ត្រាំ ថាចិនអាចបន្តទិញប្រេងអ៊ីរ៉ង់ តែសេតវិមានបញ្ជាក់ថា វាមិនមែនជាការសម្រាលទណ្ឌកម្មលើអ៊ីរ៉ង់ទេ

ប្រធានាធិបតីសហរដ្ឋអាមេរិក លោក ដូណាល់ ត្រាំ បាន​និយាយកាលពីថ្ងៃអង្គារថា ​ចិនអាចបន្តទិញប្រេងពីអ៊ីរ៉ង់ ​ប៉ុន្តែសេតវិមានបាន​បញ្ជាក់ថា នោះមិនមែនជាការបង្ហាញពីការបន្ធូរបន្ថយទណ្ឌកម្ម​អាមេរិកលើ​អ៊ីរ៉ង់នោះទេ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

លោក ត្រាំ បាននិយាយក្នុងសារបង្ហោះនៅលើបណ្ដាញសង្គម Truth Social ថា៖ «ឥឡូវនេះចិនអាចបន្តទិញប្រេងពីអ៊ីរ៉ង់។ សង្ឃឹមថាពួកគេនឹងទិញប្រេងឱ្យ​ច្រើនពីសហរដ្ឋអាមេរិកយើងផងដែរ»។

ការថ្លែងយ៉ាងដូច្នេះរបស់លោក ធ្វើឡើងក្រោយអ៊ីស្រាអែល និងអ៊ីរ៉ង់សម្រេច​បាន​បទឈប់បាញ់ជុំវិញជម្លោះចុងក្រោយ ដោយមានការចូលរួមពីសហរដ្ឋអាមេរិក ដែលទម្លាក់គ្រាប់បែកលើទីតាំងហេដ្ឋរចនាសម្ព័ន្ធនុយក្លេអ៊ែរអ៊ីរ៉ង់ចំនួន៣កន្លែង​។ ការបើកផ្លូវឱ្យចិន​យ៉ាងដូច្នេះ បាន​បង្កការភ្ញាក់ផ្អើលមួយចំនួន ដោយអ្នកវិភាគលើកឡើងថា វាអាច​ជាការផ្លាស់ប្ដូរគោលនយោបាយរបស់អាមេរិក​ចំពោះអ៊ីរ៉ង់ ព្រោះកន្លងមក លោក ត្រាំ ធ្លាប់បាន​គំរាមកាត់ផ្ដាច់ការនាំចេញប្រេងរបស់អ៊ីរ៉ង់ឱ្យធ្លាក់ដល់សូន្យ ដើម្បីទប់ស្កាត់កម្មវិធីនុយក្លេអ៊ែររបស់ប្រទេសនេះ។

យ៉ាងណាមិញ មន្រ្តីជាន់ខ្ពស់សេតវិមានម្នាក់ បាន​ប្រាប់រ៉យទ័រថា ​អ្វីដែលលោក ត្រាំ លើកឡើង គឺដើម្បី​ចង្អុលបង្ហាញថា អ៊ីរ៉ង់មិនបានព្យាយាមបិទច្រកសមុទ្រ Hormuz នោះទេ ព្រោះវា​អាចធ្វើឱ្យប៉ះពាល់ដល់ប្រទេសចិន ដែលជាអ្នកទិញប្រេងដ៏ធំបំផុតរបស់អ៊ីរ៉ង់នោះទេ។ មន្រ្តីដដែលបន្តថា លោក ​ត្រាំ ចង់ឱ្យ​ចិន និងប្រទេសផ្សេងទៀតទិញប្រេងរបស់សហរដ្ឋអាមេរិក ជំនួសឱ្យការរំលោភលើទណ្ឌកម្មដោយការទិញពីប្រទេសអ៊ីរ៉ង់។

គួរគូសបញ្ជាក់ថា បន្ទាប់ពីបទឈប់បាញ់​រវាងអ៊ីស្រាអែល និងអ៊ីរ៉ង់ប្រកាសឡើង ​អ្វីដែលលោក ត្រាំ បាន​លើកឡើង បាន​ជួញជំរុញឱ្យតម្លៃប្រេងអន្តរជាតិ ធ្លាក់ចុះជិត ៦ ភាគរយ ពេលបញ្ចប់ការជួញដូរកាលពីថ្ងៃអង្គារ។ ​

លោក ត្រាំ បានដាក់ទណ្ឌកម្មជាច្រើនលើរោងចក្រចម្រាញ់ប្រេង និងប្រតិបត្តិករកំពង់ផែតូចៗមួយចំនួនរបស់ចិន ចំពោះការទិញប្រេងអ៊ីរ៉ង់ ខណៈចិន​ហៅទណ្ឌកម្មរបស់អាមេរិកថា ចំណាត់ការឯកតោភាគីខុសច្បាប់។ ​យ៉ាងណាមិញ ពាណិជ្ជករប្រេង និងអ្នកវិភាគនៅអាស៊ីមិនគិតថា ការលើកឡើងរបស់គាត់នឹងផ្លាស់ប្តូរទម្លាប់ទិញប្រេងរបស់ចិនក្នុងរយៈពេលខ្លីនោះទេ។

រហូតមកដល់ពេលនេះ អ៊ីរ៉ង់រួមចំណែកប្រហែល ១៣,៦ ភាគរយ នៃការនាំចូលប្រេងរបស់ចិន ​ដោយ​សារ​តែ​វា​មានតម្លៃថោក និងអាចជួយឱ្យរោងចក្រចម្រាញ់ប្រេងតូចៗចិនសន្សំប្រាក់។ ផ្ទុយទៅវិញ ប្រេងរបស់អាមេរិក រួមចំណែកត្រឹមតែ ២ ភាគរយ ប៉ុណ្ណោះ នៃការនាំចូលរបស់ចិន៕ ​