កូវីដនៅថៃ Archives - Kampuchea Thmey Daily

ស្ដេចថៃ មហា វ៉ាជីរ៉ាឡុងកន និងមហេសីទ្រង់ ជាសះស្បើយពីជំងឺកូវីដ

សាង ស្រីល័ក្ខ — Mon, 26 Dec 2022 09:42:53 +0000

យោងតាមការិយាល័យរាជវង្សបញ្ជាក់ក្នុងថ្ងៃនេះថា ស្ដេចថៃ មហា វ៉ាជីរ៉ាឡុងកន និងមហេសី បានជាសះស្បើយពីជំងឺកូវីដ ១៩ ក្រោយទ្រង់ទាំងពីរធ្វើតេស្តម្ដងទៀតជាមួយវេជ្ជបណ្ឌិត។

ទន្ទឹមនោះ ក្រុមវេជ្ជបណ្ឌិតបានធ្វើរោគវិនិច្ឆ័យថា ព្រះមហាក្សត្រទាំងពីរអង្គគ្មានមេរោគ ហើយឥឡូវនេះអាចបន្តសកម្មភាពរាជវង្សរបស់ទ្រង់បានដូចធម្មតា។

សូមបញ្ជាក់ដែរថា ព្រះមហាក្សត្រមហា វ៉ាជីរ៉ាឡុងកន និងមហេសីស៊ូធីតា បានធ្វើតេស្តវិជ្ជមានកូវីដ១៩ ក្នុងអំឡុងពេលធ្វើតេស្តអង់ទីហ្សែនរហ័សជាប្រចាំកាលពីថ្ងៃទី១៧ ខែធ្នូ ប៉ុន្តែមានរោគសញ្ញាស្រាលប៉ុណ្ណោះ។ បន្ទាប់មក គ្រូពេទ្យបានចេញវេជ្ជបញ្ជាដោយធ្វើការព្យាបាលព្រះមហាក្សត្រ និងម្ចាស់ក្សត្រី ហើយបានស្នើសុំទ្រង់ទាំងពីរឈប់បំពេញកាតព្វកិច្ចមួយរយៈមកហើយ៕

ប្រែសម្រួល៖ សាង ស្រីល័ក្ខ

ប្រភព៖Nation

ចុចអាន៖៥ ចំណុចពីរាជបុត្ររបស់ស្ដេចថៃ មហា វ៉ាជីរ៉ាឡុងកន អាចស្នងរាជ្យបន្តពីបិតាទ្រង់

The post ស្ដេចថៃ មហា វ៉ាជីរ៉ាឡុងកន និងមហេសីទ្រង់ ជាសះស្បើយពីជំងឺកូវីដ appeared first on Kampuchea Thmey Daily.

ចាប់ពីខែក្រោយ អ្នកចាក់វ៉ាក់សាំងពេញដូសទៅលេងក្រុងបាងកក ដោយមិនចាំបាច់ធ្វើចត្តាឡីស័ក

សាង ស្រីល័ក្ខ — Sun, 12 Sep 2021 04:23:09 +0000

មន្ត្រីបាននិយាយថា ថៃគ្រោងនឹងបើកដំណើរការទីក្រុងបាងកកឡើងវិញនាខែ តុលា ខណៈប្រទេសខ្លួន ព្យាយាមជួយសង្គ្រោះឧស្សាហកម្មទេសចរណ៍ ដែលកំពុងរងផលប៉ះពាល់ដោយកូវីដ ។ បើទោះបីជារលកទី ៣ នៃការផ្ទុះឆ្លងខ្លាំងពីវីរុសបំប្លែងខ្លួន Delta កំពុងរាតត្បាតក៏ដោយ។

អាជ្ញាធរទេសចរណ៍ថៃបាននិយាយថា ចាប់ពីថ្ងៃទី ១ ខែតុលាតទៅ អ្នកទេសចរបរទេសដែលបានចាក់វ៉ាក់សាំងពេញលេញ នឹងអាចទៅលេងទីក្រុងបាងកកនិងខេត្តចំនួន ៤ ផ្សេងទៀត ដោយមិនចាំបាច់ត្រូវដាក់ខ្លួនឲ្យនៅដាច់ដោយឡែករយៈពេល ២ សប្ដាហ៍ទៀតឡើយ។

ខេត្តទាំង ៤ ដែលអាចទៅលេងបានរួមមាន រួមមានខេត្ត Chiang Mai, Chon Buri, Phetchaburi និងខេត្ត Prachuap Khiri Khan ដែលត្រូវបានគេរំពឹងថា នឹងធ្វើតាមគំរូប្រអប់ខ្សាច់ ឬ Sandbox ដូចនៅកោះភូកេតដែរ។

ដោយឡែក អ្នកទេសចរអន្តរជាតិជាង ២៩,០០០ នាក់ ដែលចាក់វ៉ាក់សាំងពេញលេញ បាននាំគ្នាសម្រុកទៅលេងឆ្នេរសមុទ្រភូកេតក្រោមគម្រោង Sandbox ចាប់តាំងពីខែ កក្កដា ដោយបង្កើតប្រាក់ចំណូលជិត ៥០ លានដុល្លារ។

គម្រោងនេះ ធ្វើឲ្យថៃចាប់ផ្ដើមដាក់គោលដៅចំនួន ២១ បន្ថែមទៀតនៅខែ តុលា នឹងទៅក្នុងបញ្ជីរួមមានខេត្តឈៀងរ៉ៃ សុខោទ័យ និងកន្លែងលំហែកាយដ៏ពេញនិយមនៅរ៉ាយុងជាដើម។

ប៉ុន្តែរលកកូវីដ -១៩ ទីបីនិងសាហាវបំផុតរបស់ថៃ មិនទាន់បានធូរស្រាលនៅឡើយទេ ហើយទីភ្នាក់ងារទេសចរណ៍បានព្រមានថា ផែនការអាចនឹងមានការផ្លាស់ប្ដូរខ្លះៗ៕

ប្រែសម្រួល ៖ សាង ស្រីល័ក្ខ

ប្រភព៖cgtn

ចុចអាន៖Baiya វ៉ាក់សាំងកូវីដទី៤ ដែលផលិតនៅថៃ ចាប់ផ្ដើមសាកល្បងលើមនុស្សលើកទី ១ នៅខែនេះ

ចុចអាន៖សិស្សសាលានៅ ក្រុងបាងកក មានជំងឺរ៉ាំរ៉ៃ ៧ ប្រភេទនេះនឹងទទួលការចាក់វ៉ាក់សាំង Pfizer ចុងខែនេះ

The post ចាប់ពីខែក្រោយ អ្នកចាក់វ៉ាក់សាំងពេញដូសទៅលេងក្រុងបាងកក ដោយមិនចាំបាច់ធ្វើចត្តាឡីស័ក appeared first on Kampuchea Thmey Daily.

Baiya វ៉ាក់សាំងកូវីដទី៤ ដែលផលិតនៅថៃ ចាប់ផ្ដើមសាកល្បងលើមនុស្សលើកទី ១ នៅខែនេះ

សាង ស្រីល័ក្ខ — Fri, 03 Sep 2021 03:10:28 +0000

Baiya Phytopharm មួយក្នុងចំណោម ៤ នៃវ៉ាក់សាំងកូវីដផលិតនៅប្រទេសថៃ នឹងបើកដំណើរការសាកល្បងលើមនុស្សលើកដំបូងរបស់ខ្លួននៅខែនេះ។

លោកស្រី Waranyu Pooncharoen សហស្ថាបនិកនិងជាប្រធានផ្នែកបច្ចេកវិទ្យារបស់ក្រុមហ៊ុនបាននិយាយថា វ៉ាក់សាំង Baiya នឹងត្រូវធ្វើតេស្តលើអ្នកស្ម័គ្រចិត្តនៅពេលដែលរដ្ឋបាលចំណីអាហារនិងឱសថ (FDA) ផ្ដល់ភ្លើងខៀវ។

លោកស្រីបានបន្ថែមថា ប្រសិនបើលទ្ធផលនៃការសាកល្បងមនុស្សបំពេញតាមការរំពឹងទុក ការផលិតវ៉ាក់សាំងអាចចាប់ផ្ដើមនៅពាក់កណ្ដាលឆ្នាំ ២០២២ ។

វ៉ាក់សាំង Baiya ផ្សំពីថ្នាំជក់ ដែលបង្កើតឡើងដោយហ្សែន ដើម្បីបង្កឲ្យមានការឆ្លើយតបនៃប្រព័ន្ធភាពស៊ាំប្រឆាំងនឹងកូវីដ១៩ ។

ក្រុមហ៊ុនមានគម្រោងផលិតវ៉ាក់សាំងនៅរោងចក្រផលិតវ៉ាក់សាំង ដែលមានមូលដ្ឋាននៅអាស៊ីដំបូងគេ ដែលមានទីតាំងនៅសាកលវិទ្យាល័យជូឡាឡុងកន (Chulalongkorn)។

លោកស្រីWaranyu ក៏បានបង្ហាញផងដែរថា Baiya Phytopharm អាចកែសម្រួលរូបមន្តសម្រាប់វ៉ាក់សាំងការពារជំនាន់ទី ២ របស់ខ្លួន ដើម្បីប្រយុទ្ធប្រឆាំងនឹងវីរុសបំប្លែងខ្លួន ដែលកំពុងរាតត្បាតដូចជា Delta ដែលជាសំពាធលេចធ្លោនៅក្នុងប្រទេសថៃ។ ទោះយ៉ាងណាក៏ដោយ ក្រុមហ៊ុននឹងពិនិត្យមើលលទ្ធផលនៃការសាកល្បងមនុស្សដំណាក់កាលទី ១ មុននឹងសម្រេចចិត្តថាតើត្រូវកែទម្រង់ប្រព័ន្ធឬយ៉ាងណា។

សូមបញ្ជាក់ថា Baiya គឺជាវ៉ាក់សាំងកូវីដ មួយក្នុងចំណោម ៤ ដែលកំពុងត្រូវបានបង្កើតឡើងនៅក្នុងប្រទេសថៃ។ ដោយឡែកថៃបាននឹងកំពុងសាកល្បងលើវ៉ាក់សាំង ChulaCov19 របស់សាកលវិទ្យាល័យជូឡាឡុងកន (ការសាកល្បងមនុស្សដំណាក់កាលទី ២) ក្រុមហ៊ុន HXP-GPO Vac របស់អង្គការឱសថនិងវ៉ាក់សាំងបាញ់ច្រមុះរបស់ Biotech ៕

ប្រែសម្រួល៖ សាង ស្រីល័ក្ខ

ប្រភព៖nationthailand

ចុចអាន៖ថៃ នឹងប្រើរូបមន្តចាក់វ៉ាក់សាំង ៥ ផ្សេងគ្នា ដើម្បីពន្លឿនយុទ្ធនាការបង្កើនភាពស៊ាំទូទាំងប្រទេស

ចុចអាន៖ថៃ ទើបរកឃើញរោគសញ្ញាថ្មីមួយទៀត កើតចំពោះអ្នកជាសះស្បើយពីកូវីដ ១៩

ចុចអាន៖វ៉ាក់សាំង ថៃ នឹងដាក់ដំណើរការនៅខែមេសា ក្រោយបង្ហាញប្រសិទ្ធភាពខ្លាំង លើវីរុសបំប្លែងខ្លួន ៤ ប្រភេទ ជាពិសេស Delta

The post Baiya វ៉ាក់សាំងកូវីដទី៤ ដែលផលិតនៅថៃ ចាប់ផ្ដើមសាកល្បងលើមនុស្សលើកទី ១ នៅខែនេះ appeared first on Kampuchea Thmey Daily.

វ៉ាក់សាំង ថៃ នឹងដាក់ដំណើរការនៅខែមេសា ក្រោយបង្ហាញប្រសិទ្ធភាពខ្លាំង លើវីរុសបំប្លែងខ្លួន ៤ ប្រភេទ ជាពិសេស Delta

សាង ស្រីល័ក្ខ — Tue, 31 Aug 2021 06:53:02 +0000

ក្រុមអ្នកស្រាវជ្រាវនៅសាកលវិទ្យាល័យ ជូឡាឡុងកន (Chulalongkorn) បានដាក់ដំណើរការសាកល្បងមនុស្សលើកទី ២ លើវ៉ាក់សាំង Chula-Cov19 mRNA បន្ទាប់ពីដំណាក់កាលទី ១ បានបង្កើនអង់ទីគ័ររបស់អ្នកស្ម័គ្រចិត្តប្រឆាំងនឹងវីរុសកូវីដ ១៩ ។

សាកលវិទ្យាល័យជូឡាឡុងកន បាននិយាយថា វ៉ាក់សាំងនេះបានបង្ហាញថាមានប្រសិទ្ធភាពប្រឆាំងនឹងវីរុសទាំង ៤ នៅដំណាក់កាលទី ១ ហើយត្រូវបានរំពឹងថា នឹងចុះបញ្ជីដោយរដ្ឋបាលចំណីអាហារនិងឱសថថៃ (FDA) នៅខែ មេសា ឆ្នាំក្រោយនេះ។

លោកវេជ្ជបណ្ឌិត Kiat Ruxrungtham នាយកកម្មវិធីអភិវឌ្ឍនៃវ៉ាក់សាំង Chula-Cov19 mRNA និងជាស្ថាបនិកមជ្ឈមណ្ឌលស្រាវជ្រាវវ៉ាក់សាំងនេះ បាននិយាយថា“ វ៉ាក់សាំង Chula អាចបង្កឲ្យមានការឆ្លើយតបរបស់អង់ទីគ័រដ៏ខ្លាំងក្លា និងល្អដូច Pfize ដែរ” ។

ដោយឡែកកាលពីថ្ងៃសៅរ៍ ក្រុមអ្នកស្រាវជ្រាវបានប្រកាសលទ្ធផល “ ពេញចិត្ត” ពីការសាកល្បងលើកដំបូងលើអ្នកស្ម័គ្រចិត្ត ៧២ នាក់ អាយុ ១៨-៥៥ និង អាយុ ៦៥-៧៥ ឆ្នាំ។

បន្ទាប់ពីត្រូវបានចាក់វ៉ាក់សាំង mRNA អ្នកស្ម័គ្រចិត្តដំណាក់កាលទី ១ បានបង្កើតការការពារ ៩៤ ភាគរយប្រឆាំងនឹងរោគសញ្ញាកូវីដ ជាមួយនឹងការធ្វើឲ្យអង់ទីគ័រកើនឡើងកាន់តែខ្ពស់។ វ៉ាក់សាំងនេះក៏បានជួយជំរុញប្រព័ន្ធភាពស៊ាំ T-cell ដែលជួយសម្លាប់មេរោគនៅក្នុងកោសិការបស់មនុស្សដែលឆ្លងមេរោគ។

ថៃក៏បានបញ្ជាក់ថា វ៉ាក់សាំង Chula-Cov19 mRNA មានប្រសិទ្ធភាពប្រឆាំងនឹងវីរុសកូវីដទម្រង់ដើម ក៏ដូចជាវីរុសបំប្លែងខ្លួនសំខាន់ៗចំនួន ៤ ដែលកំពុងមានវត្តមាននៅក្នុងប្រទេស គឺ Alpha, Beta, Gamma និង Delta។ ហើយបច្ចុប្បន្ន វីរុសបំប្លែងខ្លួនទាំង ៤ នេះ មានចំនួនជាង ៩០ ភាគរយ នៃការឆ្លងថ្មីនៅក្នុងប្រទេសថៃ៕

ប្រែសម្រួល៖ សាង ស្រីល័ក្ខ

ប្រភព៖nationthailand

ចុចអាន៖សាកលវិទ្យាល័យមួយរបស់ថៃនឹងចាប់ផ្ដើមសាកល្បងវ៉ាក់សាំងកូវីដរបស់ខ្លួនលើមនុស្ស

ចុចអាន៖ថៃ ប្រាប់អ្នកជំងឺមហារីកគួរចាក់វ៉ាក់សាំងឲ្យលឿនបំផុត ចៀសវាងផលវិបាកពីការឆ្លងកូវីដ ឬវីរុសបំប្លែងខ្លួន

The post វ៉ាក់សាំង ថៃ នឹងដាក់ដំណើរការនៅខែមេសា ក្រោយបង្ហាញប្រសិទ្ធភាពខ្លាំង លើវីរុសបំប្លែងខ្លួន ៤ ប្រភេទ ជាពិសេស Delta appeared first on Kampuchea Thmey Daily.

ថៃ ប្រាប់អ្នកជំងឺមហារីកគួរចាក់វ៉ាក់សាំងឲ្យលឿនបំផុត ចៀសវាងផលវិបាកពីការឆ្លងកូវីដ ឬវីរុសបំប្លែងខ្លួន

សាង ស្រីល័ក្ខ — Tue, 31 Aug 2021 02:30:23 +0000

អ្នកជំងឺមហារីកត្រូវបានចាត់ថ្នាក់ថាមានហានិភ័យខ្ពស់ នៃផលវិបាកពីការឆ្លងកូវីដ ១៩ ឬវីរុសបំប្លែងខ្លួនគ្រប់ប្រភេទ។ ជាពិសេសវ៉ាក់សាំងគួរតែចាក់ឲ្យបានឆាប់ តាមដែលអាចធ្វើទៅបានចំពោះក្រុមនេះជាងគេ។

វេជ្ជបណ្ឌិត Thanut Kuaycharoenpanich នាយកមន្ទីរពេទ្យ Chiwamitra នៃផ្នែកមហារីកបាននិយាយអំពីការចាក់វ៉ាក់សាំងដល់អ្នកជំងឺមហារីកដែល NCCN (បណ្ដាញមជ្ឈមណ្ឌលជាតិទូលំទូលាយ) ថ្មីៗនេះបានផ្ដល់នូវគោលការណ៍ណែនាំចុងក្រោយ ស្ដីពីបញ្ហានេះដោយផ្ដល់ដំបូន្មានដល់អ្នកជំងឺមហារីកដែលមានហានិភ័យខ្ពស់ នៃផលវិបាកពីការឆ្លងកូវីដ និងវីរុសបំប្លែងខ្លួនគ្រប់ប្រភេទ ។ រួមទាំងអ្នកថែទាំ និងអ្នកដែលនៅជិតអ្នកជំងឺ ត្រូវចាក់វ៉ាក់សាំងភ្លាមៗ ឬឲ្យបានឆាប់តាមដែលអាចធ្វើទៅបាន ហើយវ៉ាក់សាំងទាំងអស់ដែលមាននាពេលបច្ចុប្បន្ន មិនគួររង់ចាំវ៉ាក់សាំងជាក់លាក់ណាមួយឡើយ។

អ្នកជំងឺមហារីករួមទាំងអ្នកដែលកំពុងដំណើរការព្យាបាលជំងឺមហារីក មានហានិភ័យខ្ពស់ក្នុងការឆ្លងជំងឺកូវីដ -១៩ និងវីរុសបំប្លែងខ្លួនគ្រប់ប្រភេទ។ ដូច្នេះសូមកុំរង់ចាំវ៉ាក់សាំងពិសេសណាមួយ ហើយគួរតែចាក់វ៉ាក់សាំងដែលមានជាបន្ទាន់។ យោងតាមគោលការណ៍ណែនាំរបស់ NCCN អ្នកជំងឺមហារីកដែលកំពុងទទួលការព្យាបាលដោយប្រើគីមី ឬកំពុងទទួលការព្យាបាលដោយថ្នាំ និងការព្យាបាលដោយកាំរស្មី អាចទទួលបានវ៉ាក់សាំង ឲ្យបានឆាប់បំផុត លើកលែងតែអ្នកជំងឺមហារីកដែលទទួលការប្ដូរកោសិកាដើម និងការព្យាបាលដោយភាពស៊ាំ គួរតែរង់ចាំយ៉ាងហោចណាស់ ៣ ខែ បន្ទាប់ពីការព្យាបាល ដើម្បីទទួលវ៉ាក់សាំង។ ។

លោកវេជ្ជបណ្ឌិតបន្ថែមថា ផលប៉ះពាល់និងប្រតិកម្មមិនល្អពីការចាក់វ៉ាក់សាំងការពារជំងឺកូវីដ ចំពោះអ្នកជំងឺមហារីកត្រូវបានគេរកឃើញថា មិនខុសពីរោគសញ្ញាដែលកើតមានចំពោះមនុស្សទូទៅដូចជា ការចុកដៃ អស់កម្លាំង គ្រុនញាក់ ឈឺក្បាល ក្តៅខ្លួន និងអាឡ័កស៊ីពីវ៉ាក់សាំងជាដើម៕

ប្រែសម្រួល៖ សាង ស្រីល័ក្ខ

ប្រភព៖Sanook

ចុចអាន៖ថៃ ត្រៀមរស់នៅជាមួយជំងឺកូវីដ ១៩ ពេលបើកព្រំដែនរបស់ខ្លួនឡើងវិញ

The post ថៃ ប្រាប់អ្នកជំងឺមហារីកគួរចាក់វ៉ាក់សាំងឲ្យលឿនបំផុត ចៀសវាងផលវិបាកពីការឆ្លងកូវីដ ឬវីរុសបំប្លែងខ្លួន appeared first on Kampuchea Thmey Daily.

Mak Prin រួមគ្នាជាមួយអ្នកគាំទ្រ ធ្វើប្រអប់សម្ភារ ចែកជូនដល់អ្នកជំងឺកូវីដ និងបុគ្គលិកជួរមុខទាំងអស់

សាង ស្រីល័ក្ខ — Sat, 28 Aug 2021 04:48:08 +0000

តារាសម្តែងប្រុសប្រចាំប៉ុស្តិ៍លេខ ៣ ថៃ Mak Prin Suparat បានរួមគ្នាជាមួយអ្នកគាំទ្ររបស់លោក ធ្វើប្រអប់សម្ភារចែកជូនអ្នកជំងឺកូវីដ ១៩ និងបុគ្គលិកជួរមុខទាំងអស់។

គួរបញ្ជាក់ថា ក្រោយផ្ទុះរាតត្បាតនេះម្ដងទៀត ថៃជួបនៅបញ្ហាជាច្រើនទាំងសម្ភារវិជ្ជសាស្ត្រ និងរបស់ប្រើប្រាស់ផ្សេងៗ។ ឃើញដូចនេះតារាប្រុសស្រីគ្រប់គ្នា បានងាកមកធ្វើសប្បុរសធម៌តាមសមត្ថភាព និងកម្លាំងដែលមានរៀងៗខ្លួន។

ជាក់ស្ដែង កាលពីថ្មីៗនេះ តារាសម្តែងប្រុសសង្ហាលោក Mak Prin Suparat និងអ្នកគាំទ្រផ្ទះ Mak Pantip បានរួមគ្នារៃអង្គាសប្រាក់ ដើម្បីទិញរបស់របរចាំបាច់ដូចជាឧបករណ៍ PPE អាល់កុល ម៉ាស់ មួក ស្រោមជើង ស្រោមដៃ ថ្នាំដុសធ្មេញ សាប៊ូដុសខ្លួន សាប៊ូបោកខោអាវ កន្សែងពោះគោ ទឹកលាងចាន ដើម្បីយកទៅប្រគល់ឲ្យអ្នកជំងឺកូវីដនៅក្នុងមន្ទីរពេទ្យ។ ជាពិសេសរួមទាំងបុគ្គលិកនិងអ្នកស្ម័គ្រចិត្ត មកពីទីភ្នាក់ងារដែលជួយប្រជាជនក្នុងវិបត្តិនេះ មាន ៧កន្លែងផ្សេងគ្នា។

លោកបាននិយាយថា“ ជំងឺរាតត្បាតកូវីដ -១៩ នេះពិតជាធ្ងន់និងមានរយៈពេលយូរ ដូច្នេះខ្ញុំនិងអ្នកគាំទ្រចង់ក្លាយជាកម្លាំងសម្រាប់ក្រុមគ្រូពេទ្យ គិលានុបដ្ឋយិការ បុគ្គលិកស្ម័គ្រចិត្ត និងក្រុមឈរជើងនៅគ្រប់ភ្នាក់ងារដែលលះបង់កម្លាំងកាយចិត្ត ខិតខំធ្វើការដើម្បីយើងទាំងអស់គ្នាជាជនជាតិថៃ។ តាមរយៈការបញ្ជូនសំភារៈចាំបាច់ដល់អ្នក ខ្ញុំសង្ឃឹមថា វានឹងមានប្រយោជន៍ ជួយបំពេញបន្ថែមកម្លាំងរបស់អ្នករាល់គ្នា។

ខណៈពេលវាគ្រាន់តែជាអ្វីបន្តិចបន្តួច ដែលយើងអាចធ្វើបាននៅពេលនេះ យើងកំពុងធ្វើវាដោយយកចិត្តទុកដាក់ ជំនួសឲ្យការដឹងគុណពីដួងចិត្តរបស់បងប្អូនប្រុសស្រីថៃទាំងអស់ សូមអញ្ជើញមកចុះ។ យើងទាំងអស់គ្នានឹងប្រយុទ្ធជាមួយគ្នា ជួយចែករំលែកនិងបន្តការគាំទ្ររបស់យើង ដើម្បីឆ្ពោះទៅមុខជាមួយគ្នានេះ”៕

ប្រែសម្រួល៖ សាងស្រីល័ក្ខ

ប្រភព៖Sanook

ចុចអាន៖Mike បរិច្ចាគរបាំងមុខនិងម៉ាស១១,០០០ កេស ដល់មន្ទីរពេទ្យជួបការលំបាក ដោយសារកូវីដនៅ ថៃ

ចុចអាន៖អស់ពីបរិច្ចាគនិងជួយ Min បើកមីនីម៉ាតចល័ត ផ្ដល់អាហារហូបចុកឥតគិតថ្លៃដល់ជនរងគ្រោះដោយកូវីដ

The post Mak Prin រួមគ្នាជាមួយអ្នកគាំទ្រ ធ្វើប្រអប់សម្ភារ ចែកជូនដល់អ្នកជំងឺកូវីដ និងបុគ្គលិកជួរមុខទាំងអស់ appeared first on Kampuchea Thmey Daily.

អស់ពីបរិច្ចាគនិងជួយ Min បើកមីនីម៉ាតចល័ត ផ្ដល់អាហារហូបចុកឥតគិតថ្លៃដល់ជនរងគ្រោះដោយកូវីដ

សាង ស្រីល័ក្ខ — Tue, 24 Aug 2021 06:53:03 +0000

តារាសំដែងស្រី Min Peachya ធ្លាប់បាននិយាយថា ” សូមឲ្យយើងក្លាយជាផ្នែកតូចមួយ នៃការជួយមនុស្សជាមួយគ្នា តាមដែលយើងអាចធ្វើបាន ” ។

នេះជាសំដី របស់ Min ដែលតែងតែចុះជួយនិងបរិច្ចាគទៅកាន់ជនរងគ្រោះសោយសារកូវីដ ១៩។ កាលពីមុននាងបានព្យាយាមជួយអ្នកភូមិដែលខ្វះខាត តាមរយៈការនាំយកស្បៀងអាហារនិងការផ្គត់ផ្គង់ទៅតំបន់នោះ ហើយថ្មីៗនេះបានចាប់ផ្ដើមគម្រោងថ្មីមួយដែលធំជាងមុន ដោយធ្វើមីនីម៉ាតចល័តដល់សាធារណជនខ្វះស្បៀងចូលយកដោយឥតគិតថ្លៃ។

តារាស្រីនិយមដើរតួឯកម្នាក់នេះ នៅតែបន្តចែករំលែកដល់អ្នកខ្វះខាតអាហារនិងសំភារៈផ្សេងៗ តាមដែលខ្លួនធ្វើបាន។ ខណៈនៅប្រទេសថៃកំពុងជួបរលករាតត្បាតដ៏ធំ រហូតខ្វះខាតទាំងគ្រឿងវិជ្ជសាស្រ្ត និងរបស់ហូបចុកជាដើម។

Min Peachya បានបង្ហោះរូបភាពរបស់នាងនិងមីនីម៉ាតទៅក្នុងបណ្ដេញសង្គមជាមួយសារថា ” ការផ្ដល់អំណោយឥតគិតថ្លៃដល់សហគមន៍ ដែលជាគម្រោងដែលខ្ញុំចង់បង្កើត បន្ទាប់ពីការចែកចាយអាហារ និងសម្ភារប្រើប្រាស់ទូទៅ។ ដោយមើលឃើញមនុស្សដែលមានបញ្ហាថា គាត់មិនត្រូវការតែប្រអប់បាយទេ។ ផ្ទះខ្លះមានអ្នកជំងឺត្រូវការថ្នាំសង្កូវ ផ្ទះខ្លះមានកូនពួកគេត្រូវការទឹកដោះគោ។ មនុស្សខ្លះបាត់បង់ការងារ មិនមានលុយដើម្បីសាប៊ូ ឬថ្នាំដុសធ្មេញ។ Min គិតថា ប្រសិនបើគាត់រើសអ្វីដែលគាត់ត្រូវការនៅពេលយើងបរិច្ចាគ អ្វីមួយវានឹងជួយបានច្រើននៅនឹងកន្លែងតែម្ដង។

Min និងអ្នកគ្រប់គ្រងបានបង្កើតគំនិតនេះឡើង ដើម្បីជួយមនុស្សបំពេញតម្រូវការរបស់មនុស្សដែលកំពុងខ្វះខាតខ្លាំងក្នុងវិបត្តិកូវីដ។ នាងបានហៅឡាននេះថា Min-ni-Mart ដែលអាចជួយមនុស្សដែលមានបញ្ហានាពេលឥឡូវនេះ។

អ្នកគាំទ្របានចុច ឡាច និងស៊ែរហើយបញ្ចេញមតិសរសើរដល់តារាស្រីរូបនេះនិងក្រុមការងារយ៉ាងខ្លាំង៕

ប្រែសម្រួល៖ សាង ស្រីល័ក្ខ

ប្រភព៖Sanook

ចុចអាន៖Min ផ្អាកសិល្បៈមួយឡែក ដើរចែកចាយម៉ាសតាមផ្លូវលែងខ្លាច ខណៈករណីកូវីដនៅ ថៃ កើនឡើងរាល់ថ្ងៃ

ចុចអាន៖អស់ពីបរិច្ចាគ ! Min ស៊ូលះបង់ស្លៀកឈុត PPE ចុះចែកអាហារដល់ជនអនាថា រងគ្រោះដោយកូវីដម្ដង

The post អស់ពីបរិច្ចាគនិងជួយ Min បើកមីនីម៉ាតចល័ត ផ្ដល់អាហារហូបចុកឥតគិតថ្លៃដល់ជនរងគ្រោះដោយកូវីដ appeared first on Kampuchea Thmey Daily.

ប្រកាសថ្ងៃនេះ ថៃ នៅតែរកឃើញករណីកើនឡើងខ្ទង់ម៉ឺន និងស្លាប់ ២៦១នាក់ ត្រឹម ២៤ ម៉ោងចុងក្រោយ

សាង ស្រីល័ក្ខ — Sat, 21 Aug 2021 07:32:37 +0000

ក្រសួងសុខាភិបាលថៃបានរាយការណ៍នៅថ្ងៃសៅរ៍នេះថា មានអ្នកស្លាប់ចំនួន ២៦១ នាក់បន្ថែមទៀត និងករណីឆ្លងថ្មីចំនួន ២០,៥៧១ ក្នុងរយៈពេល ២៤ ម៉ោងចុងក្រោយនេះ។

ក្នុងចំណោមករណីឆ្លងថ្មីមានករណីចំនួន ២០,៣៣៦ ជាប្រជាជនទូទៅ និង ២៣៥ ជាអ្នកទោសក្នុងពន្ធនាគារ។ ហើយក្នុងរយៈពេល ២៤ ម៉ោងចុងក្រោយនេះ អ្នកជំងឺកូវីដចំនួន ២៣,១៥៩ នាក់ត្រូវបានអនុញ្ញាតឲ្យចាកចេញពីមន្ទីរពេទ្យ។

ចាប់តាំងពីការផ្ទុះរលកទី ៣ នៅថ្ងៃទី ១ ខែ មេសា មកវិបត្តិនៃកូវីដបានចាប់ផ្ដើមកើនឡើងនៃចំនួនអ្នកជំងឺកូវីដ ចំនួន ១,០០១,៤១៨ នាក់ ក្នុងនោះ ៧៩១,៥៣៨ នាក់បានជាសះស្បើយ។

ទន្ទឹមនោះចាប់តាំងពីជំងឺរាតត្បាតបានចាប់ផ្តើមនៅដើមឆ្នាំមុន មានករណីឆ្លងជំងឺកូវីដចំនួន ១,០៣០,២៨១ ករណី ក្នុងនោះមាន ៨១៩,១៨៣ នាក់បានជាសះស្បើយ។

ដោយឡែកចំនួនអ្នកស្លាប់មាន ៨,៩៩៣ នាក់នៅក្នុងរលកទី ៣ និង ៩,០៨៧ នាក់ ចាប់តាំងពីការផ្ទុះឡើងនៃជំងឺរាតត្បាតកាលពីដើមឆ្នាំមុន។

គួរបញ្ជាក់ថា ករណីឆ្លងជំងឺកូវីដប្រចាំថ្ងៃខ្ពស់បំផុតមានចំនួន ២៣,៤១៨ នាក់ ត្រូវបានរាយការណ៍កាលពីថ្ងៃទី ១៣ ខែ សីហា ហើយចំនួនអ្នកស្លាប់ប្រចាំថ្ងៃថ្មីខ្ពស់បំផុតគឺ ៣១២ នាក់ ត្រូវបានរាយការណ៍កាលពីថ្ងៃទី ១៨ ខែ សីហា៕

ប្រែសម្រួល៖ សាង ស្រីល័ក្ខ

ប្រភព៖Bankokpost

ចុចអាន៖ថៃ ហាមប្រជាជនកុំបាញ់អាកុលចូលក្នុងអាហារ គឺមិនជួយកាត់បន្ថយហានិភ័យនៃការឆ្លងកូវីដទេ

ចុចអាន៖ថៃ នឹងយកវ៉ាក់សាំង Pfizer ចាក់ឲ្យស្ត្រីមានផ្ទៃពោះ កុមារ និងអ្នកមានជំងឺរ៉ាំរ៉ៃ ៧ ប្រភេទក្នុងថ្ងៃតែមួយ

The post ប្រកាសថ្ងៃនេះ ថៃ នៅតែរកឃើញករណីកើនឡើងខ្ទង់ម៉ឺន និងស្លាប់ ២៦១នាក់ ត្រឹម ២៤ ម៉ោងចុងក្រោយ appeared first on Kampuchea Thmey Daily.