ព័ត៌មានជាតិ

ផ្លូវសំបុកមាន់ក្នុងក្រុងបាត់ដំបង ត្រូវបានមន្ទីរជំនាញជួសជុលជាបណ្ដើរៗ

បានផុស

៤៣ វិនាទី មុន

នៅ

ថ្ងៃសុក្រ ១៨ កក្កដា ២០២៥

ដោយ

ផ្លូវសំបុកមាន់ក្នុងក្រុងបាត់ដំបង ត្រូវបានមន្ទីរជំនាញជួសជុលជាបណ្ដើរៗ ហើយ ខណៈបច្ចុប្បន្នផ្លូវទាំងនេះបានរងការខូចខាតយ៉ាងធ្ងន់ធ្ងរដោយសារតែការរៀបចំប្រព័ន្ធលូរបស់ធនាគារអភិវឌ្ឍន៍អាស៊ី (ADB) មិនទាន់រួចរាល់ជាស្ថាពរ ដែលធ្វើឲ្យផ្លូវគ្រប់ច្រកល្ហកកំពុងប្រឈមការខ្ទេចខ្ទី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាផ្លូវកំពុងខូចខាតយ៉ាងធ្ងន់ធ្ងរក៏ដោយ ក៏គេសង្កេតឃើញថា ក្រុមការងារ នៃមន្ទីរសាធារណការបាននិងកំពុងដើរជួសជុល និងក្រាលកៅស៊ូនៅត្រង់ចំណុចណាដែលមានការខូចខាតបន្តិចបន្តួច ដើម្បីឲ្យពលរដ្ឋធ្វើដំណើរបានស្រួលជាបណ្ដោះអាសន្ន។

គួរបញ្ជាក់ដែរថា គម្រោងរបស់ធនាគារអភិវឌ្ឍន៍អាស៊ី គឺ ត្រូវក្រាលកៅស៊ូទាំងអស់ឡើងវិញ នៅពេលណាដែលការបង្កប់លូបញ្ចប់ ប៉ុន្តែក្នុងដំណាក់កាលកំពុងស្ថាបនា គឺ ខាងមន្ទីរជំនាញ ចុះធ្វើការជួសជុលតាមផ្លូវសំបុកមាន់ក្នុងក្រុងបាត់ដំបងជាបណ្ដោះអាសន្នសិន ដើម្បីងាយស្រួលក្នុងការធ្វើដំណើរ។

លោក ព្រួញ រិទ្ធថា ប្រធានមន្ទីរសាធារណការ បានបញ្ជាក់ថា មួយរយៈនេះ ដោយសារភ្លៀងធ្លាក់ជាប់ៗ គ្នារហូត ធ្វើឲ្យការងារជួសជុលត្រូវរាំងស្ទះ មិនអាចដំណើរការបាន ព្រោះនៅលើផ្លូវ និងជង្ហុក ពោរពេញដោយទឹកដក់។ ទើបតែប៉ុន្មានថ្ងៃនេះ មិនមានភ្លៀងធ្លាក់ ដូច្នេះក្រុមការងារក៏បានចាប់ផ្ដើមដំណើរការឡើងវិញ ដោយព្យាយាមជួសជុលទៅតាមទីតាំងមួយចំនួនក្នុងផ្លូវសំបុកមាន់ ដើម្បីឲ្យប្រជាពលរដ្ឋធ្វើដំណើរបានងាយស្រួល។ ដោយឡែកសម្រាប់គម្រោងស្ថាបនាផ្លូវ និងក្រាលកៅស៊ូទាំងអស់ឡើងវិញ ដរាបណាការងាររបស់ធនាគារអភិវឌ្ឍន៍អាស៊ីរួចរាល់ 100%៕

អត្ថបទ ៖ សោ និយមរ័ត្ន