ក្រសួងអប់រំ៖ ការជ្រើសរើសគ្រូបង្រៀនផ្អែកលើកិច្ចព្រមព្រៀងការងារផ្តល់ឱកាសការងារថ្មីដល់យុវជនជាង ១ម៉ឺនកន្លែង

ក្រសួងអប់រំ យុវជននិងកីឡា បានអះអាងថា ការជ្រើសរើសគ្រូបង្រៀនផ្អែកលើកិច្ចព្រមព្រៀងការងារជំនួសគ្រូបង្រៀនជាប់កិច្ចសន្យា គ្រូបង្រៀនថ្នាក់ពីរវេន និងគ្រូបង្រៀនថ្នាក់គួបមិនមានផលប៉ះពាល់លើបន្ទុកថវិកានោះទេ ប៉ុន្តែនឹងជួយពង្រឹងគុណភាពគ្រូបង្រៀនការបង្រៀន និងជាការផ្តល់ឱកាសការងារថ្មីដល់យុវជន ជាង១ម៉ឺនកន្លែងថែមទៀត។

យោងតាមអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី នាយករដ្ឋមន្ត្រីក្នុងពិធីបិទសន្និបាតបូកសរុបលទ្ធផលការងារអប់រំ យុវជន និងកីឡាឆ្នាំសិក្សា២០២៣-២០២៤ និងទិសដៅការងារឆ្នាំសិក្សា២០២៤-២០២៥ បានណែនាំឱ្យ ដោះស្រាយករណីគ្រូបង្រៀនជាប់កិច្ចសន្យា ដូចជា ការកំណត់សុពលភាពកិច្ចសន្យាសម្រាប់រយៈពេល ២ឆ្នាំ ,ពិនិត្យលទ្ធភាព លើការផ្តល់ក្របខ័ណ្ឌដល់គ្រូបង្រៀនជាប់កិច្ចសន្យាចំណេះដឹងទូទៅ,ការកែលម្អប្រព័ន្ធជ្រើសរើសនិងបណ្តុះបណ្តាលគ្រូបង្រៀន និងការផ្តល់ក្របខ័ណ្ឌមន្ត្រីរាជការដល់គ្រូបង្រៀនជាប់កិច្ចសន្យានៅបឋមសិក្សា គួរអនុវត្តផ្អែកលើគោលការណ៍ តម្រូវការគ្រូបង្រៀន អតីតភាពការងារបង្រៀន និងមានឥរិយាបថល្អ និងមិនប្រព្រឹត្តខុសនឹងក្រមសីលធម៌វិជ្ជាជីវៈព្រមទាំងបានបំពេញល័ក្ខខ័ណ្ឌគរុកោសល្យស្របតាមគោលការណ៍កំណត់របស់ក្រសួងអប់រំ យុវជន និងកីឡា។

នៅក្នុងកិច្ចប្រជុំស្តីពីការពិនិត្យ និងសម្រេចចំពោះវិធានការដើម្បីរៀបចំគុណវុឌ្ឍិនៃគ្រូបង្រៀននៅគ្រឹះស្ថានសិក្សាសាធារណៈ កាលពីថ្ងៃទី៧ មិថុនា នៅទីស្តីការក្រសួង ក្រោមអធិបតីភាពលោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា ក្រសួងអប់រំ បានលើកឡើងថាការកែទម្រង់វិធីសាស្ត្រនៃការជ្រើសរើស និងបណ្តុះបណ្តាលសិស្ស និស្សិត នៅតាមសាលាគរុកោសល្យ ដើម្បីឱ្យសិស្ស និស្សិតបានបំពេញគុណវុឌ្ឍិជាជាគ្រូបង្រៀនពេញលក្ខណៈក្នុងការជ្រើសរើសឱ្យចូលបង្រៀនជាវិធីសាស្ត្រកសាងជាមុននូវធនធានមនុស្សមានលក្ខណៈសម្បត្តិជាគ្រូបង្រៀនដែលអាចឆ្លើយតបយ៉ាងប្រសើរចំពោះតម្រូវការនៃការជ្រើសរើសគ្រូបង្រៀន។

ទន្ទឹមនេះ ការប្រើប្រាស់ថវិកាសម្រាប់គាំទ្រការជ្រើសរើសនិងការបណ្តុះបណ្តាលក៏នឹងមានប្រសិទ្ធភាពប្រសើរជាងមុន។ ដើម្បីលើកកម្ពស់សមត្ថភាពគ្រូបង្រៀន និងគុណភាពនៃការបង្រៀននៅតាមគ្រឹះស្ថានបឋមសិក្សា និងមធ្យមសិក្សាសាធារណៈការរៀបចំ និងកំណត់គុណវុឌ្ឍិគ្រូបង្រៀនឱ្យបានសមស្រប ពិតជាចាំបាច់ប្រព័ន្ធទទួលស្គាល់គុណវុឌ្ឍិជាគ្រូបង្រៀនចំណេះដឹងទូទៅ គឺជាមូលដ្ឋានដ៏សំខាន់សម្រាប់ការអភិវឌ្ឍអាជីពជាគ្រូបង្រៀន (ទាំងជាគ្រូបង្រៀនក្របខ័ណ្ឌនិងមិនមែនក្របខ័ណ្ឌ) ចាប់ពីដំណាក់កាលនៃការជ្រើសរើស និងការអភិវឌ្ឍសមត្ថភាពជាប្រចាំដោយផ្អែកលើគោលការណ៍នៃការរៀបចំ និងកំណត់គុណវុឌ្ឍិគ្រូបង្រៀនចំណេះដឹងទូទៅ។ ខណៈបច្ចុប្បន្ន ក្រសួងអប់រំ យុវជន និងកីឡា បាន និងកំពុងសហការជាមួយក្រសួងមុខងារសាធារណៈ និងក្រសួងសេដ្ឋកិច្ចនិងហិរញ្ញវត្ថុដើម្បីរៀបចំសេចក្តីព្រាងអនុក្រឹត្យអំពីការកំណត់គុណវុឌ្ឍិគ្រូបង្រៀនចំណេះដឹងទូទៅដើម្បីដាក់ជូនរាជរដ្ឋាភិបាលពិនិត្យនិងសម្រេច៕

អត្ថបទ៖ សំអឿន