ព័ត៌មានជាតិ

តើ «ដាវ» ដែលអគ្គរដ្ឋអាជ្ញារុស្ស៊ីជូនរដ្ឋមន្ត្រីយុត្តិធម៌កម្ពុជាបង្កប់ន័យដូចម្ដេច?

បានផុស

១១ ខែ មុន

នៅ

ថ្ងៃអង្គារ ២៧ ឧសភា ២០២៥

ដោយ

អគ្គរដ្ឋអាជ្ញានៃរដ្ឋសហព័ន្ធរុស្ស៊ីលោក អ៊ីហ្គរ ក្រាស្នូវ (Igor Krasnov) បានជួបពិភាក្សាការងារជាមួយឧបនាយករដ្ឋមន្ត្រី រដ្ឋមន្ត្រីយុត្តិធម៌កម្ពុជាលោក កើត រិទ្ធ កាលពីថ្ងៃទី២៦ ខែឧសភា ឆ្នាំ២០២៥ ដោយបន្ទាប់ពីប្រជុំលោកបានប្រគល់វត្ថុអនុស្សាវរីយ៍ជាដាវស្ពាន់ លាយប្រាក់ដ៏វិចិត្រមួយជូនដល់លោកឧបនាយករដ្ឋមន្ត្រី។

ខុសពីវត្ថុអនុស្សាវរីយ៍ផ្សេងៗដែលប្រគល់ជូនគ្នាទៅវិញទៅមកកន្លងទៅ។ តើដាវមួយនេះមានន័យយ៉ាងណា?

អ្នកនាំពាក្យក្រសួងយុត្តិធម៌លោក សេង ឌីណា បានប្រាប់កម្ពុជាថ្មីថា ពេលដែលប្រគល់ជូនលោកឧបនាយករដ្ឋមន្ត្រី កើត រិទ្ធ អគ្គរដ្ឋអាជ្ញារុស្ស៊ី អ៊ីហ្គរ ក្រាស្នូវ បញ្ជាក់ថា ការប្រគល់ដាវ គឺមានន័យថាជាការការពារ ដែលថាច្បាប់ត្រូវការអ្វីមួយការពារហើយដាវ គឺជានិមិត្តរូបនៃអាវុធការពារការអនុវត្តច្បាប់។

លោកបានបញ្ជាក់យ៉ាងដូច្នេះថា៖ «នៅក្នុងពេលជូនដាវនេះ ឯកឧត្តមអគ្គរដ្ឋអាជ្ញាបានលើកឡើងថា ច្បាប់គឺត្រូវការការការពារ ដូច្នេះឯកឧត្តមជូនដាវជានិមិត្តរូបនៃអាវុធការពារការអនុវត្តច្បាប់»។

ដោយឡែកលោកឧបនាយករដ្ឋមន្ត្រី កើត រិទ្ធ ក៏បានជូនផ្តិលស្ពាន់ជូនលោក អ៊ីហ្គរ ក្រាស្នូវ ផងដែរដែលលោកឧបនាយករដ្ឋមន្ត្រីបញ្ជាក់ថា ផ្តិលជានិមិត្តរូបនៃភាពត្រជាក់ត្រជុំ ដែលមានន័យពីភាពត្រជាក់ត្រជុំនៃទំនាក់ទំនងកិច្ចសហប្រតិបត្តិការកម្ពុជា-រុស្ស៊ី។

នៅក្នុងប្រពៃណីផ្នែកច្បាប់លោកខាងលិច ដាវតំណាងឱ្យយុត្តិធម៌ តំណាងឱ្យអំណាច អាជ្ញាធរ និងអាចត្រូវការដើម្បីអនុវត្តច្បាប់ និងផ្តន្ទាទោសភាពអយុត្តិធម៌។ វាត្រូវបានឃើញនៅជាមួយនឹងស្ត្រីយុត្តិធម៌ Lady Justice ដែលដៃម្ខាងកាន់ជញ្ជីង តំណាងឱ្យយុត្តិធម៌មិនលំអៀង និងម្ខាងទៀតកាន់ដាវដើម្បីអនុវត្តការសម្រេចចិត្ត កាត់បន្ថយឧបសគ្គ ធានាឱ្យបានតម្លាភាព និងកាន់អំណាចនៃយុត្តិធម៌៕

អត្ថបទដោយ ហ៊ុន សិរីវឌ្ឍន៍