ត្រាំ ប្រកាសថា អ៊ីស្រាអែល-អ៊ីរ៉ង់ យល់ព្រម​លើឈប់បាញ់ហើយ តែទីក្រុងតេហេរ៉ង់ ថា មិនពិត

ប្រធានាធិបតីអាមេរិក ដូណាល់ ត្រាំ ប្រកាសថា អ៊ីស្រាអែលនិងអ៊ីរ៉ង់ បានព្រមព្រៀងគ្នាលើបទឈប់បាញ់ហើយទាំងស្រុងហើយ ប៉ុន្តែទីក្រុងតេហេរ៉ង់ ចេញមុខបដិសេធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រមុខសេតវិមានបានប្រកាសបែបនេះនៅលើបណ្តាញសង្គម Truth Social កាលពីថ្ងៃចន្ទទី២៣ខែមិថុនាឆ្នាំ២០២៥ ដោយលោកសរសេរថា «មានការឯកភាពគ្នាទាំងស្រុងរវាងអ៊ីស្រាអែលនិងអ៊ីរ៉ង់ថា នឹងមានបទឈប់បាញ់ពេញលេញក្នុងរយៈពេលប្រហែល៦ម៉ោងទៀត គិតចាប់ពីពេលនេះទៅ នៅពេលដែលអ៊ីស្រាអែលនិងអ៊ីរ៉ង់បញ្ចប់បេសកកម្មចុងក្រោយដែលកំពុងដំណើរការ។ ក្នុងរយៈពេល១២ ម៉ោង បន្ទាប់មកសង្គ្រាមនឹងត្រូវបានចាត់ទុកថា បញ្ចប់»។ 

ជុំវិញបទឈប់បាញ់នេះដែរ បើយោងតាមប្រភពមួយដែលចុះផ្សាយដោយ CNN បានឲ្យដឹងថា ប្រទេសកាតា គឺជាអ្នកជួយសម្របសម្រួលឲ្យមានកិច្ចព្រមព្រៀងរវាងគូសត្រូវទាំងពីរនេះ។

យោងតាមប្រភពនោះ លោកត្រាំបានពិភាក្សាជាមួយព្រះចៅកាតា ហើយប្រាប់ទ្រង់ថា អាមេរិកអាចឲ្យអ៊ីស្រាអែលយល់ព្រមលើបទឈប់បាញ់ជាមួយអ៊ីរ៉ង់។ បន្ទាប់មកលោក ត្រាំ ក៏ស្នើឲ្យកាតាទៅបញ្ចុះបញ្ចូលអ៊ីរ៉ង់ ឲ្យយល់ព្រមចំពោះបទឈប់បាញ់នេះដែរ។

ទោះបីជាយ៉ាងណាក៏ដោយ សារព័ត៌មាន Fars ដែលស្និទ្ធិនឹងឆ្មាំបដិវត្តឥស្លាម បានទាត់ចោលការអះអាងរបស់លោកត្រាំ ដោយចុះផ្សាយថា ការប្រកាសរបស់ប្រធានាធិបតីអាមេរិកគឺខុសទាំងស្រុង។ ទីក្រុងតេហេរ៉ង់ មិនទទួលបានសំណើបទឈប់បាញ់ទេ ទាំងសំណើផ្លូវការនិងមិនផ្លូវការ។

សេចក្តីប្រកាសរបស់លោកត្រាំ កើតឡើងប៉ុន្មានម៉ោងប៉ុណ្ណោះ បន្ទាប់ពីអ៊ីរ៉ង់ បាញ់មីស៊ីលលើមូលដ្ឋានទ័ពអាកាស Al Udeid របស់សហរដ្ឋអាមេរិក ក្នុងប្រទេសកាតា។

ទោះបីជាយ៉ាងណាក៏ដោយ មីស៊ីលត្រូវខែលការពាររបស់កាតានិងអាមេរិក ស្ទាក់ចាប់បាន ហើយមិនបង្កឲ្យមានមនុស្សរងរបួសឬការខូចខាតសំណង់ហេដ្ឋារចនាសម្ព័ន្ធអ្វីទេ។

ការវាយប្រហារនេះ ត្រូវគេដឹងយ៉ាងច្បាស់ថា គឺជាការសងសឹករបស់អ៊ីរ៉ង់ចំពោះអាមេរិក ដែលវាយប្រហារអាកាសលើទីតាំងនុយក្លេអ៊ែររបស់ខ្លួន កាលពីចុងសប្តាហ៍៕

អត្ថបទ៖ សុខ សុវណ្ណ

ចុចអាន៖ រុស្ស៊ី ថា អាមេរិក វាយអ៊ីរ៉ង់ ដោយប្រើលេសដូចកាលវាយអ៊ីរ៉ាក់ អ៊ីចឹង