កីឡា

តើលោក Josep Muñoz និយាយអ្វីខ្លះ ក្រោយការប្រកួតតានតឹងយប់មិញ?

បានផុស

៣ ខែ មុន

នៅ

ថ្ងៃចន្ទ ២៧ មករា ២០២៥

ដោយ

ម្ចាស់ផ្ទះ ព្រះខ័នរាជស្វាយរៀង បានផ្តល់បរាជ័យជាលើកដំបូងដល់ ភ្នំពេញក្រោន ក្នុងរដូវកាលនេះ បន្ទាប់ពីយកឈ្នះដោយលទ្ធផល ៣-១ សម្រាប់ការប្រកួតសប្តាហ៍ទី១៧ ខេមបូឌានព្រីមៀរលីគ រដូវកាល២០២៤-២៥។

លោក Josep Muñoz គ្រូបង្វឹកព្រះខ័នរាជស្វាយរៀង បានមើលឃើញពីការសម្រេចចិត្តរបស់អាជ្ញាកណ្តាលល្អប្រសើរច្រើន ប៉ុន្តែក៏មានចំណុចខ្លះដែលសម្រេចចិត្តមិនច្បាស់លាស់។ ទោះបីជាយ៉ាងណា លោកពិតជាសប្បាយចិត្តចំពោះការលេងរបស់កូនក្រុមដែលធ្វើបានតាមផែនការច្រើន ហើយរីករាយដែលកីឡាករ Pablo បានវិលត្រឡប់ចូលទីលាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបាននិយាយថា ៖«យើងសប្បាយចិត្តសម្រាប់ការប្រកួតថ្ងៃនេះ។ នៅវគ្គទី១ យើងធ្វើបានល្អមែនទែន ក្នុងរយៈពេល២៥នាទីដំបូង។ យើងមានឱកាសច្រើនក្នុងការស៊ុត។ បន្ទាប់ពីយើងទាត់បញ្ចូលទីបាន១គ្រាប់ហើយ ក្រុមភ្នំពេញក្រោនបានដាក់សម្ពាធខ្លាំង ទាំងតំបន់បម្រើ និងតំបន់ការពារសុទ្ធតែឡើងមកដាក់សម្ពាធនៅខាងលើ។ យើងបង្កើតឱកាសពីក្រោយខ្នងច្រើន។ យើងបង្កើតឱកាសមួយទល់មួយជាមួយអ្នកចាំទី។ ជិតចប់វគ្គទី១ ភ្នំពេញក្រោន បានបង្កើតឱកាស យើងដឹងហើយគុណភាពកីឡាកររបស់គេរហូតតាមស្មើយើង»។

«នៅវគ្គទី២ យើងធ្វើបានល្អ ជាពិសេសកីឡាករបានយល់ដឹងច្រើនពីរបៀបលេង។ យើងគួរតែមានគ្រាប់បាល់ច្រើនជាងហ្នឹង។ បន្ទាប់ពីបាល់ប៉េណាល់ទីហើយ យើងគួរតែមានគ្រាប់បាល់បន្ថែមទៀត។ ថ្ងៃនេះយើងសប្បាយចិត្តសម្រាប់ Pablo ដែលបានត្រឡប់មកកាន់ទីលានសាជាថ្មី។ ចុងក្រោយ យើងសប្បាយចិត្តមែនទែនសម្រាប់ការប្រកួតនេះ។ ជាពិសេសជាមួយអ្នកគាំទ្រយ៉ាងច្រើនរបស់យើង»។

លោកបាននិយាយពីអាជ្ញាកណ្តាលថា ៖«ជាទូទៅ មន្ត្រីអាជ្ញាកណ្តាលធ្វើបានល្អសម្រាប់ការប្រកួតថ្ងៃនេះ ប៉ុន្តែពិបាកដែរក្នុងការសម្រេចចិត្តមួយចំនួន។ ប្រសិនបើជំនួយការអាជ្ញាកណ្តាលជួយសម្រេចចិត្តមួយចំនួន ប្រហែលជាប្រសើរជាងនេះ។ យើងឃើញវគ្គទី១ ប៉ះ Christian គឺ១០០% ប៉េណាល់ទី។ វគ្គទី២វិញ ឃើញចាប់បាល់ Offside ប៉ុន្មានដង តែអត់ Offside ទេ។ ជាពិសេសបាល់ មិន រតនៈ ស៊ុតចូលគឺអត់ Offside ទេ។ មួយទៀតគឺ ចាន់ប៉ូលីន គួរតែទទួលបានកាតលឿងលើកទី២ គឺស្មើនឹងកាតក្រហម។ ពិន័យប៉េណាល់ទីគឺត្រូវហើយ ហើយកំហុសនេះគឺជាកំហុសពិន័យកាត ប៉ុន្តែមិនពិន័យកាតទៅវិញ»។

គិតត្រឹមសប្តាហ៍ទី១៧ ព្រះខ័នរាជស្វាយរៀង ឈ្នះ១៤ប្រកួត ស្មើ១ប្រកួត និងចាញ់២ប្រកួត មាន៤៣ពិន្ទុ តាមពីក្រោយ១ពិន្ទុពីក្រុមកំពូលតារាង ភ្នំពេញក្រោន (៤៤ពិន្ទុ) ដែលឈ្នះ១៤ប្រកួត ស្មើ២ប្រកួត និងចាញ់១ប្រកួត៕