Nike គ្រោង​បន្ថយការពឹងផ្អែកផលិតកម្មនៅចិន សម្រាប់ការនាំចេញទៅអាមេរិក

ក្រុមហ៊ុនផលិតស្បែកជើង និងសំលៀកបំពាក់កីឡា Nike បាននិយាយថា ខ្លួននឹងកាត់បន្ថយការពឹងផ្អែក​លើផលិតកម្មចិនសម្រាប់ទីផ្សារសហរដ្ឋអាមេរិក ដើម្បីកាត់បន្ថយផលប៉ះពាល់ពីពន្ធរបស់សហរដ្ឋ​អាមេរិកលើការនាំចូល។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

បណ្ដានាយកប្រតិបត្តិក្រុមហ៊ុន Nike បាននិយាយថា ពន្ធរបស់ប្រធានាធិបតីអាមេរិក លោក ដូណាល់ ត្រាំ លើដៃគូពាណិជ្ជកម្មសំខាន់ៗ អាច​បង្កើនការចំណាយ​របស់ Nike ប្រហែល ១ ​ប៊ីលានដុល្លារ ចំពេលដែលសង្រ្គាមពាណិជ្ជកម្មពន្ធគយរវាងចិន និងសហរដ្ឋអាមេរិកបន្តអូសបន្លាយ។

​ចិនដែលរងការដាក់ពន្ធអាមេរិក ១៤៥ ភាគរយ (បច្ចុប្បន្នត្រូវបានបន្ថយជាបណ្ដោះអាសន្នមកនៅត្រឹម ៣០ ភាគរយ) ​រួមចំណែកដល់ការផ្គត់ផ្គង់ស្បែកជើង Nike ប្រហែល ១៦ ភាគរយ លើការនាំចូលទៅសហរដ្ឋអាមេរិក​របស់ក្រុមហ៊ុន។ ​

យ៉ាងណាមិញ ប្រធានផ្នែកហិរញ្ញវត្ថុរបស់ក្រុមហ៊ុន Nike លោក Matthew Friend បាននិយាយថា ក្រុមហ៊ុនគ្រោងនឹងកាត់បន្ថយតួលេខនេះ ​មកនៅត្រឹម​ខ្ទង់រាយ ​គិតត្រឹមខែឧសភា ឆ្នាំ​ក្រោយ​។ ដើម្បីធ្វើដូច្នេះបាន ក្រុមហ៊ុន Nike កំពុងផ្លាស់ប្តូរទីតាំងផលិតកម្មពីប្រទេសចិនទៅកាន់ប្រទេសផ្សេងទៀត និងកែសម្រួលយុទ្ធសាស្ត្រប្រភពផ្គត់ផ្គង់វត្ថុធាតុដើម។

ដើម្បីគ្រប់គ្រង​កំណើននៃការចំណាយ ​ក្រុមហ៊ុន Nike កំពុងសម្លឹងមើលដំណោះស្រាយផ្សេងៗ រួមទាំងការផ្លាស់ប្តូរផលិតកម្ម វាយតម្លៃការកាត់បន្ថយថ្លៃដើមរបស់ក្រុមហ៊ុន និង​បង្កើនតម្លៃផលិតផលនៅ​សហរដ្ឋអាមេរិក។

ជាមួយ​គ្នានោះ Nike គិតថា ក្រុមហ៊ុន​ម៉ាកសម្លៀកបំពាក់កីឡាផ្សេងទៀតនឹងដំឡើងតម្លៃផងដែរ ដែលនោះនឹង​មានន័យថា Nike ប្រហែលជាមិនបាត់បង់ចំណែកទីផ្សារច្រើនទេ បើទោះបីជាតម្លៃផលិតផលខ្លួន​កើនឡើងក៏ដោយ។

​