កីឡា

ពេជ្រ សម្បត្តិ ប៉ះអ្នកមិនដែលចាញ់ ផាត់ថាណា រកឱកាសឈរកំពូលតារាងពូល A

បានផុស

១ ខែ មុន

នៅ

ថ្ងៃសុក្រ ១២ សីហា ២០២២

ដោយ

ការប្រកួតខ្សែក្រវាត់ភេសជ្ជៈប៉ូវកំលាំងខារ៉ាបាវរដូវកាលទី៨ ឆ្នាំ២០២២នេះឈានចូលជុំទី៣ហើយ ខណៈបេក្ខភាពម្នាក់ៗកំពុងប្រជែងគ្នាដើម្បីបានចំណាត់ថ្នាក់លេខ១ និងលេខ២នៃពូលនីមួយៗដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។

សម្រាប់ជុំទី៣ នាថ្ងៃអាទិត្យ ទី១៤ ខែសីហានេះនៅសង្វៀនបាយ័នស្ទឹងមានជ័យ ចាប់ពីម៉ោង៦ល្ងាចទៅ រឹតតែគួរឲ្យចាប់អារម្មណ៍ទ្វេឡើងនៅពេលក្របីព្រៃ ពេជ្រេ សម្បត្តិ ត្រូវប្រកួតជាមួយជើងខ្លាំងមិនទាន់ស្គាល់ចាញ់វគ្គសន្សំពិន្ទុក្នុងពូល B គឺ ថាត់ថាណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតពីរជុំកន្លងមក ពេជ្រ សម្បត្តិ ទទួលបាន៤ពិន្ទុ បន្ទាប់ពីបើកឆាកបានចាញ់ ទួនប៉េ ទាំងចម្រូងចម្រាសដែលធ្វើឲ្យរូបគេទទួលបាន១ពិន្ទុប៉ុណ្ណោះ ប៉ុន្តែប្រកួតជុំទី២ អ្នកលេងគុនខ្មែររូបនេះបានផ្តួល រ៉ាក់ថែ ឲ្យសន្លប់ក្នុងទឹកទី២ ដើម្បីទទួលបាន៣ពិន្ទុបន្ថែម។ ពេលនេះរូបគេកំពុងឈរលេខ១ក្នុងពូលជាមួយពិន្ទុសរុប៤ ខណៈការប្រកួតលើកទី៣នេះ ប៉ះជើងខ្លាំង ថាត់ថាណា។ ប្រសិនបើ សម្បត្តិ ទទួលបានជ័យជម្នះ រូបគេនឹងទទួលបានឱកាសឡើងទៅវគ្គខ្វែង៤នាក់ចុងក្រោយ។

ចំណែកជើងខ្លាំងថៃ ថាត់ថាណា ស៊ីតអាចចានវីន មាន៦ពិន្ទុពេញពីការប្រកួតឈ្នះទាំងពីរជុំកន្លងមក ហើយឈរចំណាត់ថ្នាក់លេខ២។ ប្រកួតជុំទី១ កីឡាករថៃរូបនេះបានយកឈ្នះ ធន់ ផានិត និងបន្ទាប់មកឈ្នះ ជ័រ ពៅ ដោយពិន្ទុ។ រូបគេមាន៦ពិន្ទុស្មើនឹងមិត្តរួមជាតិ ទួនប៉េ ដែលឈ្នះ២ប្រកួតដូចគ្នា។

នៅរាត្រីជាមួយគ្នានេះដែរ ជ័រ ពៅ ត្រូវប្រកួតជាមួយ រ៉ាក់ថែ ស៊ីតអាចានបៀរ។ ជ័រ ពៅ ជាបេក្ខភាព១រូបដែលមាន៤ពិន្ទុស្មើនឹង ពេជ្រ សម្បត្តិ និង ធន់ ផានិត ហើយក៏ជាបេក្ខភាពម្នាក់ដែលមានក្តីសង្ឃឹមឡើងទៅវគ្គខ្វែងដែរ។ បន្ទាប់ពីឈ្នះ១ និងចាញ់១ ជ័រ ពៅ ត្រូវការជ័យជម្នះលើ រ៉ាក់ថែ ទើបរូបគេសង្ឃឹមខ្ពស់ក្នុងការឡើងទៅវគ្គខ្វែងដែរ។