Ronaldo យល់ព្រមស្នាក់នៅ Al-Nassr ២រដូវកាលទៀត ជាមួយប្រាក់ឈ្នួលបំបែកកំណត់ត្រា

ទីបំផុតខ្សែប្រយុទ្ធឆ្នើម Cristiano Ronaldo បានយល់ព្រមបន្តកិច្ចសន្យាថ្មីជាមួយក្លិប Al-Nassr នៃលីគ Saudi Pro League ហើយ។

នៅថ្ងៃ ព្រហស្បតិ៍ ទី ២៦ ខែ មិថុនា នេះ ក្លិប Al-Nassr បានប្រកាសជាផ្លូវការ ថា Ronaldo បានយល់ព្រមបន្តកិច្ចសន្យាថ្មីរយៈពេល ២ រដូវកាលបន្ថែមទៀត ពោលគឺដល់ខែ មិថុនា ឆ្នាំ ២០២៧ អមជាមួយប្រាក់ពលកម្មបំបែកកំណត់ត្រាប្រចាំលីគកំពូល អារ៉ាប៊ីសាអ៊ូឌីត។

ជុំវិញប្រាក់ពលកម្មថ្មីរបស់ខ្សែប្រយុទ្ធសញ្ជាតិ ព័រទុយហ្គាល់ រូបនេះ ត្រូវបានគេដឹងថា គាត់នឹងក្លាយជាកីឡាករម្នាក់ ដែលមានប្រាក់ពលកម្មថ្លៃបំផុតលើភពផែនដី ពោលគឺនឹងទទួលបាន ១៧.៥ លានដុល្លារអាមេរិកក្នុងមួយខែ ដែលស្មើនឹង ២១៦.៦ លានដុល្លារអាមេរិកក្នុងមួយឆ្នាំ បន្ទាប់ពីបង់ពន្ធរួច។

គួរឱ្យដឹងថា ចាប់តាំងពីចូលរួមជាមួយ Al-Nassr កាលពីខែ មករា ឆ្នាំ ២០២៣ មកដល់បច្ចុប្បន្ន Ronaldo រកបានគ្រាប់បាល់ស៊ុតបញ្ចូលទីបានចំនួន ៩៩ គ្រាប់ក្នុងចំណោមការបង្ហាញខ្លួន ១១១ ប្រកួត។ ប្រធានក្រុមជម្រើសជាតិ ព័រទុយហ្គាល់ នឹងអស់សុពលភាពកិច្ចសន្យាជាមួយក្លិបអ្នកមាន អារ៉ាប៊ីសាអ៊ូឌីត ត្រឹមចុងខែ មិថុនា ឆ្នាំ ២០២៥ នេះហើយ៕

ប្រែសម្រួល៖ សេម កុសល
ប្រភព៖ Transfer Market