ព័ត៌មានជាតិ
មន្រ្តីកសិកម្មខេត្តបាត់ដំបងអះអាងឆ្នាំនេះសេសសល់សាច់ត្រីជាង ១៣ ពាន់តោន
សាច់ត្រីក្នុងខេត្តបាត់ដំបងនៅឆ្នាំនេះបើធៀបឆ្នាំមុនមានការថយចុះបន្តិចសម្រាប់ត្រីធ្វើ ប្រហុក ផ្អក និង ត្រីឆ្អើរ។
ក្នុងនោះត្រីកំភ្លាញ និងត្រីសសម្រាប់ការផ្គត់ផ្គង់ធ្វើប្រហុកនិងត្រីឆ្អើរមិនមានការខ្វះខាតនោះទេ បានឆ្លើយតបតាមតម្រូវការរបស់ប្រជាពលរដ្ឋក្នុងខេត្តបើទោះបីមិនសេសសល់ច្រើនក្នុងការនាំចេញដូចឆ្នាំកន្លងទៅក្តី។
លោក ជួង សុភា នាយខ័ណ្ឌរដ្ឋបាលជលផលខេត្តបាត់ដំបងបានឲ្យដឹងថា ការថយចុះសាច់ត្រីបន្តិចបន្តួចក្នុងឆ្នាំនេះ ដោយសារតែកំណើនអ្នកចិញ្ចឹមត្រីរ៉ស់ និងត្រីឆ្ដោនៅបឹងទន្លេសាបកើនឡើង ៣ ដងបើធៀបឆ្នាំមុន ទើបធ្វើឲ្យត្រីសម្រាប់ធ្វើប្រហុក និង ត្រីឆ្អើ មានការថយចុះជាងឆ្នាំមុនបន្តិច។
លោកបន្តថា កត្តាដែលធ្វើឲ្យប្រហុក និង ត្រីឆ្អើ មិនបានសល់ច្រើនគឺប្រជាពលរដ្ឋដែលរស់នៅតំបន់នោះបានយកត្រី កំភ្លៀញ និងត្រីស ដែលពួកគាត់នេសាទបានយកទៅលក់ឲ្យអ្នកចិញ្ចឹមត្រី រ៉ស់ និងត្រីឆ្ដោ ដើម្បីធ្វើជាចំណីមួយផ្នែក ហើយមួយផ្នែកទៀតធ្វើ ប្រហុក និង ត្រីឆ្អើ សម្រាប់ទុកជាស្បៀង។
យ៉ាងណាមិញ ប្រជាពលរដ្ឋជាច្រើនរស់នៅក្នុងឃុំកោះជីវាំង ស្រុកឯកភ្នំ បានលើកឡើងថា បទល្មើសនេសាទកើតឡើងច្រើន ក្រុមឈ្មួញប្រើឧបករណ៍ខុសច្បាប់ ដាក់ស្ទាក់ចាប់ស្ទើរគ្មានសល់។ ពលរដ្ឋថា កុំថាឡើយមានប្រហុកនិងត្រីឆ្អើសម្រាប់លក់ សូម្បីតែទុកសម្រាប់ផ្គត់ផ្គង់គ្រួសារមិនចង់គ្រប់គ្រាន់ផង។
អ្នកស្រី ហ៊ុំ ស្រី រស់នៅព្រែកទាល់ ឃុំកោះជីវាំង បានលើកឡើងថា “ក្រុមប្រជានេសាទដូចពួកខ្ញុំ ពឹងទៅលើឧបករណ៍លួង ឬលបដើម្បីយកទៅដាក់យកត្រីសម្រាប់ដោះស្រាយជីវភាព តែពេលនេះរកតែត្រីសម្រាប់បរិភោគមិនចង់គ្រប់ផង ដោយសារតែក្រុមឈ្មួញប្រើឧបករណ៍ធំៗ ដូចជា បរណ រ៉ាវ និងឧបករណ៍ខុសច្បាប់ផ្សេងទៀត ដែលមានប្រវែងរាប់សិបគីឡូម៉ែត្រ បានចាប់បំផ្លាញគ្មានសល់ទាំងអាតូចទាំងអាត្រីធំ”។
ពលរដ្ឋមួយរូបទៀតឈ្មោះ ហេង ចំប៉ី រស់នៅក្នុងភូមិឃុំជាមួយគ្នាខាងលើបានលើកឡើងថា “ខ្ញុំគិតថាឈ្មួញដែលចិញ្ចឹមត្រីរ៉ស់ និងត្រីឆ្នោ អាចធ្វើឲ្យហិនហោចត្រីសម្រាប់ធ្វើ ប្រហុក និងត្រីឆ្អើ ទៅវិញទេ។ បើតាមគំនិតពួកខ្ញុំ គួរកុំចិញ្ចឹមច្រើនពេក ឬរកវិធីប្រើប្រាស់ចំណីផ្សេង បើមិនដូច្នោះប្រយោជន៍ត្រីធំបានទៅឈ្មួញ តែត្រីតូចត្រូវហិនហោច”។
បើទោះបីបែបណា លោក ហេង សិទ្ធ មន្ត្រីនៃមន្ទីរកសិកម្មខេត្តបាត់ដំបងទទួលបន្ទុកផ្នែកស្ថិតិបានឲ្យដឹងថា សាច់ត្រីឆ្នាំនេះបានប្រហាក់ប្រហែលឆ្នាំមុន តែកម្រិតដែលសេសសល់ក្រៅពីការផ្គត់ផ្គង់មានការថយចុះជាងឆ្នាំមុនខ្លះៗ។
លោកបន្តថា បើតាមមន្រ្តីជំនាញធ្វើការគណនាដោយយកចិត្តទុកដាក់ កាលពីដើមឆ្នាំ២០២៤ រកឃើញថា សាច់ត្រីឆ្នាំនេះផលិតបាន ៧១ ៨៣០ តោន បានទ្រទ្រង់លើប្រជាពលរដ្ឋក្នុងខេត្តសរុប ១ ១១១ ៥៦១ នាក់ អស់ចំនួន ៥៨ ៣៥៧តោន និងនៅសេសសល់ចំនួន ១៣ ៤៧៣ តោន សម្រាប់នាំចេញក្នុងស្រុកឬក្រៅស្រុក៕
អត្ថបទ៖ សៅ សារិទ្ធ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ