ស្ថិតិទាំងនេះបង្ហាញពី ព័រទុយហ្គាល់ ជោគជ័យខ្លាំង ចាប់តាំងពីមាន​វីរបុរស Ronaldo

ក្រុមជម្រើសជាតិ ព័រទុយហ្គាល់ មានស្ថិតិជោគជ័យខ្លាំង ចាប់តាំងពីមានវត្តមានខ្សែប្រយុទ្ធឆ្នើម Cristiano Ronaldo ខណៈកាលពីយប់មិញត្រូវនឹងយប់រំលងអាធ្រាត្រឈានចូលថ្ងៃ ចន្ទ ទី ៩ ខែ មិថុនា រូបគេទើបតែជួយឱ្យក្រុមបញ្ចខែលលើកពាន UEFA Nations League ជាលើកទី ២ ក្នុងប្រវត្តិសាស្ត្រ។

ក្រុម ព័រទុយហ្គាល់ ដែលស្ថិតក្រោមការដឹកនាំរបស់លោក Roberto Martinez បានក្លាយជាម្ចាស់ពាន Nations League ២០២៤-២៥ ជាផ្លូវការ ក្រោយយកឈ្នះលើក្រុមគោជល់ អេស្ប៉ាញ នៅវគ្គបាល់ប៉េណាល់ទី​កាត់សេចក្តី ១១ ម៉ែត្រក្នុងលទ្ធផល ៥-៣ បន្ទាប់ពីបញ្ចប់ ១២០ នាទីក្រុមទាំង ២ ស្មើគ្នា ២-២។

អេស្ប៉ាញ បើក​ការ​នាំ​មុខ ១-០ នៅ​នាទី ​២១​ ដោយ​កីឡាករ Martin Zubimendi ប៉ុន្តែ​ត្រូវ​បាន​ ព័រទុយហ្គាល់​ តាម​ស្មើ ១-១ នៅ​នាទី​ទី​ ២៦ ដោយ​កីឡាករ Nuno Mende។ ចុង​វគ្គ​ទី​១ អេស្ប៉ាញ បានបើកការនាំមុខ ព័រទុយហ្គាល់ ជា​ថ្មី​ ដែលជាការស៊ុតបញ្ចូលទីដោយកីឡាករ Mikel Oyarzabal នៅនាទីទី ៤៥ ប៉ុន្តែនៅនាទីទី ៦១ ព័រទុយហ្គាល់ បានតាមស្មើ ២-២ វិញ ដែលរកបានដោយប្រធានក្រុម Ronaldo ហើយគ្រាប់បាល់នេះក៏បានបន្តរហូតដល់ចប់ការប្រកួត ១២០ នាទីពេញ។

ចំពោះជ័យជម្នះដ៏ធំធេងនេះ Ronaldo បច្ចុប្បន្នត្រូវបានគេចាត់ទុកជាវីរបុរសដ៏អស្ចារ្យបំផុតប្រចាំប្រវត្តិសាស្ត្រ ព័រទុយហ្គាល់ ដោយគាត់បាននាំក្រុមរហស្សនាមបញ្ចខែលមួយនេះ ឱ្យទទួលបានភាពជោគជ័យជាច្រើនលើឆាកអន្តរជាតិ។

លោកអ្នកដឹងទេថា ព័រទុយហ្គាល់ មុនពេលមានវត្តមាន Ronaldo នៅក្នុងក្រុម ពោលរាប់ពីឆ្នាំ ២០០៤ ថយក្រោយ ពួកគេបានឡើងដល់ជុំចុងក្រោយ ជើងឯកពិភពលោក (World Cup) បានត្រឹមតែ ៣ លើកគត់ ហើយនៅក្នុង​ជើង​ឯក​អឺរ៉ុប​ Euro វិញ ពួកគេក៏បានឡើងដល់ជុំចុងក្រោយត្រឹមតែ ៣ លើកដែរ និងពុំដែលបានឈ្នះពានអ្វីទាល់តែសោះ។

ប៉ុន្តែចាប់តាំងពីមានវត្តមាន Ronaldo ពួកគេមិនដែលបាត់មុខពីការប្រកួតក្នុងពាន World Cup និង Euro សូម្បីម្តងឡើយ ដោយពួកគេបានឡើងទៅជុំចុងក្រោយពាន World Cup បានចំនួន ៥ ដង, ពាន Euro បានចំនួន ៦ ដង និងឈ្នះពានធំៗ ៣ ដូចជាពាន Euro ១ និងពាន Nations League ២។

គួរបញ្ជាក់ថា បន្ទាប់ពីឈ្នះពាន Nations League កាលពីយប់មិញ Ronaldo បានសាងនូវកំណត់ត្រាមួយទៀតសម្រាប់ខ្លួនឯង ដោយបានក្លាយជាកីឡាករមានវ័យចំណាស់ជាងគេបំផុតបានឈ្នះពានមួយនេះ ពោលគឺស្ថិតក្នុងវ័យ ៤០ ឆ្នាំ៕

អត្ថបទ៖ សេម កុសល