម្រាប់ថ្នាក់វិទ្យាសាស្រ្ត មានមុខវិជ្ជាជម្រើស ជីវវិទ្យា គីមីវិទ្យា ភាសាបរទេស អក្សរសាស្ត្រខ្មែរ រូបវិទ្យា គណិតវិទ្យា។ ចំណែក ថ្នាក់វិទ្យាសាស្រ្តសង្គម មានមុខវិជ្ជាជម្រើស ប្រវត្តិវិទ្យា ភូមិវិទ្យា ភាសាបរទេស គណិតវិទ្យា សីលធម៌-ពលរដ្ឋ និងអក្សរសាស្រ្តខ្មែរ។

សូមជម្រាបថា កាលពីឆ្នាំមុន ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ប្រព្រឹត្តទៅនៅថ្ងៃទី០៨ ខែតុលា ឆ្នាំ២០២៤ ដោយមានបេក្ខជន​ប្រឡង​ជាប់​សរុប ១០៦ ៣៥១ នាក់ ត្រូវជា ៧៩.០០ ភាគរយ នៃចំនួន បេក្ខជន​មក​ប្រឡង។ បេក្ខជន​ជាប់​និទ្ទេស A ចំនួន ២ ២១៦ នាក់, និទ្ទេស B ចំនួន ៩ ៧០១ នាក់, និទ្ទេស C ចំនួន ២២ ៦៧៥ នាក់, និទ្ទេស D ចំនួន ៣៦ ៦៨៣ នាក់, និង​និទ្ទេស E ចំនួន ៣៥ ០៧៦ នាក់៕