មិនខុសពីឥណ្ឌូនេស៊ី ហ្វីលីពីនជួបគ្រោះរញ្ជួយដីដ៏ខ្លាំងក្លាផងដែរ

ការរញ្ជួយដីកម្រិត ៧ រ៉ិចទ័របានវាយប្រហារភាគខាងត្បូងប្រទេសហ្វីលីពីន ប៉ុន្តែមិនទាន់មានសេចក្តីរាយការណ៍អំពីការខូចខាត និងការព្រមានពីរលកយក្សស៊ូណាមិនៅឡើយទេ ។

ការរញ្ជួយដីនេះបានវាយប្រហារចម្ងាយ ៣១០ គីឡូម៉ែត្រ ភាគអាគ្នេយ៍ទីក្រុង Davao នៅលើកោះ Mindanao ភាគខាងត្បូងនៅម៉ោង ៨ និង ២៣ យប់ ។ នេះបើយោងតាមការស្ទាបស្ទង់ភូមិសាស្ត្រអាមេរិក (USGS) ។

ប្រធានប៉ូលិសលោក Glabynarry Murillo បានប្រាប់ទីភ្នាក់ងារសារព័ត៌មាន AFP ថា អ្នកស្រុកនៅទីប្រជុំជន Jose Abad Santos ជិតភាគខាងត្បូងនៃកោះបានបាត់បង់អគ្គិសនីប្រើប្រាស់រយៈពេលប្រហែល ១៥ នាទី បន្ទាប់ពីការរញ្ជួយដីបានរំញ័រក្នុងតំបន់ ប៉ុន្តែមិនមានការខូចខាតទេ ។

ចំណែកលោក Renato Solidum នាយកវិទ្យាស្ថានបានប្រាប់ស្ថានីយ៍វិទ្យុ DZBB ថា “វាត្រូវបានគេដឹងថាជាការរញ្ជួយដីដ៏ធំ ប៉ុន្តែវាជម្រៅរបស់វានឹងមិនធ្វើឲ្យខូចខាតដល់ហេដ្ឋារចនាសម្ព័ន្ធទេ ពីព្រោះវានៅឆ្ងាយពីកោះនេះណាស់ ហើយអ្វីៗបានវិលមករកភាពប្រក្រតី ខណៈប្រជាជនបានវិលត្រឡប់ទៅផ្ទះវិញហើយផងដែរ” ។

ក្នុងប៉ុន្មានឆ្នាំថ្មីៗនេះតំបន់ភាគខាងត្បូងនៃទីក្រុង Davao ត្រូវបានបំផ្លាញដោយការរញ្ជួយដីដ៏មានឥទ្ធិពលដោយសារប្រទេសហ្វីលីពីនស្ថិតនៅតំបន់ខ្សែក្រវ៉ាត់ភ្លើងនៃមហាសមុទ្រប៉ាស៊ីហ្វិក “Ring of Fire” ជាកន្លែងដែលការរញ្ជួយដីភាគច្រើននៅលើពិភពលោកកើតឡើង ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ដោះស្រាយករណីនារីអូតែសមិនចេញ ហ្វីលីពីនបញ្ជាឲ្យដកមេប៉ូលិសក្រុង Makati

ចុចអាន ៖ ការធ្វើកោសល្យវិច្ច័យលើសពនារីអូតែសហ្វីលីពីន ត្រូវបិទបញ្ចប់