កីឡា

រស្មី គុនខ្មែរ ពីមនុស្សធម្មតាក្លាយជាគំរូគេក្នុងភូមិជំរុញទឹកចិត្តអាណាព្យាបាលឲ្យកូនចាប់ហាត់កីឡា

បានផុស

១ year មុន

នៅ

ថ្ងៃអង្គារ ២២ មេសា ២០២៥

ដោយ

អ្នកប្រដាល់មកពីខេត្តបាត់ដំបង រស្មី គុនខ្មែរ ថាពីមុនត្រឹមជាក្មេងតូចល្អិត និងធម្មតាម្នាក់នៅក្នុងភូមិពពាលខែ ឃុំជ្រៃ ប៉ុណ្ណោះ ប៉ុន្តែក្រោយហាត់ប្រដាល់ឥលូវក្លាយជាក្មេងគំរូដល់យុវជនផ្សេងៗធ្វើតាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ រស្មី គុនខ្មែរ

រស្មី គុនខ្មែរ បានឲ្យដឹងថា មុនចាប់អាជីពជាអ្នកប្រដាល់នេះរូបគេក៏ត្រូវបានអ្នកជិតខាង និងអ្នកក្នុងស្រុកភូមិចំអន់អំពីរាងកាយផងដែរថា «មាឌតូច ដៃជើងតូចៗ ចង់ធ្វើអ្នកប្រដាល់វាយអ្នកជាមួយអ្នកណាឈ្នះ»។ ប៉ុន្តែដោយសារការស្រឡាញ់ និងចង់ចាប់អាជីពប្រដាល់នេះឲ្យបានរូបគេមិនខ្វល់ពីសំដីអ្នកដទៃនោះឡើយជម្នះរហូតមកដល់ពេលនេះ។

រស្មី គុនខ្មែរ កំពុងហ្វឹកហាត់

បន្ទាប់ពីបានក្លាយជាអ្នកប្រដាល់ពេញលេញ និងមានឱកាសប្រកួតតាមសង្វៀន ឬស្ថានីយផ្សេងៗជាហូរហែរួចមកងាកទៅអ្នកស្រុកភូមិបែរជាសរសើរ និងស្រឡាញ់ចូលចិត្តជាខ្លាំង។ បន្ថែមពីនេះប្រាក់រង្វាន់ និងតម្លៃខ្លួនប្រកួតទទួលបានជាបន្តបន្ទាប់ធ្វើឲ្យរូបគេអាចជួយដល់ជីវភាពគ្រួសារបានកាន់តែច្រើនធូរធារជាងមុន។

រស្មី គុនខ្មែរ កំពុងហ្វឹកហាត់

អ្នកលេងគុនខ្មែរទម្ងន់ស្រាលរូបនេះបន្ថែមទៀតថា ឥលូវនេះរូបគេមានការគោរពស្រឡាញ់ និងឲ្យតម្លៃជាខ្លាំងពីសំណាក់អ្នកនៅស្រុកកំណើតថែមទាំងចាស់ៗទីនោះបានប្រាប់កូនចៅឲ្យយកគំរូតាមទៀតផងដូចជាឲ្យហាត់ប្រដាល់ និងតស៊ូដូចខ្លួន។ ដោយសារការតស៊ូរបស់ខ្លួននេះហើយទើបអ្នកស្រុកជំរុញដល់កូនចៅឲ្យចាប់អាជីពតាមទាំងសីលធម៌ នៃការរស់នៅក្នុងសង្គមល្អ ចេះជួយរកលុយដោះស្រាយជីវភាពគ្រួសារ និងបានលើកតម្កើងកេរ្តិ៍ឈ្មោះក្រុមគ្រួសារ។

បញ្ជាក់ដែរថា រស្មី គុនខ្មែរ ជាកីឡាករ នៃក្លឹបប្រដាល់គុនខ្មែរដូនតា បង្វឹកដោយលោក ឃឹម សុជាតិ។ រូបគេមានស្រុកកំណើតនៅភូមិ ពពាលខែ ឃុំជ្រៃ ស្រុកថ្មគោល ខេត្តបាត់ដំបង។ រស្មី ចាប់ប្រឡូកក្នុងវិស័យប្រដាល់អំឡុងដើមឆ្នាំ ២០១៨ ជាមួយលោក ស៊ន អេលីត នៃក្លឹបឆ្មាសសែនសុខ៕

អត្ថបទដោយ៖ នួន ស៊ីណា

Related Topics:កីឡាប្រដាល់គុនខ្មែរ