ទេសចរអន្តរជាតិទៅថៃធ្លាក់ចុះ បង្កើនក្ដីបារម្ភវិបត្តិទេសចរណ៍

ក្រសួងទេសចរណ៍ និងកីឡាថៃ បាន​ឱ្យដឹងនៅថ្ងៃ​អង្គារ​នេះថា ការមកដល់នៃភ្ញៀវទេសចរបរទេស​ក្នុងប្រទេសថៃ ចន្លោះពីថ្ងៃទី ១ មករា ដល់ថ្ងៃទី ២២ មិថុនា បាន​ធ្លាក់ចុះ ៤,២៤ ភាគរយ ធៀប​នឹង​រយៈពេលដូចគ្នា​កាលពីឆ្នាំមុន ដែលបញ្ហា​នេះកំពុងបង្កើនក្ដីបារម្ភពីវិបត្តិទេសចរណ៍ថៃ។

​

តាមការចុះផ្សាយរបស់កាសែតបាងកកប៉ុស្តិ៍ ថៃ​បាន​កត់ត្រាភ្ញៀវទេសចរអន្តរជាតិ ១៦,០៤ លាននាក់ ក្នុងអំឡុងពេលដែលបាន​លើកឡើងពីខាងដើម។ ក្នុងនោះ ភ្ញៀវពីម៉ាឡេស៊ីនាំមុខគេក្នុងចំនួន ២,១៩ លាននាក់ ហើយបន្ទាប់មកចិន​ ២,១៧ លាននាក់។

កាលពីខែមុន ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ (NESDC) បានកាត់បន្ថយការព្យាករ​របស់ខ្លួនសម្រាប់ការមកដល់នៃភ្ញៀវទេសចរបរទេសនៅឆ្នាំនេះ មកត្រឹម ៣៧ លាននាក់ ពី ៣៨ លាននាក់ ក្នុងការព្យាករលើកមុន​។ ថៃបានកត់ត្រាពីការមកដល់នៃភ្ញៀវច្រើនបំផុត ៤០ លាន​នាក់ ក្នុងឆ្នាំ ២០១៩ ពោលគឺមុនវិបត្តិកូវីដ១៩។ ​

ការបង្ហាញពីតួលេខនៃការធ្លាក់ចុះចំនួនភ្ញៀវទេសចរបរទេស​នេះ ធ្វើឡើងក្រោយ​ប្រតិបត្តិករទេសចរណ៍ថ្មីៗនេះ បាន​សម្ដែងការព្រួយបារម្ភពីផលប៉ះពាល់បន្ថែមលើលទ្ធភាពរដ្ឋប្រហារទម្លាក់លោកស្រី ផែថងថាន ស៊ីណាវ៉ាត្រ ចេញពីតំណែងនាយករដ្ឋមន្រ្តីថៃ ជុំវិញព្យុះនយោបាយក្រោយបែកសារសម្លេងសន្ទនារវាងលោកស្រី និងសម្ដេច ហ៊ុន សែន ប្រធានព្រឹទ្ធសភាកម្ពុជា ពាក់ព័ន្ធនឹងភាពតានតឹងព្រំដែនរវាងប្រទេសទាំង២។ ​

ក្រុមអ្នកជំនាញលើកឡើងថា អស្ថិរភាព​នយោបាយក្នុងស្រុកថៃ កំពុងបន្ថែមបន្ទុកលើសេដ្ឋកិច្ច និងវិស័យជំរុញសេដ្ឋកិច្ចសំខាន់ៗ រួមទាំងទេសចរណ៍ ដែលទទួល​រងនូវបញ្ហា​ជាច្រើនរួច​មកហើយ។ ក្រុមអ្នកជំនាញយល់ឃើញថា ភាពតានតឹងជាមួយ​កម្ពុជា ជម្លោះនៅមជ្ឈិមបូព៌ា ក៏ដូចជារបាយការណ៍ដែលថា ថៃជាប្រទេសឆ្លងកាត់សម្រាប់ឧក្រិដ្ឋកម្មឆ្លងដែនជួញដូរមនុស្ស គឺជាកត្តាសម្ពាធសំខាន់ៗ។

កន្លងមកទេសចរណ៍ថៃរងនូវកង្វល់ជាច្រើនដែលធ្វើឱ្យទេសចរអន្តរជាតិធ្លាក់ចុះ រួមទាំងកង្វល់​សុវត្ថិភាព​ពាក់ព័ន្ធការជួញដូរមនុស្ស ជាពិសេស​ពីសំណាក់ភ្ញៀវចិន​ គ្រោះរញ្ជួយដី ​កម្សោយ​នៃការប្រកួតប្រជែងធៀប​នឹងប្រទេសក្នុងតំបនដទៃ និងកំណើនយឺតយ៉ាវនៃសេដ្ឋកិច្ចនៅតាមបណ្ដាប្រទេសទីផ្សារជាដើម៕