ចិន អាមេរិក សម្រេចកិច្ចព្រមព្រៀងពាណិជ្ជកម្ម ពាក់ព័ន្ធនឹង​រ៉ែកម្រ

សហរដ្ឋអាមេរិក និងចិនបានបញ្ជាក់ពី​ការសម្រេច​បាន​កិច្ចព្រមព្រៀងពាណិជ្ជកម្មដែលផ្ដោតលើការបន្ធូរបន្ថយលើការរឹតត្បឹតការនាំចេញរ៉ែកម្ររបស់ចិន និងការនាំចេញបច្ចេកវិទ្យារបស់សហរដ្ឋ​អាមេរិក​។​ នេះបើតាមការចុះផ្សាយរបស់បណ្ដាញទូរទស្សន៍ CNBC។

អ្នកនាំពាក្យរបស់ក្រសួងពាណិជ្ជកម្មចិន​ បាននិយាយ​ក្នុងសេចក្តីថ្លែងការណ៍​ថា ​ចិននឹងពិនិត្យមើល​ និងបន្តអនុម័តលើពាក្យស្នើសុំនាំចេញសម្រាប់ទំនិញដែលស្ថិតនៅក្រោមច្បាប់ត្រួតពិនិត្យការនាំចេញ ខណៈ​​សហរដ្ឋអាមេរិកនឹងលុបចោលវិធានការរឹតបន្តឹងដែលមានស្រាប់ ដែលខ្លួនដាក់ឡើងដើម្បីប្រឆាំងចិន​។ ​​

សេចក្ដីថ្លែងការណ៍​ដែលមិនបញ្ជាក់លម្អិតបន្ថែមដដែល បាន​ចេញផ្សាយឡើង ក្រោយប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយនៅសេតវិមាន​កាលពីថ្ងៃព្រហស្បតិ៍ថា៖ «យើងទើបតែចុះ​កិច្ចព្រមព្រៀង​ជាមួយចិនកាលពីម្សិលមិញ»។ ក្រោយមកមន្ត្រីសេតវិមានបានបំភ្លឺថា រដ្ឋបាល ត្រាំ និង​ចិនបានយល់ព្រមលើ «ការយល់ដឹងបន្ថែមអំពីក្របខ័ណ្ឌ​ ដើម្បីអនុវត្តកិច្ចព្រមព្រៀងទីក្រុង​ហ្សឺណែវ​»។​

ការយល់ដឹងអំពីពាណិជ្ជកម្ម នឹងរួមបញ្ចូលបទប្បញ្ញត្តិសម្រាប់​ចិនក្នុងការផ្គត់ផ្គង់វត្ថុធាតុកម្រដល់សហរដ្ឋអាមេរិក ខណៈ​អាមេរិកនឹងលុបចោលការរឹតបន្តឹងលើការនាំចេញអេតានទៅ​ចិន ក្នុងចំណោមការព្រមព្រៀងផ្សេងៗទៀត​។

គូរគូសបញ្ជាក់ថា នៅខែមិថុនានេះ រដ្ឋមន្ត្រីក្រសួងរតនាគារសហរដ្ឋអាមេរិក លោក​ Scott Bessent និងឧបនាយករដ្ឋមន្ត្រីចិន លោក​ He Lifeng បានដឹកនាំកិច្ចចរចាពាណិជ្ជកម្មនៅទីក្រុងឡុងដ៍ ហើយឈានដល់កិច្ចព្រមព្រៀងមួយ ដើម្បីអនុវត្តអ្វីដែលភាគីទាំងព្រមព្រៀងគ្នា​នៅទីក្រុងហ្សឺណែវ កាលពីពាក់កណ្ដាលខែឧសភា។ ​

កិច្ចព្រមព្រៀងទីក្រុងឡុងដ៍បានជួយបន្ធូរបន្ថយភាពតានតឹងរវាងប្រទេសទាំង២ ដែលបានស្តីបន្ទោសគ្នាទៅវិញទៅមកចំពោះការបំពានកិច្ចព្រមព្រៀងពាណិជ្ជកម្ម​ក្រុងហ្សឺណែវ។ ​ការព្រមព្រៀងនៅ​ក្រុង​ហ្សឺណែវ រួមមានការផ្អាករយៈពេល ៩០ ថ្ងៃលើពន្ធ​អត្រាខ្ពស់ និងផែនការ​បន្ធូរបន្ថយការរឹតបន្តឹងពាណិជ្ជកម្មមួយចំនួន។

​យ៉ាងណាមិញ កិច្ចព្រមព្រៀងនេះត្រូវបាន​ជាប់គាំង ​នៅពេលចិនពន្យារពេល​បន្ធូរបន្ថយការរឹតត្បឹត​ការនាំចេញរ៉ែកម្រ ដែលគេប្រើ​ក្នុងផលិតផលបច្ចេកវិទ្យាខ្ពស់ ដូចជារថយន្តអគ្គិសនី និងបន្ទះឈីបជាដើម​។​ ជាមួយ​គ្នានោះ សហរដ្ឋអាមេរិកក៏បានបង្កើនការរឹតបន្តឹងលើបច្ចេកវិទ្យា និងហាមឃាត់ទិដ្ឋាការសម្រាប់សិស្សចិនផងដែរ៕ ​