ផលិតផល​កសិកម្ម៥មុខ​នៅ​ខេត្តកែប កំពុង​កែច្នៃ​វេចខ្ចប់នាំចេញទៅទីផ្សារ​ក្នុងស្រុក និង​ក្រៅ​ប្រទេស

កែប ៖ នៅថ្ងៃទី ៣០ ខែមេសា ឆ្នាំ២០២៥នេះលោក មាន ដែន អ្នកគ្រប់គ្រង​កសិដ្ឋាន​បេប៊ី​ដែល​ស្ថិត​នៅ​តាម​តំបន់ភ្នំវល្លិ៍ ក្នុង​សង្កាត់ព្រៃធំក្រុងកែប ខេត្តកែប បានប្រាប់​ឱ្យ​ដឹង​ថា នៅបច្ចុប្បន្ននេះកសិដ្ឋានកំពុងតែកែច្នៃវេចខ្ចប់នូវផលិតផលកសិកម្មចំនួន ៥ មុខ​ដើម្បី​ធ្វើការផ្តត់ផ្គង់យកទៅលក់នៅលើទីផ្សារនិងការនាំចេញនៅក្នុងនោះមានម្រេច ម្សៅល្មៀត ម្សៅខ្ចី ម្ទេសក្រៀម និង ទឹកឃ្មុំ ហើយ​ក្នុង​នេះ​កសិដ្ឋានក៏កំពុងដំណើរការឯកសារផង​ដែរ​ក្នុងការ​នាំចេញផលិតផលវេចខ្ចប់ទាំងនេះទៅកាន់ទីផ្សារប្រទេសចិននិងអាមេរិចជាដើមផងដែរ។

ដាំដុះលើផ្ទៃដីជាង ៩០ហិកតា ដំណាំកសិកម្មចម្រុះជាច្រើនប្រភេទ រួមទាំងឈើខ្លឹម កំពុងហុចផលត្រឡប់មកវិញ ដំណាំសក្តានុពលទាំងនោះមាន ម្រេច ក្រូច ម្ទេស រមៀត ខ្ញី ជាដើម។ ក្នុងនោះដំណាំកសិកម្មដែលមានសក្តានុពលចំនួន ៥មុខ កំពុងត្រូវបានកែច្នៃ វេចខ្ចប់នៅហ្នឹងកន្លែង ដើម្បីលក់ចេញទៅកាន់ទីផ្សាក្នុងស្រុក និងក្រៅស្រុកផងដែរ។

លោកបន្តថា សម្រាប់ដំណាំម្រេចជាប្រភេទម្រេច GI កាលពី ឆ្នាំ២០២៤ យើងទទួល​បានទិន្នផល​ប្រមាណ​៦​តោន ដាំលើផ្ទៃដី ៤ហិកតា ក្រោយសម្ងួតរួចយើងទទួលបានម្រេចស្ងួតជាង ៣តោន ដោយឡែកឆ្នាំនេះយើងរំពឹងខ្ពស់ថា ទិន្នផល​ម្រេចស្ងួតនឹងកើនឡើងអាចរហូតដល់ ៥​តោន​សម្រាប់នាំ​ចេញ។

ដោយឡែកផលិតផលវេចខ្ចប់​ផ្សេង​ទៀត​មាន ម្សៅល្មៀត ម្សៅខ្ញី ម្រេសក្រៀម កាល​ឆ្នាំ​កន្លង​ទៅ​យើង​លក់​ចេញបានប្រមាណ ៧០០គ.ក ដោយឡែកឆ្នាំនេះ នឹង​រំពឹងដែរ​ថា អាចទទួលបានទិន្នផលខ្ពស់ដើម្បីនាំចេញដូចម្រេចដែរ។

លោកគូសបញ្ជាក់ថា សម្រាប់កសិដ្ឋាននេះរាល់ដំណាំដែលដាំបាន មិនបារម្ភពីទីផ្សារនោះទេ ខ្លាចតែមិនអាចមានគ្រប់ទៅតាមតម្រូវការរបស់អតិថិជន។

គួរបញ្ជាក់ថា កន្លងទៅរដ្ឋបាលខេត្តកែប ក៏ដូចជាមន្ទីរជំនាញ ធ្លាប់បានចុះមក​ពិនិត្យ​ដំណើរការ​ដាំដុះ និងវេចខ្ចប់នូវផលិតផលកសិកម្មរបស់កសិដ្ឋាននេះដែរ ក្នុងនោះលោក សោម ពិសិដ្ឋ អភិបាលខេត្តកែប លើកទឹកចិត្តខ្ពស់ ឱ្យ​ម្ចាស់​ទីតាំងខាងលើបន្តប្រឹងប្រែងបង្កើន​នូវផលិតផលសម្រេចរបស់ខ្លួនដែលផលិតបាននៅលើទឹកដីខេត្តកែប ដើម្បីផ្គតផ្គង់ទីផ្សារ​ក្នុងស្រុកកាត់បន្ថយការនាំចូល និងជំរុញការនាំចេញនៅកាន់ទីផ្សារអន្តរជាតិ៕

ដោយ ៖ សឹង រ៉ាត់