Trump ផ្តាំទៅ Medvedev ឲ្យចេះប្រយ័ត្នសម្តី ពេលនិយាយពីអាវុធនុយក្លេអ៊ែរ

ប្រធានាធិបតីអាមេរិក Donald Trump បានប្រាប់ទៅអនុប្រធានក្រុមប្រឹក្សាសន្តិសុខរុស្ស៊ី Dmitry Medvedev ត្រូវចេះប្រយ័ត្នសម្តីពេលនិយាយរឿងអាវុធនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារបង្ហោះលើបណ្តាញសង្គម Truth Social កាលពីថ្ងៃចន្ទទី២៣ខែមិថុនាឆ្នាំ២០២៥ ប្រមុខសេតវិមានសរសេរថា លោកបានឮអតីតប្រធានាធិបតីរុស្ស៊ី Medvedev និយាយដោយមិនប្រយ័ត្នអំពី ពាក្យ N (នុយក្លេអ៊ែរ!) ហើយថា គាត់និងប្រទេសដទៃទៀត ត្រៀមផ្តល់ក្បាលគ្រាប់នុយក្លេអ៊ែរទៅឲ្យអ៊ីរ៉ង់ ដូច្នេះត្រូវប្រយ័ត្នបន្តិចពេលនិយាយពាក្យ N។

លើសពីនេះ លោក Trump អួតថា អាមេរិកមានសមត្ថភាពយោធាដ៏កំពូល ទាំងការវាយប្រហារចេញពីសមុទ្រនិងអាកាស។

កាលពីថ្ងៃអាទិត្យ លោក Medvedev អះអាងថា មានប្រទេសមួយចំនួនត្រៀមបញ្ជូនក្បាលគ្រាប់នុយក្លេអ៊ែរទៅឲ្យអ៊ីរ៉ង់ដោយផ្ទាល់ហើយ។

លោកបានបង្ហោះលើបណ្តាញសង្គម X ក្រោយអាមេរិកវាយរោងចក្រនុយក្លេអ៊ែរអ៊ីរ៉ង់ ដោយក្នុងសារនោះលោកសរសេរថា «តើ​អាមេរិក​សម្រេច​បាន​អ្វី​ខ្លះ​ជាមួយ​ការ​វាយ​ប្រហារ​ពេល​យប់​លើ​ទីតាំង​នុយក្លេអ៊ែរ​ចំនួន​បី​នៅ​អ៊ីរ៉ង់? ១. ហេដ្ឋារចនាសម្ព័ន្ធសំខាន់នៃវដ្តឥន្ធនៈនុយក្លេអ៊ែរ ហាក់ដូចជាមិនមានផលប៉ះពាល់ ឬអាចខូចខាតតិចតួចប៉ុណ្ណោះ។ ២. ការពង្រឹងសម្ភារៈនុយក្លេអ៊ែរ ហើយឥឡូវនេះយើងអាចនិយាយបានច្បាស់ថា ការផលិតអាវុធនុយក្លេអ៊ែរនាពេលអនាគតនឹងបន្ត។ ៣. ប្រទេសមួយចំនួនបានត្រៀមខ្លួនរួចជាស្រេចដើម្បីផ្គត់ផ្គង់ក្បាលគ្រាប់នុយក្លេអ៊ែររបស់ពួកគេឲ្យអ៊ីរ៉ង់ដោយផ្ទាល់»។

យ៉ាងណាក្រោយមក លោក Medvedev ឆ្លើយតបទៅ Trump ថា «រុស្ស៊ីគ្មានចេតនាផ្គត់ផ្គង់អាវុធនុយក្លេអ៊ែរឲ្យអ៊ីរ៉ង់ឡើយ ពីព្រោះយើងជាភាគីនៃសន្ធិសញ្ញាមិនរីកសាយភាយអាវុធនុយក្លេអ៊ែរ មិនដូចអ៊ីស្រាអែលទេ» ប៉ុន្តែលោកបង្ហើបថាប្រទេសផ្សេងអាច ហើយនោះជាអ្វីដែលលោកនិយាយ៕

អត្ថបទ៖ សុខ សុវណ្ណ

ចុចអាន៖ រុស្ស៊ី អះអាងថា ប្រទេសមួយចំនួន ត្រៀមបញ្ជូនក្បាលគ្រាប់នុយក្លេអ៊ែរ ឲ្យអ៊ីរ៉ង់ ដោយផ្ទាល់