ព័ត៌មានជាតិ

កម្ពុជាជាប់ចំណាត់ថ្នាក់ជាប្រទេសនាំចេញដំឡូងមីធំជាងគេទី៤ នៅអាស៊ី និងទី១០ នៅលើពិភពលោក

បានផុស

៣ ខែ មុន

នៅ

ថ្ងៃពុធ ១៨ ធ្នូ ២០២៤

ដោយ

សហព័ន្ធដំឡូងមីកម្ពុជាបានលើកឡើងថា អនុវិស័យដំឡូងមីបានរកចំណូលបានប្រមាណ ៧២៨ លានដុល្លារដល់សេដ្ឋកិច្ចជាតិ ដែលធ្វើឱ្យកម្ពុជាក្លាយជាប្រទេសនាំចេញដំឡូងមីធំជាងគេទី៤ នៅអាស៊ី និងទី១០ នៅលើពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោកលោក ច្រាយ សុន ធ្វើឡើងក្នុងជំនួបជាមួយលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កាលពីថ្ងៃទី១៦ខែធ្នូ ដោយលោកបានលើកឡើងពីសក្តានុពលដ៏ធំនៃអនុវិស័យដំឡូងមី និងបានរាយការណ៍ថា បច្ចុប្បន្ន កម្ពុជានាំចេញដំឡូងមីស្រស់ ៩៥% ហើយកែច្នៃក្នុងស្រុក ៥% ដែលបានរួមចំណែកប្រមាណ ៧២៨ លានដុល្លារដល់សេដ្ឋកិច្ចជាតិ។

លោកថា៖«កម្ពុជាជាប់ចំណាត់ថ្នាក់ជាប្រទេសនាំចេញដំឡូងមីធំជាងគេទី៤ នៅអាស៊ី និងទី១០ នៅលើពិភពលោក ដែលមានផ្ទៃដីដាំដុំដំឡូងមីប្រមាណ ៦០០.០០០ ទៅ ៨០០.០០០ ហិកតា។ មើមដំឡូងមីអាចត្រូវបានកែច្នៃទៅជាផលិតផលច្រើនប្រភេទ រួមមានម្សៅដំឡូងមី និងកែច្នៃបន្ត (reprocessing) ទៅជាផលិតផលចំណីអាហារ ដូចជានំប៉័ង នំស្រួយ ភេសជ្ជៈ ឬចំណីសត្វជាដើម»។

លោក ហែម វណ្ណឌី បានលើកឡើងថា ការផ្លាស់ប្តូរពីការនាំចេញមើមដំឡូងមីស្រស់ ទៅជាការកែច្នៃក្នុងស្រុក គឺជាគន្លឹះក្នុងការបង្កើតតម្លៃបន្ថែម, លើកកម្ពស់ជីវភាពរបស់ប្រជាកសិករ, និងធ្វើពិពិធកម្មឧស្សាហកម្មរបស់កម្ពុជា។

លោកបានលើកឡើងពីតួនាទីសំខាន់របស់សហព័ន្ធដំឡូងមីកម្ពុជា ក្នុងការកៀរគរអ្នកដាំ, ជំរុញការប្រើប្រាស់ពូជដែលសម្បូរម្សៅ និងការអនុវត្តកសិកម្មតាមកិច្ចសន្យាដោយយុត្តិធម៌។

លោករដ្ឋមន្រ្តីបានលើកឡើងថា៖« ក្រសួងគាំទ្រចំពោះសំណើររបស់សហព័ន្ធ ក្នុងការអនុវត្តផលិតកម្មស្អាត និងការបង្កើតចង្កោមខ្សែច្រវាក់តម្លៃដំឡូងមី ព្រមទាំងបានចាត់ឱ្យវិទ្យាស្ថានស្តង់ដារកម្ពុជា ធ្វើបច្ចុប្បន្នភាព “ស្តង់ដារកម្ពុជា” សម្រាប់អនុវិស័យដំឡូងមី ដើម្បីបំពេញតាមលក្ខខណ្ឌតម្រូវរបស់ទីផ្សារ»។

ជាមួយគ្នានោះដែរលោករដ្ឋមន្រ្តីក៏បានលើកទឹកចិត្តឱ្យសហព័ន្ធ សហការជាមួយសហគ្រិនខ្មែរ និងគ្រឹះស្ថានហិរញ្ញវត្ថុ ដូចជាធនាគារសហគ្រាសធុនតូចនិងមធ្យម និងធនាគារ ARDB ដើម្បីទទួលបានការគាំទ្រផ្នែកហិរញ្ញវត្ថុការធ្វើផែនការអាជីវកម្ម ការចូលរួមពិព័រណ៍អន្តរជាតិ និងការពង្រីកទីផ្សារជាដើម។

កាលពីថ្ងៃទី ១៤ ខែសីហា ឆ្នាំ២០២០ រដ្ឋាភិបាលសម្រេចអនុម័តសេចក្តីព្រាងច្បាប់ស្តីពីគោលនយោបាយជាតិដំឡូងមី ២០២០-២០២៥ ក្នុងគោលបំណងដើម្បីជំរុញការផលិតកែច្នៃសម្រាប់នាំចេញទៅកាន់ទីផ្សារអន្តរជាតិ។

បើតាមសេចក្តីព្រាងច្បាប់នេះមានគោលបំណងដើម្បីប្រែក្លាយប្រទេសកម្ពុជាជាទីតាំងផលិត កែច្នៃ និងអ្នកផ្គត់ផ្គង់ផលិតផលដំឡូងមីប្រកបដោយនិរន្តរភាពសម្រាប់ទីផ្សារក្នុងតំបន់ និងពិភពលោក។

គោលនយោបាយជាតិបានលើកឡើងថា៖ «ក្នុងស្ថានភាពបច្ចុប្បន្ន និងអនាគត ដំណាំដំឡូងមីដែលជាដំណាំធំទី២ បន្ទាប់ពីស្រូវនឹងមានការគាំទ្រពិសេសដើម្បីទាញយកផលប្រយោជន៍ឲ្យបានជាអតិបរមា និងការអភិវឌ្ឍដំណាំនេះឲ្យក្លាយជាកម្លាំងចលករដ៏ខ្លាំងក្លាមួយក្នុងការធ្វើបដិវត្តន៍ឧស្សាហកម្មនៅកម្ពុជាឆ្នាំ ២០១៥-២០២៥»។

សព្វថ្ងៃ ដំឡូងមី គឺជាដំណាំកសិឧស្សាហកម្មដែលបាននាំចេញដ៏សំខាន់របស់ប្រទេសកម្ពុជាដោយបានរួមចំណែកពី ៣ ទៅ ៤ ភាគរយ នៃផលិតផលសរុបក្នុងស្រុក។

បើយោងតាមការសិក្សាស្រាវជ្រាវរបស់អង្គការ UNDP ស្តីពីការរៀបចំករណីវិនិយោគសម្រាប់ដំឡូងមីដែលចេញផ្សាយកាលពីចុងឆ្នាំ ២០១៩ បង្ហាញថា ការវិនិយោគលើដំណាំដំឡូងមីអាចទទួលបានផលច្រើនជាងការវិនិយោគក្នុងវិស័យផលិតកម្មស្រូវ ចិញ្ចឹមសត្វ ស្បៀងអាហារ និងទេសចរណ៍។

ការសិក្សានេះបានឲ្យដឹងទៀតថា កំណើនចំណូលពីសារពើពន្ធផ្ទាល់សម្រាប់វិស័យដំឡូងមីទទួលបានប្រមាណ ១៣០ លានដុល្លារក្នុងរយៈពេល ១០ ឆ្នាំ ដែលប្រហាក់ប្រហែលនឹងចំណូលពីស្រូវ ការចិញ្ចឹមសត្វ និងស្បៀងអាហារ។ លើកលែងតែវិស័យទេសចរណ៍ដែលផ្តល់ផលចំណេញច្រើនជាងគេគឺ ១៥១ លានដុល្លារ។

ការអភិវឌ្ឍក្នុងវិស័យដំឡូងមីកម្ពុជាត្រូវការកញ្ចប់ថវិកាវិនិយោគសាធារណៈចំនួន ២៩៦ លានដុល្លារ ខណៈការអភិវឌ្ឍវិស័យនេះភាគច្រើនពុំទាន់យកចិត្តទុកដាក់ខ្ពស់លើការកែច្នៃក្នុងប្រទេសនោះទេ។ នេះបើតាមការសិក្សារបស់ UNDP៕

Related Topics:ដំឡូងមី