ព័ត៌មានជាតិ

កសិករដាំដុះដំឡូងមីខេត្តឧត្តរមានជ័យ កែច្នៃនាំចេញទៅចិន និងវៀតណាម

បានផុស

១១ ខែ មុន

នៅ

ថ្ងៃចន្ទ ២១ កក្កដា ២០២៥

ដោយ

ប្រធានមន្ទីរកសិកម្មខេត្តឧត្តរមានជ័យ លោក សូត្រ ស៊ីសុខឃាងបានឱ្យដឹងថា នាពេលបច្ចុប្បន្ន ប្រជាកសិករដាំដំឡូងមីនៅក្នុងខេត្តរបស់លោកក្រៅតែពីដាំដុះដំឡូងមី ដើម្បីផ្គត់ផ្គង់ទីផ្សារក្នុងស្រុក ក៏នៅមានកែច្នៃសម្រាប់ការនាំចេញទៅកាន់ទីផ្សារប្រទេសចិន និងវៀតណាមផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់«កម្ពុជាថ្មី» លោក សូត្រ ស៊ីសុខឃាង បានមានប្រសាសន៍ថា បច្ចុប្បន្ននៅក្នុងខេត្តមានផ្ទៃដីដាំដុះដំឡូងមី ប្រមាណជាង ៧ម៉ឺនហិតា ក្នុងនោះកសិករមិនត្រឹមប្រមូលផលសម្រាប់កែច្នៃលក់នៅស្រុកប៉ុណ្ណោះទេ តែក៏សម្រាប់នាំចេញទៅក្រៅប្រទេសដូចគ្នាដែរ។ មកដល់ពេលបច្ចុប្បន្ន ទីផ្សារដំឡូងមីនៅក្នុងខេត្តមិនមានបញ្ហាប្រឈមនោះទេ ព្រោះដំឡូងមី ចាប់ផ្តើមប្រមូលផលពេញដៃចាប់ពីខែធ្នូ រហូតមកដល់ខែមេសា ហើយមកដល់បច្ចុប្បន្ននេះនៅក្នុងខេត្តមានតិចតួចប៉ុណ្ណោះដែលសល់ពីការប្រមូលផល ប៉ុន្តែមិនមានបញ្ហាអ្វីនោះទេ ព្រោះកសិករបង្វែរការនាំចេញទៅកាន់ទីផ្សារវៀតណាមជំនួសវិញ។

លោកបានបន្ថែមថា សម្រាប់ផលដំណាំដំឡូងមី នៅក្នុងខេត្តក៏មានរោងចក្រកែច្នៃមួយ ដែលទទួលទិញដំឡូងមីពីកសិករ ដើម្បីយកទៅកែច្នៃចេញជាផលិតផលពាក់កណ្តាលសម្រេចជាម្សៅ សម្រាប់នាំចេញទៅទីផ្សារខាងក្រៅប្រទេស។

ជុំវិញការបិទព្រំដែនគោកកម្ពុជា-ថៃ លោក សូត្រ ស៊ីសុខឃាង បានអះអាងថា មកទល់ពេលបច្ចុប្បន្ន មិនមានការជិះឥទ្ធិពលអ្វីអាក្រក់ដល់ការនាំចេញផលិតផលកសិកម្មនៅក្នុងខេត្តឡើយ។ ផ្ទុយទៅវិញលោកយល់ឃើញថា នេះជាឱកាសមួយសម្រាប់កសិករ ព្រោះកន្លងមកយើងពឹងផ្អែកទៅលើទីផ្សាររបស់គេមួយចំនួនពាក់ព័ន្ធបន្លែ ត្រី សាច់ ជាដើម ប៉ុន្តែនៅពេលបិទព្រំដែន កសិករ ក៏ដូចជាសហគមន៍ពួកគេខិតខំផលិតដើម្បីផ្គត់ផ្គង់លើទីផ្សារ ដែលនិងជួយឱ្យអ្នកផលិតកាន់តែទទួលបានប្រាក់ចំណូលកាន់តែល្អប្រសើរជាងមុន និងអាចឱ្យការហូបចុកតាមមូលដ្ឋានកាន់តែមានសុវត្ថិភាពជាងមុន។

«ប្រសិនបើបញ្ហាព្រំដែនរវាងប្រទេសទាំងពីរនៅតែបន្តអូសបន្លាយពេលតទៅទៀត ពាក់ព័ន្ធទៅនិងទីផ្សារដំឡូងមី យើងក៏មានការព្រួយបារម្ភដូចគ្នាដែរ ព្រោះកន្លងមកយើងក៏នាំចេញទៅកាន់ទីផ្សារប្រទេសថៃដែរ តែក្រៅពីនេះ យើងក៏នៅមានទីផ្សារសម្រាប់នាំចេញទៅកាន់ប្រទេសចិន និងនាំចេញទៅកាន់ទីផ្សារវៀតណាម»។ លោក ប្រធានមន្ទីរបន្ថែមបែបនេះ។

ដោយឡែក ពាក់ព័ន្ធទៅនិងការកែច្នៃមួយចំនួនសម្រាប់ទីផ្សារក្នុងស្រុក កសិករក៏មានការប្រយ័ត្នប្រយែងនៅក្នុងការផលិត ព្រោះទៅមុខទៀតយើងរំពឹងតែទៅលើទីផ្សារផ្សេងក្រៅពីថៃ។ កន្លងមកទីផ្សារប្រទេសថៃ និងប្រទេសវៀតណាមមានការប្រទាញប្រទង់គ្នាទៅវិញទៅមក មានន័យថា ប្រសិនបើទីផ្សារមួយណាក្នុងចំណោមទីផ្សារទាំងពីរនេះបានថ្លៃជាង នោះកសិករនាំចេញទៅកាន់ទីផ្សារដែលមានតម្លៃល្អជាងមិនខាន ព្រោះដំឡូងមីជាវត្ថុធាតុដើមមួយមុខដែលអាចកែច្នៃបានច្រើនប្រភេទនៅក្នុងឧស្សាហកម្មកែច្នៃ។