ក្រសួងកសិកម្មត្រៀមបង្វែរកសិផលនៅតាមខេត្តជាប់ព្រំដែនថៃ កែច្នៃទៅ​ជាផលិតកម្មចំណីសត្វ

ក្រសួងកសិកម្ម រុក្ខាប្រមាញ់ និងនេសាទ បានចាប់ផ្ដើមបង្វែរនូវកសិផលដែល​ស្ថិតនៅតាម​បណ្ដា​​​ខេត្ត​​ទាំង ៧ ជាប់ព្រំដែនថៃ ទៅជាធាតុចូលកសិកម្មនៃការកែច្នៃ ធ្វើផលិតកម្មចំណី​សត្វ​ក្នុង​ស្រុក នៅចំពេលដែលបញ្ហាព្រំដែនកម្ពុជា-ថៃ បន្តអូសបន្លាយ។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា រាជ​រដ្ឋា​​ភិបាលមានដំណោះស្រាយ២ សម្រាប់រយៈពេលខ្លី និងមធ្យម ពោលគឺ​កម្ពុជា​ចាប់ផ្ដើម​បង្វែរ​នូវកសិផលដែលដាំដុះនៅតាមខេត្តជាប់ព្រំដែនថៃ ទៅជាធាតុចូលកសិកម្ម​នៃការកែច្នៃ​ ក្នុង​ស្រុក ជាពិសេសការកែច្នៃធ្វើផលិតកម្មចំណីសត្វ។

លោកបានថ្លែងបន្ថែមថា៖ «យើងឃើញករណីមួយគឺថា កន្លងមក រឿងពោត ដំឡូងមី ត្រូវបាននាំចេញទៅប្រទេសថៃ ដើម្បីបម្រើឱ្យឧស្សាហកម្មកែច្នៃចំណី​សត្វនៅក្នុងប្រទេសថៃ ឥឡូវ​​​​​នេះ នៅពេលដែលព្រំដែនបិទ យើងក៏អាចបង្វែរធាតុចូលនេះ ទៅធ្វើជាផលិតកម្មចំណី​សត្វនៅ​ក្នុងស្រុកផងដែរ»។

បើតាមលោក ឃឹម ហ្វីណង់ ​កន្លងមកកម្ពុជាមានក្រុមហ៊ុន​មួយចំនួនដូចជា​ក្រុមហ៊ុន CP ដែលបានព្យាយាមធ្វើចំណីសត្វក្នុងស្រុកដែរ។

លោក ឃឹម ហ្វីណង់បន្ថែមថា៖« យើងបង្វែរទិសដៅនៃធាតុចូលរបស់យើងឱ្យត្រូវនឹង​ទិសដៅនៃ​ការធ្វើ​ផលិតកម្មចំណីសត្វនៅក្នុងស្រុក ហើយក្រសួងកសិកម្មបានធ្វើការរួចហើយជាមួយក្រុមហ៊ុន CP ទោះបីជាក្រុមហ៊ុន CP ជាក្រុមហ៊ុនថៃក៏ដោយ យើងមិនប្រកាន់ទេ គាត់ចុះបញ្ជីពាណិជ្ជកម្មនៅកម្ពុជា»។

ម្យ៉ាងទៀត កម្ពុជាធ្វើពិពិធកម្មទីផ្សារ ក្នុងរយៈពេលខ្លី ក្រៅតែពីយើងបង្វែរ​ពីការនាំចេញស្រស់​ពីការធ្វើ​ផលិតកម្មចំណីសត្វក្នុងស្រុក យើងធ្វើពិពិធកម្មទីផ្សារពីព្រោះ ដំឡូងមី ពោត វៀតណាម​ក៏ត្រូវការ ចិនក៏ត្រូវការ អញ្ចឹងយើងធ្វើការតភ្ជាប់ទីផ្សារជាមុនហើយ។

លោក ឃឹម ហ្វីណង់ បន្ថែមថា៖« ការបិទព្រំដែនកម្ពុជា-ថៃ យើងមានបញ្ហាចំនួន ២ ទាំងនាំចេញ និងនាំចូល រាល់ការធ្វើ​ពាណិជ្ជកម្ម​តែងតែប៉ះពាល់ខ្លះហើយ ខាងថៃ ក៏ប៉ះពាល់ ខាងកម្ពុជាក៏ប៉ះពាល់។ បញ្ហាវានៅត្រង់ថា តើយើងអាចដោះស្រាយ និងកាត់បន្ថយផលប៉ះពាល់​ហ្នឹងបានដល់​កម្រិត​ណា បើយើងនិយាយអំពីកសិផលការចូលពីថៃ មកខ្មែរវិញ ចំណុចនេះ គឺជារឿងបន្ទាប់បន្សំតិចតួចបំផុត»។

លោក ឃឹម ហ្វីណង់ បន្ថែមថា៖ «កម្ពុជាមិនពឹងអីច្រើនពីថៃទេ បើយើងនិយាយពីបន្លែផ្លែឈើ មែនទែនបន្លែផ្លែឈើមួយចំនួន គ្រាន់តែ ឆ្លងកាត់ចូលមកកម្ពុជា ហើយចេញទៅប្រទេសទី៣ ប៉ុន្តែមានរបស់ខ្លះ បងប្អូននៅជាប់ព្រំដែន វាជិត អញ្ចឹង​គាត់យកពីគេមកប្រើវាស្រួល ប៉ុន្តែក៏មិនមែនបានន័យថា យើងផលិតមិនបានដែរទី១ យើងអាចយកពីកន្លែងផ្សេងបំពេញឱ្យគាត់បាន ទី២ យើងក៏យកពីប្រទេសដ៏ទៃ ដើម្បីមកបំពេញឱ្យបានដែរ»។

លោកបន្ថែមថា៖ «អំពីរឿងជី ដែលជាធាតុចូលកសិកម្មចុះ ទទួលស្គាល់ថាបងប្អូន​នៅជាប់ព្រំដែន​ថៃនេះ គាត់នាំចូលជី ពីថៃ គាត់អាចថា គុណភាពល្អ ថោកជាង ឬវាជិតជាង ប៉ុន្តែសួរថា យើងអត់​អាចនាំចូលជីពីចិនបានទេ ឬអត់អាចនាំចូលជីពីវៀតណាមបានទេ ឬយ៉ាងណា? ហើយមែនទែនទៅ ថៃក៏មិនមែនជាប្រទេសផលិតជីដែរ ថៃក៏នាំចូលជីពីចិន និងប្រទេសដ៏ទៃដើម្បី​យកមកផ្គុំធ្វើផលិតកកម្មជីក្នុងស្រុករបស់ខ្លួនដែរ អញ្ចឹងរឿងនេះ យើងអត់​មានបញ្ហាចោទទេ ហើយយើងអាចធានាបានទាំងស្រុង រហូតដល់ពេលនេះ ខ្ញុំនិយាយហើយ​និយាយទៀតថា សន្តិសុខស្បៀងរបស់កម្ពុជាមិនមានបញ្ហាទេ ទៅបីយើងបិទ​ជាអចិន្ត្រៃជាមួយថៃ»៕

អត្ថបទ៖ ឡេង ដេត