ឥណ្ឌា ដល់ដំណាក់កាលហៅពេទ្យទាហានមកជួយប្រយុទ្ធកូវីដ

សារព័ត៌មាន Reuters បានរាយការណ៍ថា ប្រទេសឥណ្ឌា នឹងជ្រើសរើសយក អតីតគ្រូពេទ្យទាហានរាប់រយនាក់ ដើម្បីជួយដល់ការប្រយុទ្ធប្រឆាំងនឹង ជំងឺកូវីដ ១៩ នៅក្នុងប្រទេស ។

ប្រទេសអាស៊ីមួយនេះ កំពុងក្លាយជាចំណុចផ្ទុះឡើង នៃជំងឺកូវីដ ១៩ ដោយបានរាយការណ៍ថា មានករណីឆ្លងថ្មីច្រើនជាង ៤០០,០០០ នាក់ក្នុងមួយថ្ងៃៗ និងស្លាប់រាប់ពាន់នាក់ ។

យោងតាមរបាយការណ៍របស់ Reuters បានឲ្យដឹងថា មន្រ្តីពេទ្យប្រហែល ៤០០ នាក់ ត្រូវបានគេរំពឹងថា នឹងបម្រើការក្នុងកិច្ចសន្យាក្នុងរយៈពេល ១១ ខែ ខណៈដែលក្រុមគ្រូពេទ្យ ការពារផ្សេងទៀត ក៏ត្រូវបានគេប្រមូលផ្ដុំ ដើម្បីពិគ្រោះយោបល់ តាមអ៊ីនធឺណិតផងដែរ ។

ក្រោយករណីឆ្លង និងស្លាប់ច្រើនឡើងៗ រដ្ឋឥណ្ឌាជាច្រើន បានដាក់ការបិទខ្ទប់យ៉ាងតឹងរ៉ឹង ក្នុងរយៈពេលមួយខែកន្លងមកនេះ នៅក្នុងកិច្ចប្រឹងប្រែងដើម្បីទប់ស្កាត់រោគរាតត្បាត ។ រដ្ឋខ្លះទៀត បានបិទកន្លែងសាធារណៈ ដែលមិនចាំបាច់រួមមានភោជនីយដ្ឋាន ហាងស្រា និងផ្សារទំនើប ជាដើម ។

ទន្ទឹមនោះ ប្រទេសឥណ្ឌា ក៏បានបង្កើនយុទ្ធនាការចាក់វ៉ាក់សាំង ដ៏ច្រើនសន្ធឹកសន្ធាប់ផងដែរ ប៉ុន្តែរហូតមកដល់ពេលនេះ ប្រជាជនចំនួន ៣៤.៣ លាននាក់ បានទទួលការចាក់វ៉ាក់សាំងពេញលេញ ពោលមានចំនួនតែ ២.៥ ភាគរយប៉ុណ្ណោះ ក្នុងចំណោមប្រជាជន ១.៣៥ ពាន់លាននាក់របស់ប្រទេសនេះ ។

គួរបញ្ជាក់ថា គិតត្រឹមពេលនេះ ប្រទេសឥណ្ឌា មានករណីឆ្លងជំងឺកូវីដ ១៩ ជាង ២២ លានករណី និងមានអ្នកស្លាប់ចំនួន ២៤៦,១៤៦ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CGTC

ចុចអាន ៖ ឥណ្ឌា ផ្ទុះជំងឺសាហាវមួយទៀត អ្នកជាសះស្បើយពីកូវីដអាចពិការភ្នែក និងឈានដល់ស្លាប់

ចុចអាន ៖ ស្ថានភាពនឹងទៅជាយ៉ាងណា? ឥណ្ឌា ត្រៀមប្រារព្ធពិធីបុណ្យសាសនាមួយទៀត