កូនប្រុសច្បង CR7 អាយុទើប ១២ឆ្នាំ រកប្រាក់បានខ្ទង់លានដុល្លារ

ចំពោះអ្នកគាំទ្រវិស័យបាល់ទាល់ទាត់ ច្បាស់ណាស់នរណាក៏ស្គាល់កីឡាករ Cristiano Ronaldo ដែរ។ លោកត្រូវបានមហាជនចាត់ទុកជា អធិរាជ ក្នុងពិភពកីឡាបាល់ទាត់ ជាមួយនឹងរូបភាពតំណាងនៃអាវលេខ 7 ឬ CR7។

ដោយសារភាពល្បីល្បាញដ៏ខ្លាំងក្លា ខ្សែជីវិតរបស់ CR7 ត្រូវបានអ្នកកាសែតតាមប្រមាញ់ព័ត៌មាន ក៏ដូចជាតាមដានជីវិតឯកជន មិនសូវលោះពេលឡើយ។ ក្នុងនោះដែរ សមាជិកគ្រួសាររបស់កីឡាកររូបនេះ ក៏ត្រូវទស្សនិកចាប់អារម្មណ៍ខ្លាំងដូចគ្នា។

ទន្ទឹមគ្នានេះ កូនប្រុសច្បងរបស់ CR7 ត្រូវមហាជនងាកមកចាប់ភ្លឹក មិនចាញ់ពីឪពុកនោះទេ។ Cristiano Ronaldo Junior ត្រូវបានគេរំពឹងថានឹងក្លាយជាជើងឯកបន្តវេនពីឪពុក ដោយសារទេពកោសល្យ និងសមត្ថភាពរបស់គេ​មានឈ្មោះបោះសំឡេង តាំងពីគេអាយុ ១០ឆ្នាំមកម្ល៉េះ។ ហើយគិតមកដល់ឆ្នាំ២០២២នេះ Ronaldo Jr មានសមត្ថភាពរកលុយបានជាង ១លានដុល្លារបាត់ទៅហើយ។

ក្មេងប្រុសជំទង់រូបនេះ បានបង្ហាញខ្លួនជាសាធារណៈលើកដំបូង កំលុងពេលឪពុកនាំទៅចូលរួមព្រឹត្តិការណ៍ទទួលពានរង្វាន់បាល់មាស កាលពីឆ្នាំ ២០១៥។ ចាប់ពីពេលនោះមក Ronaldo Jr បានធំឡើងក្រោមក្រសែភ្នែករាប់លានតាមមើលពីគ្រប់ទិសទី។

ទោះបីជា CR7 មិនបានតម្រង់ទិសកូនប្រុសឱ្យដើរតាមគន្លងរបស់ខ្លួនក៏ដោយ ប៉ុន្តែដោយស្ថិតក្រោមឥទ្ធិពល និងហ្សែនពីឪពុក កីឡាករវ័យក្មេង Ronaldo Jr បានចូលរួមក្នុងសមរភូមិបាល់ទាត់ ហើយបង្ហាញទេពកោសល្យដ៏ល្អទៅកាន់ទស្សនិក។ ក្នុងរដូវកាលឆ្នាំ ២០២០ គេធ្លាប់ស៊ុតបញ្ចូលទីបាន ៥៨គ្រាប់ ក្នុង ២៣ ប្រកួត។ ពីពេលនោះមក ពិភពបាល់ទាត់ចាប់ផ្តើមយកចិត្តទុកដាក់ និងដាក់ការចាប់អារម្មណ៍លើឈ្មោះ Ronaldo Jr ព្រោះគេជាគ្រាប់ពូជរបស់អធិរាជបាល់ទាត់ និងអាចជំនួសតំណែង Cristiano Ronaldo នាពេលអនាគត។

នៅលើទីលានប្រកួត Ronaldo Jr បញ្ចេញសមត្ថភាពជាមួយនឹងការបញ្ជូនបាល់ដោយជំនួយ ការគ្រប់គ្រងបាល់ប្រកបដោយវិជ្ជាជីវៈ និងស្ទីលគប់បាល់យ៉ាងស្ទាត់ ដូចអ្នកជំនាញ។ ដោយសារមូលហេតុនេះ កីឡាករវ័យ ១២ឆ្នាំ បានឈ្នះពានរង្វាន់អ្នកស៊ុតបញ្ចូលទីវ័យក្មេងល្អបំផុត កាលពីឆ្នាំ២០២០។ លុះមកដល់ដើមឆ្នាំ២០២២ Ronaldo Jr បានចុះកិច្ចសន្យាជាមួយក្លឹប Manchester United ដែលជាការបើកទំព័រថ្មីមួយសម្រាប់អាជីពជាកីឡាករបាល់ទាត់របស់គេ។

យោងតាមការវិភាគរបស់ Fame Ranker ជារៀងរាល់ឆ្នាំ កូនច្បងប្រុស CR7 រូបនេះ អាចរកចំណូលបានជាង ៣៦៣,០០០ដុល្លារអាមេរិក ហើយតាំងពីប្រឡូកក្នុងវិស័យបាល់ទាត់ រហូតដល់បច្ចុប្បន្ន ទ្រព្យសម្បត្តិរបស់ Ronaldo Jr បានឡើងដល់ ១.២លានដុល្លារអាមេរិក ដែលសុទ្ធសឹងជាប្រាក់រកដោយខ្លួនឯងទាំងអស់៕

ប្រែសម្រួល៖ ​សន្យា

ចុចអាន៖ មក​ដឹងពី​ប្រភពចំណូល​របស់ Cristiano Ronaldo

ចុចអាន៖ ការពិតនានាពី Georgina មិត្តស្រីរបស់ Ronaldo គ្មាននរណាធ្លាប់ខ្វល់ឡើយ