ព័ត៌មានអន្ដរជាតិ

ថៃ ទើបរកឃើញរោគសញ្ញាថ្មីមួយទៀត កើតចំពោះអ្នកជាសះស្បើយពីកូវីដ ១៩

បានផុស

៤ years មុន

នៅ

ថ្ងៃព្រហស្បតិ៍ ២ កញ្ញា ២០២១

ដោយ

អ្នកជំនាញខាងផ្លូវដង្ហើមនៅទីក្រុងបាងកកបាននិយាយថា សក់ជ្រុះគឺជារោគសញ្ញាថ្មីមួយ ដែលត្រូវបានគេរកឃើញថា កំពុងជះឥទ្ធិពលដល់មនុស្សដែលបានជាសះស្បើយពីកូវីដ ១៩។

ទោះយ៉ាងណា អ្នកជំនាញក៏បាននិយាយដែរថា មនុស្សដែលបានជាសះស្បើយពីកូវីដ មិនគួរព្រួយបារម្ភឡើយព្រោះសក់នឹងឈប់ជ្រុះក្នុងរយៈពេល ៤ ខែ ហើយនៅទីបំផុតនឹងដុះមកវិញបានពេញលេញ។

វេជ្ជបណ្ឌិត Manoon Leechawengwongs អ្នកជំនាញខាងជំងឺស្ទះសួត នៅមន្ទីរពេទ្យ Vichaiyut បាននិយាយនៅលើហ្វេសប៊ុកថា អ្នកជំងឺកូវីដជាច្រើនបានចាប់ផ្ដើមជ្រុះសក់ ២ ទៅ ៣ ខែ បន្ទាប់ពីការជាសះស្បើយ។ វេជ្ជបណ្ឌិតបានពន្យល់ថា បញ្ហាជ្រុះសក់នេះមិនមែនបណ្ដាលមកពីវីរុសផ្ទាល់នោះទេ ប៉ុន្តែជាផលវិបាកនៃការក្ដៅខ្លួន ស្ត្រេស និងថប់បារម្ភ។

លោកបានលើកឡើងពីករណីស្ត្រីអាយុ ៦៥ ឆ្នាំម្នាក់ ដែលបានជាសះស្បើយពីជំងឺកូវីដ ១៩ បន្ទាប់ពីសម្រាកនៅមន្ទីរពេទ្យ ២ សប្ដាហ៍។ បន្ទាប់ពីរខែកន្លះ ក្រោយជាសះស្បើយ ស្ត្រីរូបនេះបានរកឃើញថាខ្លួននាងជ្រុះសក់ជាចង្កោម ( នេះបានបន្តប្រហែល ២ ខែ)។ ចំណែកកូនស្រីរបស់ស្ត្រីដែលបានឆ្លងជំងឺកូវីដ ក៏ជួបប្រទះបញ្ហាស្រដៀងគ្នានេះដែរ ប៉ុន្តែមានកម្រិតទាបជាង។

លោកវេជ្ជបណ្ឌិតបានបន្ថែមទៀតថា ” មនុស្សជាធម្មតាបាត់បង់សក់ប្រហែល ១០០ ក្នុងមួយថ្ងៃ ប៉ុន្តែបន្ទាប់ពីការជាសះស្បើយពី ២ ទៅ ៣ ខែ ពួកគេអាចបាត់បង់រហូតដល់ទៅ ៣០០ សរសៃក្នុងមួយថ្ងៃ ហើយបញ្ហានេះអាចមានរយៈពេល ៦ ខែ។ សក់ភាគច្រើននឹងដុះមកវិញបន្តិចម្តងៗ ហើយអ្នកជំងឺគួរតែមានសក់ពេញក្បាល ក្នុងរយៈពេលពី ៦ ទៅ ៩ ខែ។ ខ្ញុំសូមអំពាវនាវដល់អ្នកជំងឺកុំភ័យស្លន់ស្លោ ព្រោះការបាត់បង់សក់ នឹងឈប់ក្នុងរយៈពេល ៤ ខែ ហើយអ្វីៗនឹងវិលមកធម្មតាវិញក្នុងពេលឆាប់ៗនេះ ” ៕

ប្រែសម្រួល ៖ សាង ស្រីល័ក្ខ

ប្រភព៖nationthailand

ចុចអាន៖វ៉ាក់សាំង ថៃ នឹងដាក់ដំណើរការនៅខែមេសា ក្រោយបង្ហាញប្រសិទ្ធភាពខ្លាំង លើវីរុសបំប្លែងខ្លួន ៤ ប្រភេទ ជាពិសេស Delta

ចុចអាន៖ថៃ ប្រាប់អ្នកជំងឺមហារីកគួរចាក់វ៉ាក់សាំងឲ្យលឿនបំផុត ចៀសវាងផលវិបាកពីការឆ្លងកូវីដ ឬវីរុសបំប្លែងខ្លួន

ចុចអាន៖មិនថាធ្ងន់ស្រាល ក្រោយជាពីកូវីដហាមដាច់ខាតប្រើរាងកាយធ្វើរឿងទាំងនេះ ប្រយ័ត្នពិបាកខ្លួន