ព័ត៌មានអន្ដរជាតិ

ថៃច្រានចោលការអះអាងដែលថា អាមេរិកសម្រេចដាក់ពន្ធ ១៨% លើទំនិញថៃ

បានផុស

១ year មុន

នៅ

ថ្ងៃសុក្រ ២៧ មិថុនា ២០២៥

ដោយ

រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បានច្រានចោលរបាយការណ៍ដែលគេចែកចាយតៗគ្នា ដែលថា សហរដ្ឋអាមេរិកបានសម្រេចចិត្តចុងក្រោយដោយការដាក់ពន្ធនាំចូល ១៨ ភាគរយ លើទំនិញថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់កាសែត The Nation លោក Pichai បានគូសបញ្ជាក់កាលពីថ្ងៃព្រហស្បតិ៍ថា តួលេខ ១៨ ភាគរយ គ្រាន់តែជា «ការប៉ាន់ប្រមាណ» តែប៉ុណ្ណោះ ប៉ុន្តែ «តួលេខប៉ាន់ប្រមាណ» នេះ បានប្រើប្រាស់ដោយធនាគារកណ្តាលថៃ និងអ្នកសេដ្ឋកិច្ច សម្រាប់ជាគំរូនៃផលប៉ះពាល់សេដ្ឋកិច្ចដែលអាចកើតមាន។

លោកថ្លែងយ៉ាងដូច្នេះថា៖ «ព័ត៌មានដែលផ្សព្វផ្សាយតាមបណ្ដាញសង្គមដែលថា ថៃបានសម្រេចកិច្ចព្រមព្រៀងចុងក្រោយលើការយកពន្ធពីសហរដ្ឋអាមេរិក ក្នុងអត្រា ១៨ ភាគរយ នោះ គឺមិនពិតទេ។ យើងមិនទាន់មានការសម្រេចចិត្តទេ។ តាមការយល់របស់ខ្ញុំគឺថា តួលេខ ១៨ ភាគរយ គឺជាចំនួនដែលបានព្យាករសុទ្ធសាធ ដោយផ្អែកលើការប៉ាន់ស្មាន។ ការពិតគឺយើងកំពុងស្ថិតក្នុងការចរចានៅឡើយ»។

រដ្ឋមន្ត្រីដដែល បានពន្យល់ថា ការពិភាក្សាជាមួយសហរដ្ឋអាមេរិកបានគ្របដណ្តប់លើវិស័យសំខាន់ៗចំនួន ៤ ទៅ ៥ រួមមាន អត្រាពន្ធគយ របាំងពាណិជ្ជកម្មមិនមែនពន្ធគយ ការបង្កើនការនាំចូលរបស់សហរដ្ឋអាមេរិក ការដោះស្រាយការក្លែងបន្លំនៃប្រភពដើមទំនិញ និងការដោះស្រាយបញ្ហាដឹកជញ្ជូនទំនិញកាត់ប្រទេសដៃគេចពន្ធ និងជំរុញការវិនិយោគថៃនៅអាមេរិកជាដើម។ ចំណុចទាំងនេះគឺជាចំណុចផ្តោតជាប់លាប់នៃកិច្ចពិភាក្សាទ្វេភាគី ដែលសំដៅដោះស្រាយអតុល្យភាពពាណិជ្ជកម្ម។

គួរគូសបញ្ជាក់ថា សហរដ្ឋអាមេរិកដាក់ពន្ធគយបដិការ ៣៦ ភាគរយ លើទំនិញនាំចូលពីប្រទេសថៃ ដែលមានអតិរេកពាណិជ្ជកម្មប្រមាណ ៤៥,៦ ប៊ីលានដុល្លារ កាលពីឆ្នាំ ២០២៤៕