តំបន់គោលដៅទេសចរណ៍ក្នុងខេត្តបាត់ដំបង កើនឡើងដល់​ ១១៥ ទីតាំង

បើតាមលោក ហម អរុណ អនុប្រធានមន្ទីរទេសចរណ៍ខេត្តបាត់ដំបង​​បាន​ឲ្យ​ដឹង​ថា គិត​ត្រឹមឆ្នាំ ២០២៤ គោលដៅទីតាំងទេសចរណ៍ទូទាំងខេត្តបាត់ដំបង​បានកើនឡើងរហូតដល់ ១១៥ ទីតាំង បើធៀបក្នុងឆ្នាំ២០២៣ មានចំនួន ១១១ ទីតាំង​។

ស្រុកដែលមានសក្តានុពលផ្នែកវិស័យទេសចរណ៍មានលើក្រុង/ស្រុកចំនួន ៤ គឺក្រុងបាត់ដំបង ស្រុកបាណន់ ស្រុកសំឡូត និងស្រុកឯកភ្នំ ក្នុងនោះស្រុកបាណន់ និងស្រុកសំឡូត មានភ្ញៀវទេសចរទៅកម្សាន្តច្រើន។

លោក ហម អរុណ បាន​អះអាង​ថា ខេត្តបាត់ដំបង​ក្រៅជាខេត្ត​មានភាព​អំណោយផល​ទៅលើវិស័យកសិកម្ម ក៏​មានសក្តានុពលទេសចរណ៍ធម្មជាតិ​ចម្រុះផ្សេងៗពីគ្នា ក្នុងនោះមានទាំង​គោលដៅទីតាំងទេសចរណ៍សាសនា និងវប្បធម៌ជាប្រវត្តិសាស្ត្រដ៏​សំបូរ​បែប​។

ស្រុកសំឡូតមានភាពទាក់ទាញ​ជាមួយ​សម្រស់​ទេសភាពធម្មជាតិចម្រុះដូចជាព្រៃព្រឹក្សា ទឹកជ្រោះជ្រលងភ្នំ សំបូរទៅដោយ​ដំណាំឈើ​ហូបផ្លែ។ ចំណែកស្រុកបាណន់ និងស្រុកឯកភ្នំ ជាគោលដៅទេសចរណ៍នៅកៀកក្រុងបាត់ដំបង ហើយ​ទាំងពីរស្រុកនេះគឺជាទេសចរណ៍សាសនា និងទេសចរណ៍វប្បធម៌​ប្រវត្តិសាស្ត្រ ដែលភ្ញៀវបរទេសតែងទៅទស្សនា ដើម្បី​សិក្សាស្វែងយល់ពីទំនៀមទម្លាប់ប្រពៃណី របស់ខ្មែរតាំងពីសម័យកាលរហូតមក៕

អត្ថបទ÷សៅ សារិទ្ធ