បណ្ដេញព្រះរាជអាជ្ញា សុច សុផាន់ណារ៉ា ចេញពីក្របខ័ណ្ឌ គឺមិនពាក់ព័ន្ធរឿងឆបោកតាមអនឡាញទេ

ព្រះរាជអាជ្ញា សុច សុផាន់ណារ៉ា ត្រូវបានបណ្ដេញចេញពីក្របខ័ណ្ឌ គឺមិនជាប់ពាក់ព័ន្ធនឹងរឿងឆបោកតាមអនឡាញឡើយ។ នេះជាការបញ្ជាក់ឱ្យដឹងដោយអ្នកនាំពាក្យក្រសួងយុត្តិធម៌ លោក សេង ឌីណា ប្រាប់កម្ពុជាថ្មី នាថ្ងៃទី១៧ ខែកក្កដានេះ។

លោក សេង ឌីណា បានបញ្ជាក់ថា ករណីលោក សុច សុផាន់ណារ៉ា គឺត្រូវបានក្រុមប្រឹក្សាវិន័យ នៃឧត្តមក្រុមប្រឹក្សានៃអង្គចៅក្រម ប្រជុំសម្រេចតាំងពីមុនមក មុននឹងមានព្រះរាជក្រឹត្យសម្រេចបណ្តេញចេញពីក្របខ័ណ្ឌ ក្រោយរកឃើញថា បានប្រព្រឹត្តខុសវិន័យ។ អ្នកនាំពាក្យអះអាងថា ការបណ្ដេញចេញព្រះរាជអាជ្ញា សុច សុផាន់ណារ៉ា គឺមិនជាប់ពាក់ព័ន្ធនឹងករណីលោក គ្រី សីហា ព្រះរាជអាជ្ញារងខេត្តពោធិ៍សាត់ ហើយក៏មិនពាក់ព័ន្ធនឹងរឿងឆបោកតាមអនឡាញដែរ។

លោក គ្រី សីហា ព្រះរាជអាជ្ញារង នៃអយ្យការអមសាលាដំបូងខេត្តពោធិ៍សាត់ ត្រូវបានឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ សម្រេចផ្អាកមុខងារជាបណ្តោះអាសន្ន តាមបញ្ជារបស់នាយករដ្ឋមន្ត្រី ដើម្បីបើកផ្លូវឱ្យក្រុមអធិការកិច្ច និងស្ថាប័នមានសមត្ថកិច្ចស៊ើបអង្កេត ទាក់ទងនឹងការអនុវត្តច្បាប់ដោយរំលោភបំពាន ក្នុងការដោះលែងជនល្មើសដែលត្រូវបានចាប់ខ្លួនពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា នៅក្នុងខេត្តពោធិ៍សាត់។

អ្នកនាំពាក្យ បញ្ជាក់ឱ្យដឹងដែរថា ចំពោះករណីលោក គ្រី សីហា ក្រសួងយុត្តិធម៌បានចាត់ក្រុមអធិការកិច្ចឱ្យស្រាវជ្រាវលម្អិតលើរឿងនេះហើយ។

គួរជម្រាបថា ព្រះមហាក្សត្រនៃ​កម្ពុជា បានចេញ​ព្រះ​រាជក្រឹត្យ​ត្រាស់​បង្គាប់ដាក់វិន័យ​ដោយ​បណ្ដេញ​ចេញ​ពី​ក្រប​ខ័ណ្ឌ​ព្រះរាជអាជ្ញា​ ចំពោះ​លោក សុច សុផាន់ណារ៉ា ព្រះរាជ​អាជ្ញានៅ​ក្រសួង​យុត្តិធម៌។ ​បើតាមព្រះរាជ​ក្រឹត្យ​ចុះថ្ងៃទី​១៥ ខែកក្កដា ឆ្នាំ២០២៥ ការដាក់វិន័យ​ក្រោម​រូបភាព​បណ្ដេញចេញពីក្របខ័ណ្ឌនេះ គឺធ្វើឡើងតាម​ការទូលថ្វាយ​របស់​លោក កើត រិទ្ធ ឧបនាយករដ្ឋមន្រ្តី រដ្ឋមន្រ្តី​ក្រសួង​យុត្តិធម៌ បន្ទាប់ពី​បាន​ការ​សម្រេច​របស់​ឧត្តម​ក្រុមប្រឹក្សានៃអង្គចៅក្រម នៅថ្ងៃទី​១៤ ខែកក្កដា។

យោងច្បាប់ស្ដីពីលក្ខន្តិកៈនៃចៅក្រម និងព្រះរាជអាជ្ញា មាត្រា៨៩ ការតែងតាំង ផ្លាស់ប្តូរការ ផ្តាច់ពីមុខងារ ការដាក់ឱ្យនៅក្រៅក្របខ័ណ្ឌ ការដាក់ឱ្យនៅទំនេរ និងការលុបឈ្មោះព្រះរាជអាជ្ញាទាំងអស់ គឺធ្វើឡើងដោយឧត្តមក្រុមប្រឹក្សានៃអង្គចៅក្រម លើកសេចក្តីស្នើថ្វាយព្រះមហាក្សត្រ តាមសំណើរបស់រដ្ឋមន្ត្រីក្រសួងយុត្តិធម៌។

ក្នុងករណីដែលព្រះរាជអាជ្ញានោះ កំពុងជាប់ក្នុងនីតិវិធីវិន័យរបស់ក្រុមប្រឹក្សាវិន័យ នៃឧត្តមក្រុមប្រឹក្សានៃអង្គចៅក្រម គឺព្រះរាជអាជ្ញានោះ អាចត្រូវបានផ្អាកពីមុខងារជាបណ្តោះអាសន្នដោយរដ្ឋមន្ត្រីក្រសួងយុត្តិធម៌។ សិនបើក្នុងករណីដែលព្រះរាជអាជ្ញានោះ ទទួលទណ្ឌកម្មជាវិន័យថ្នាក់ទី២ ឬនៅពេលដែលព្រះរាជអាជ្ញានោះបានបោះបង់ការងារ ឬអវត្តមាន លើសពី៣០ថ្ងៃ នោះព្រះរាជអាជ្ញា អាចត្រូវលុបឈ្មោះចេញពីក្របខណ្ឌព្រះរាជអាជ្ញាតែម្ដង។ នេះយោងតាមមាត្រា៩០ នៃច្បាប់ស្ដីពីលក្ខន្តិកៈនៃចៅក្រម និងព្រះរាជអាជ្ញា៕

ដោយ៖ ធឿន វ៉ាន់សុង