ដាំ​ផ្លែទៀបស្វិតខ្មែរលើដី​​ចម្ការ​ជាង ៣​ ហិកតា ​រក​ចំណូល​បានពី ៦ ទៅ ៧ ពាន់ដុល្លារក្នុងមួយ​ឆ្នាំ

កសិករម្នាក់ឈ្មោះ រ៉ាន់ រួន រស់នៅតំបន់ឆ្អោង ស្ថិតក្នុង ភូមិទួលពោធិ៍ ឃុំសំឡូត ខេត្តបាត់ដំបង បានដាំទៀបស្វិតខ្មែរ បើគិតមកដល់ពេលនេះរយៈពេលជាង ៩ ឆ្នាំមកហើយ។ បើមើលអំពីស្ថានភាពគ្រួសាររបស់​កសិកររូបនេះមានភាពប្រសើរជាងកសិករផ្សេងៗក្នុងភូមិស្រុក ដោយសារតែកសិករនេះធ្លាប់មានបទពិសោធន៍​ក្នុងការដាំនិងថែទាំទៀបប្រភេទនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក វ៉ាន់ រួម ក្រោយពេលដែលលោកបានប្រកបរកបរនេះ និងមានបទពិសោធន៍ផងនោះ លោកអាចរកប្រាក់ចំណូលសម្រាប់ផ្គត់ផ្គង់គ្រួសារ មិនប្រឈមក្នុងការខ្វះខាតក្នុងការរស់នៅប្រចាំថ្ងៃដូចគ្រាកន្លងទៅ។

លោកថា បច្ចុប្បន្នលោកដាំទៀបស្វិតខ្មែ​​រ​ចំនួន ២ ២០០ ដើម លើដីចម្ការ​ទំហំដី ៣ ហិកតា។ បើគិតត្រឹមរដូវកាលចុងក្រោយនេះ លោកបានប្រមូលផល ៨ ដងមក​ហើយ។

លោកថា “ឆ្នាំនេះប្រមូលផលមិនក្រោម ១០ តោនទេ ព្រោះឆ្នាំមុនៗបានត្រឹម ៦ ទៅ ៧ តាន ដោយសារដើមទៀបស្វិតកាន់តែធំកាន់តែហុចផលច្រើន។ ហើយការលក់ដូរ ខ្ញុំមិនដែលលក់រាយផង គឺបោះដុំឲ្យម៉ូយលក់ចំណេញបន្ត លក់ឱ្យម៉ូយបានចន្លោះ ពី ៥ ៥០០ រៀល ទៅ ៦ ០០០ រៀល ក្នុង ១ គីឡូក្រាម។ បើគិតពីចំណូល ក្រៅពីទូទាត់លើការចំណាយ​ផ្សេងៗ អាចសល់បានចន្លោះពី ៦ ពាន់ដុល្លារ ទៅ ៧ ពាន់ដុល្លារក្នុង ១ ឆ្នាំ។

ប្រជាកសិករនៅតាមបណ្តាស្រុកមួយចំនួននៃខេត្តបាត់ដំបង នៅតែរកចំណូលបន្ទាប់បន្សំតាមរយះការប្រមូលផលផ្លែ​ទៀបស្វិត ដែលកសិករ​បានដាំដុះនៅតាមដីលំនៅដ្ឋាន។

ដោយសារតែមើលឃើញទំហំទីផ្សារក្នុងស្រុកមានការពេញនិយមផ្លែទៀបប្រភេទនេះជាងពូជទៀបចូល ប្រជាកសិករមួយចំនួនក៏បានប្រមូលផលចូលទីផ្សារ ដើម្បីរកចំណូលបន្ថែមក្រៅពីផលដំណាំស្រូវ។

បើតាមមន្ត្រីកសិកម្មខេត្តបាត់ដំបង​បាន​ឲ្យ​ដឹងថា ទៀបស្វិតខ្មែរ​ជាដំណាំឈើហូបផ្លែមួយប្រភេទ ដែលអ្នកស្រុកតែងនិយម​​ដាំនៅលើដីលំនៅដ្ឋានជាយូរយារមកហើយ សម្រាប់បរិភោគជាលក្ខណះគ្រួសារ។ ប៉ុន្តែដំណាំប្រភេទនេះក៏ត្រូវបានកសិកររកចំណូលបានដើម្បីជាជំនួយក្នុងការគ្រប់គ្រងជីវភាពក្នុងគ្រួសារយ៉ាងប្រសើរផងដែរ។

លោកបន្តថា ដំណាំទាប​ខ្មែរនេះ​កសិករភាគច្រើន​មិនធ្វើការដាំដុះ ជាប្រភេទចម្ការធំដុំនោះទេ មានតែការដាំដុះជាលក្ខណះគ្រួសារលើដីភូមិតិចតួចប៉ុណ្ណោះ។

កសិករនៅក្នុងឃុំគា ស្រុកមោងឫស្សី អ្នកស្រី សួន តឿ បានឲ្យដឹងថា លើដីលំនៅដ្ឋាន អ្នកស្រីបានដាំទាបស្វិតខ្មែរ​នៅ​ជុំវិញផ្ទះបានជាង ១០ ដើម ដោយ​ប្រមូលផល​លក់លើទីផ្សារខ្លួនឯង មួយគីឡូក្រាមបាន​តម្លៃ​ចន្លោះពី ៩ ពាន់ទៅ ១ មុឺនរៀល។

អ្នកស្រីបន្តថា “លក់ដាច់ណាស់ ហើយក៏មិនប្រើដើមទុនច្រើន​ដែរ។ មួយរដូវខ្ញុំលក់បានលុយច្រើនដែរ ហើយផ្លែទៀបប្រមូលបានច្រើនសារ ហើយទៀបនេះបើយើងកាន់តែបេះផ្លែវា កាន់តែចេញផ្លែច្រើនបន្តបន្ទាប់រហូត”។

អត្ថបទ÷សៅ សារិទ្ធ