ក្មេងៗ និងអ្នកមានសុខភាពល្អ ក៏ជាចំណែកចម្លងរោគ ហើយត្រូវចាក់វ៉ាក់សាំងដើម្បីបញ្ឈប់វីរុសបំប្លែងខ្លួន

អ្នកជំនាញខាងជំងឺឆ្លងកំពូលរបស់អាមេរិកលោកវេជ្ជបណ្ឌិត Antony Fauci បានអំពាវនាវឲ្យមានការចាក់វ៉ាក់សាំងទ្រង់ទ្រាយធំ ដើម្បីបញ្ឈប់វីរុសកូវីដបំប្លែងខ្លួន ។

លោក Fauci បានសង្កត់ធ្ងន់ថា សូម្បីតែអ្នកដែលមិនមែនជាក្រុមហានិភ័យធំៗ ដូចជាក្មេងៗ និងអ្នកមានសុខភាពល្អក៏ដោយ នៅតែអាចរួមចំណែកក្នុងការរីករាលដាលនៃមេរោគ ហើយត្រូវតែចាក់វ៉ាក់សាំង ។

លោកបាននិយាយនៅក្នុងបទសម្ភាសន៍មួយទៅកាន់សារព័ត៌មាន USA Today ថា “អ្នកកំពុងរស់នៅក្នុងសង្គមមួយ ហើយប្រសិនបើអ្នកក្លាយជាយានសម្រាប់ចម្លងមេរោគ ពីអ្នកទៅអ្នកផ្សេង មានន័យថាអ្នកកំពុងជួយផ្សព្វផ្សាយមេរោគហើយ ។ ប្រសិនបើអ្នកអនុញ្ញាតឲ្យមេរោគចម្លងតាមកាលកំណត់ដោយសេរីនៅក្នុងសង្គម នោះវានឹងមានវីរុសបំប្លែងខ្លួន” ។

យោងតាមលោក Fauci បានឲ្យដឹងថា ប្រសិនបើវីរុសត្រូវបានអនុញ្ញាតឲ្យមានវីរុសបំប្លែងខ្លួន វាអាចបង្កើតវីរុសបំប្លែងខ្លួនដូចជា Delta ដែលឆ្លងលឿន និងរហ័សជាងវីរុសបំប្លែងខ្លួន Alpha ជាដើម ។

ទន្ទឹមនោះ សហរដ្ឋអាមេរិកបានណែនាំឡើងវិញជាបណ្តើរៗ ឲ្យពាក់ម៉ាសនៅទីសាធារណៈ ចំពេលមានការរីករាលដាលនៃវីរុសបំប្លែងខ្លួនឥណ្ឌា Delta ។

បន្ថែមពីនេះ ទោះបីជាមនុស្សពេញវ័យប្រមាណ ៧០ ភាគរយនៃប្រទេសនេះ ត្រូវបានចាក់វ៉ាក់សាំងរួចហើយក៏ដោយ ក៏ចំនួនករណីឆ្លងនៅតែបន្តកើនឡើងយ៉ាងឆាប់រហ័សជាថ្មីម្តងទៀត និងលើសពីមធ្យម ១០ ម៉ឺនករណីក្នុងមួយថ្ងៃ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ វីរុសបំប្លែងខ្លួន មិនខ្លាចវ៉ាក់សាំង ២ប្រភេទឆ្លងខ្លាំងជាង Delta កំពុងវាយលុកពិភពលោកជាបណ្តើរៗហើយ