សំណង់អភិរក្សកូនកាត់​ “បារាំង-ខ្មែរ” ក្រុងបាត់ដំបង នឹងក្លាយជាប្រភពប្រាក់ចំណូល ក្រោយ​រៀបចំកាន់តែ​សោភណភាព​ទាក់ទាញ

សំណង់អភិរក្សក្នុង​ក្រុង​បាត់ដំបង ក្រោយមានការរៀបចំពីអាជ្ញាធរខេត្តជាបន្តបន្ទាប់ គេសង្កេតឃើញថាមានសណ្តាប់​ធ្នាប់ល្អ បានបង្កលក្ខណះ​ល្អ​ប្រសើរសម្រាប់ភ្ញៀវបរទេសដើរទស្សនាកម្សាន្ត។

មន្ត្រីរដ្ឋបាលខេត្តបាត់ដំបង​បានឲ្យដឹងថា សំណង់អភិរក្សនៅក្នុងក្រុងបាត់ដំបង បានសាងសង់ឡើងជាជូរៗតាមដងផ្លូវក្នុង​​ក្រុងមានដូចជា តាមដងផ្លូវលេខ១ លេខ១កន្លះ, លេខ២ លេខ២កន្លះ និងផ្លូវលេខ៣ មានសរុបប្រមាណ ៨០០ ខ្នង ដែលមានអាយុកាលជាង ១០០ ឆ្នាំមកហើយ សាងសង់ចាប់ពីឆ្នាំ១៩០៧ ដល់ឆ្នាំ១៩៦០។

ដោយសារតែនៅក្នុងក្រុងបាត់ដំបង មិនមានសណ្តាប់ធ្នាប់ល្អ មានសភាពអាប់អ៊ួបាត់បង់សោភ័ណ្ឌភាព និងបរិយាកាស កំណើន​ភ្ញៀវជនបរទេសក៏មិនមានកំណើនក្នុងគ្រាកន្លងមក ទើបរដ្ឋបាលខេត្តតាមរយះអភិបាលខេត្តបានណែនាំចង្អុរបង្ហាញ​ដល់សាលាក្រុង ឲ្យរៀបចំសណ្តាប់ធ្នាប់ជាជំហានដំបូង និងបន្តការរៀបចំជាបន្តបន្ទាប់ ដោយមានការសហការជាមួយប្រជាពលរដ្ឋក្នុងមូលដ្ឋានក្រុង ទើបធ្វើឲ្យក្នុងក្រុងបាត់ដំបងបច្ចុប្បន្ននេះប្រកប​ដោយ​បរិយាកាស​ស្រស់បំព្រង មានសោភ័ណ្ឌភាពយ៉ាងប្រសើរ។

បើទោះជាយ៉ាងនេះក្តី ការរៀបចំក្នុងក្រុងមួយនេះដែលគេចាត់ទុកថាជាទីក្រុង”គុជ” ដែលសំបូរទៅដោយសំណង់អភិរក្សកូនកាត់”បារាំង-ខ្មែរ”នេះ ក៏នឹងត្រូវបន្តរៀបចំបន្ថែមទៀតតាមការរំពឹងទុក ខណះក្រោយមានការរៀបចំកំណើនភ្ញៀវបរទេសបានកើនឡើងជាបន្តបន្ទាប់ក្នុងការដើរដោយថ្មើជើង ដើម្បីទស្សនាសំណង់អភិរក្សនិងផ្តិតយករូបភាព ជាពិសេសកំណើនភ្ញៀវជាជនជាតិបារាំងតែម្តង។

លោក ហម អរុណ អនុប្រធាន និងជាអ្នកពាក្យនៃមន្ទីរទេសចរណ៍ខេត្តបាត់ដំបង​បានឲ្យដឹងថា ក្រុងបាត់ដំបង គឺជាគោល​ដៅទេសចរណ៍ដ៏ទាក់ទាញ​ តាមរយះសំណង់អភិរក្សដែលមានអាយុកាលជាង ១០០ ឆ្នាំយ៉ាងសំបូរបែបជាងគេក្នុងចំណោមខេត្តទាំង ៣ ក្នុងប្រ ទេសកម្ពុជា ក្នុងនោះមាន ខេត្តកំពត និងខេត្តក្រចេះ។

សំណង់អភិរក្សក្នុងក្រុងបាត់ដំបងមានប្រមាណ ៨០០ ខ្នង ហើយបច្ចប្បន្នសាលាក្រុងតាមរយះអភិបាលខេត្តបានណែនាំនិង​ចង្អុលបង្ហាញឲ្យរៀបចំឲ្យមានសោភ័ណ្ឌភាពសម្រាប់ភ្ញៀវបរទេសដើរទស្សនាកម្សាន្ត ឲ្យមានទីធ្លាធំទូលាយនិងបរិយាកាសល្អ និងមានដាំកូនឈើនៅតាមទីធ្លាមុខផ្ទះ បង្កើនជាសោភ័ណ្ឌភាពក៏ដូចជាបានទប់និងកម្តៅមួយផ្នែកផង​ដែរ​។

បើតាមលោក ហម អរុណ ក្រោយមានការរៀបចំបានល្អតាមដំណាក់កាល បច្ចុប្បន្នចំនួនភ្ញៀវទេសចរបរទេសបានកើនឡើងស្ទើររាល់ថ្ងៃ ជាពិសេសជនជាតិបារាំង។

លោកថា បើសិនជាថ្ងៃខាងមុខ ក្រុងបាត់ដំបងបានបង្កើតជាក្រុងទេសចរណ៍ តាមរយ:សំណង់អភិរក្សជាសម្បត្តិ​បេតិកភណ្ឌ​ទៀត នឹងអាចទាក់ទាញកំណើនទេសចរមកទស្សនាកាន់តែច្រើន ជាពិសេសភ្ញៀវជាជនជាតិបារាំង ពេលនោះ​ប្រជាពលរដ្ឋខ្មែរដែលរស់នៅក្នុងក្រុង នឹង​មានកំណើនសេដ្ឋកិច្ចកាន់តែប្រសើរថែមទៀតតាមរយះការលក់ដូរ និង​ជួលផ្ទះជាដើម។

បើ​តាមការបញ្ជាក់របស់លោក ហម អរុណ លក្ខណះពិសេសផ្ទះបុរាណបានចែកជាបីផ្នែកគឺ ទី១, មានរានហាលខាងមុខនិងចំហៀងផ្ទះ។ ទី២,នៅចំកណ្ដាលផ្ទះមានបន្ទប់ទទួលភ្ញៀវដ៏ធំមួយ នៅខាងឆ្វេងដៃផ្នែកខាងក្រោយនៃបន្ទប់ទទួលភ្ញៀវមាន​ទ្វារមួយនាំទៅកាន់បន្ទប់គេងពីរ។ ទី៣,ទល់មុខបន្ទប់គេងទាំងពីរមានទ្វារមានទ្វារមួយទៀត នាំទៅកាន់រានហាលចំហៀង និងជណ្ដើរដែលធ្វើពីឈើហើយចេញពីទ្វារនោះនៅខាងឆ្វេងដៃប្រហែលជា ៥ ម៉ែត្រមានផ្ទះបាយមួយទៀត (ដែលគេហៅបានថា “សំណង់អភិរក្សកូនកាត់បារាំង-ខ្មែរ”។

នៅជំនាន់ខ្មែក្រហម ផ្ទះនេះត្រូវបានគេយកធ្វើជាកន្លែងសំរាប់បោកស្រូវ ដាក់សម្ភារៈ ហើយធ្វើជាផ្ទះបាយរួមដែលជាហេតុ​បណ្ដាល​ឲ្យ​ខូចខាតអស់ពាក់កណ្ដាលនៅផ្នែកខាងក្រោយគឺផ្ទះបាយបច្ចុប្បន្ននេះ។ ផ្ទះបុរាណនេះមានការ ទាក់​ទាញ​ចំពោះភ្ញៀវជនជាតិបារាំង មានចំនួនច្រើនជាងគេ និងអាចទស្សនាជីវភាពប្រជាជនដែលរស់នៅតាមដងស្ទឹងសង្កែប្រកបរបដាំបន្លែ​ និងនេសាទត្រីផងដែរ៕

អត្ថបទ÷សៅ សារិទ្ធ