អង្គការមួយជួយកសិករបង្កើនប្រាក់ចំណូល បង្កើតទីផ្សារកសិកម្ម នៅកម្ពុជា

អង្គការហេហ្វឺកម្ពុជា បានចូលរួមពង្រឹង និងលើកកម្ពស់ផលិតផលកសិកម្ម និងបង្កើនប្រាក់ចំណូលដល់គ្រួសារកសិករ តាមរយៈការបណ្តុះបណ្តាល និងផ្តល់ទុនវិនិយោគសម្រាប់អនុវត្តសកម្មភាពកសិពាណិជ្ជកម្ម ផ្តោតលើខ្សែច្រវាក់ផលិត​កម្មនៃការចិញ្ចឹមមាន់ស្រែខ្មែរ បន្លែសុវត្ថិភាព​ និងពង្រីកបន្ថែមនូវគម្រោងថ្មីៗនាពេលខាងមុខ។

អង្គការនេះ បានដាក់សម្ពោធឱ្យប្រើប្រាស់«ផ្សារសហគមន៍កសិកម្មកសិករព្រៃវិហារ​»ជាផ្លូវការ ក្នុងក្របខណ្ឌគម្រោង “សហគ្រាសកែច្នៃផលិតផលមាន់ស្រែខ្មែរសម្រាប់មោទកភាពជាតិកម្ពុជា” នៅភូមិចំការដូង ឃុំព្រៃវិហារ ស្រុកគងពិសី ខេត្តកំពង់ស្ពឺ ថ្ងៃទី ២៧ ខែ កក្កដា ឆ្នាំ ២០២២។

លោក ញ៉ែម សារ៉េត នាយកប្រចាំប្រទេសអង្គការហេហ្វឺអន្តរជាតិកម្ពុជា បានលើកឡើងថា គម្រោងកម្មវិធីនឹង​ផ្តល់ប្រយោជន៍ដោយ​ផ្ទាល់​ ដល់គ្រួសារកសិករប្រមាណ​ ១៥១,០៨៩ គ្រួសារ (គិតត្រឹមឆ្នាំ ២០២៦) ក្នុងខេត្តចំនួន ១១ ខេត្ត​ ដែលនឹងអាចបង្កើតប្រាក់​ចំណូល​បានច្រើនសម្រាប់គ្រួសារកសិករ​ និងរួមចំណែកយ៉ាងសំខាន់ដល់ការបង្កើន​ការផ្គត់ផ្គង់ស៊ុតមាន់ កូនមាន់ មាន់យកសាច់ សាច់មាន់កែច្នៃ និងវេចខ្ចប់ មាន់ស្រែខ្មែរនៅក្នុងស្រុក និងការកាត់​បន្ថយការនាំចូលសាច់មាន់ពីប្រទេសជិតខាង។​

លោក ញ៉ែម សារ៉េត បានសង្កត់ធ្ងន់ថា ចាប់តាំងពី ខែ ឧសភា ឆ្នាំ ២០២០មក អង្គការហេហ្វឺអន្តរជាតិកម្ពុជា បានដាក់ចេញ និងអនុវត្តយុទ្ធសាស្រ្តគន្លឹះនៃការអនុវត្តគម្រោងកម្មវិធីខ្សែច្រវាក់ផលិតកម្មកសិកម្ម ឆ្នាំ ២០២១​ ដល់ ២០៣០ (Signature Program FY21-FY30) ដែលផ្តោតទៅលើសសរស្តម្ភចំនួន ៣ គឺទី១ ការពង្រីកវិសាលភាព ដែលគម្រោងកម្មវិធីក្នុងដំណាក់កាលថ្មីនឹងត្រូវពង្រីកវិសាលភាពនូវចំនួនកសិករ និងសហគមន៍កសិកម្មឲ្យទទួល​បានការគាំទ្រ និងវិនិយោគធនធាន និងបច្ចេកទេស រួមទាំងការផ្លាស់ប្តូរយុទ្ធសាស្រ្តគន្លឹះក្នុងការអនុវត្តគម្រោងកម្មវិធី ដើម្បីធានាថា គ្រួសារកសិករទទួលបាននូវកំណើនប្រាក់ចំណូល និងមានជីវភាពរស់នៅប្រសើឡើង, ទី២. ការធានាបាននូវចេរភាព ដែលគម្រោងកម្មវិធីនឹងធានាបាននូវការបង្កើនទ្រព្យធនប្រាក់ចំណូល និងភាពជាម្ចាស់ការ​របស់គ្រួសារកសិករតាមរយៈការគាំទ្រ និងបង្កើតឱកាសចូលរួមអភិវឌ្ឍសហគមន៍គំរូ រួមទាំងការធានាបានប្រសិទ្ធភាព​នៃការដឹកនាំស្ថាប័ន និងសេដ្ឋកិច្ចរបស់សហគមន៍កសិកម្មរឹងមាំ, និងទី៣. ការពង្រីកភាពជាដៃគូ ដែលគម្រោងនឹង​បន្តសហការ និងធ្វើការយ៉ាងជិតស្និទ្ធជាដៃគូជាមួយ ក្រសួងស្ថាប័ន គ្រឹះស្ថានហិរញ្ញវត្តុ វិស័យឯកជន ដៃគូអភិវឌ្ឍន៍ជាតិ អន្តរជាតិ និងគ្រឹះស្ថានអប់រំ។

សូមបញ្ជាក់ថា អង្គការហេហ្វឺអន្តរជាតិកម្ពុជា បានបង្កើតឡើងចាប់តាំងពីឆ្នាំ១៩៩៩ និងបាន​រៀបចំចងក្រង គ្រួសារកសិករខ្នាតតូចបានចំនួន ១៥១,០៨៩ ទៅ ៣០០,០០០គ្រួសារ (គិតត្រឹមឆ្នាំ ២០៣០) ឱ្យក្លាយទៅជាក្រុមជួយខ្លួនឯង​ សហគមន៍កសិកម្ម សហភាពសហគមន៍កសិកម្ម ក្នុងគោលបំណងលើកកម្ពស់ខ្សែច្រវាក់តម្លៃនៃផលិតកម្មមាន់ស្រែខ្មែរ និងបន្លែសុវត្ថិភាព៕