ព័ត៌មានអន្ដរជាតិ

តើគ្រោះរញ្ជួយដីកើតនៅមីយ៉ាន់ម៉ាប៉ះពាល់និងជះឥទ្ធិពលដល់ណាខ្លះ?

បានផុស

១ ថ្ងៃ មុន

នៅ

ថ្ងៃសុក្រ ២៨ មីនា ២០២៥

ដោយ

គ្រោះរញ្ជួយដីមានកម្រិតកម្លាំងដល់ទៅ៧,៧រិចទ័របានវាយប្រហារភាគកណ្តាលប្រទេសមីយ៉ាន់ម៉ាកាលពីថ្ងៃទី២៨ខែមីនា ឆ្នាំ២០២៥ បណ្តាលឱ្យមានការបំផ្លិចបំផ្លាញ និងបាត់បង់ជីវិតនៅទូទាំងតំបន់អាស៊ាន។ រញ្ជួយដីនេះមិនត្រឹមតែប៉ះពាល់ដល់ប្រទេសជិតខាងក្នុងតំបន់អាស៊ានទេ ប៉ុន្តែជះឥទ្ធិពលដល់ ចិន និងទៅអាស៊ីខាងត្បូងដល់បង់ក្លាដែស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផលប៉ះពាល់នៅក្នុងប្រទេសមីយ៉ាន់ម៉ា៖ ទីក្រុង Mandalay ជាចំណុចកណ្តាលនៃការវាយប្រហាយដោយគ្រោះរញ្ជួយដី។ ផលប៉ះពាល់នៅក្នុងប្រទេសមីយ៉ាន់ម៉ា បណ្តាលឲ្យមានការបាក់រលំវិហារមួយ និងបានបណ្តាលឱ្យមនុស្សស្លាប់ និងរបួសរាប់សិបនាក់ ក្នុងនោះក៏មានព្រះសង្ឃជាច្រើនអង្គផងដែរ ដោយសារការដួលរលំនៃវត្តមួយ។ អគារជាច្រើនត្រូវបានគេរាយការណ៍ថាបានដួលរលំ។ ផ្លូវថ្នល់ ស្ពាន ពិដានអគារ បានរងការខួចខាតយ៉ាងដំណំ និងខូចខាតផ្ទះសម្បែង និងទីសក្ការបូជាសាសនាជាច្រើនកន្លែង។ ស្ពានប្រវត្តិសាស្រ្ត Ava ឆ្លងកាត់ទន្លេ Irrawaddy ដ៏ធំដែលជារចនាសម្ព័ន្ធសម័យអាណានិគមបានដួលរលំកំឡុងពេលរញ្ជួយដីនោះដែរ។

ទីក្រុងបាងកកប្រទេសថៃ៖ អគារខ្ពស់ៗរាប់សិបជាន់ជាច្រើនបានរងផលប៉ះពាល់ ដូចជារង្គើ ញ័រ និងមានអគារកំពុងសាងសង់មួយមានកម្ពស់ប្រមាណជាង៣០ជាន់នៅជិតផ្សារ Chatuchak បានដួលរលំ។ ក្នុងអគារនោះ ត្រូវបានរាយការណ៍ថា មានកម្មកររហូតជិត៥០នាក់ ជាប់គាំង និងមានរបាយការណ៍បឋមភ្លាមៗ អះអាងថា កម្មករម្នាក់បានស្លាប់។ រដ្ឋាភិបាលថៃបានប្រកាសដាក់រដ្ឋក្នុងភាពអាសន្នក្នុងរដ្ឋធានីបាងកក។

ភាពរំញ័រនៃអគារបានរំកិលចុះឡើងបានបង្កឱ្យមានការភ័យស្លន់ស្លោក្នុងចំណោមអ្នកស្រុក និងភ្ញៀវទេសចរ ដែលនាំឱ្យមានការជម្លៀសចេញ។ សេវារថភ្លើងក្រោមដី និងផ្លូវរថភ្លើងស្រាលត្រូវបានផ្អាកមួយផ្នែក ហើយការជួញដូរនៅផ្សារហ៊ុនថៃត្រូវបានបញ្ឈប់ជាបណ្តោះអាសន្ន។

ប្រទេសចិន៖ នៅខេត្តយូណាន របស់ប្រទេសចិន ដែលជាប់ព្រំដែនជាមួយថៃនិងមីយ៉ាន់មាន ក៏ទទួលរងឥទ្ធិពលរញ្ជួយដីដែរ ដោយបណ្តាលឲ្យមានអ្នករងរបួស និងខូចខាតផ្ទះសម្បែងនៅក្នុងទីក្រុងRuili ក្បែរព្រំដែន ។

ប្រទេសវៀតណាម៖ នៅទីក្រុង ហាណូយ និងទីក្រុងហូជីមិញ មានសេចក្តីរាយការណ៍ខ្លះថា អ្នកស្រុកបានជួបប្រទះនឹងការរញ្ជួយ ដែលនាំទៅដល់ការជម្លៀសចេញពីអគារ។ ការឆ្លើយតបដែលកំពុងបន្ត ខណៈប្រតិបត្តិការជួយសង្គ្រោះកំពុងដំណើរការនៅក្នុងតំបន់ដែលរងផលប៉ះពាល់។

ទីក្រុងដាកាប្រទេសបង់ក្លាដែស ដែលមានចម្ងាយ៥៩៧គីឡូម៉ែត្រពីចំណុចកណ្តាល(ចំណុចផ្ចិត)នៃគ្រោះរញ្ជួយដីនៅមីយ៉ាន់ម៉ា ក៏ត្រូវបានដឹងថា មានផលប៉ះពាល់ដែរ។ លោក Prothom Alo បានដកស្រង់សម្តីលោក Md Rubayat Kabir មន្ត្រីស្តីទីនៃមជ្ឈមណ្ឌលសង្កេត និងស្រាវជ្រាវការរញ្ជួយដីនៅនាយកដ្ឋានឧតុនិយម បាននិយាយថា ការរញ្ជួយដីកម្រិត ៧,៧ត្រូវបានចាត់ថ្នាក់ជាព្រឹត្តិការណ៍រញ្ជួយដីដ៏ធំមួយ។

អាជ្ញាធរមីយ៉ាន់ម៉ា និងថៃកំពុងវាយតម្លៃពីទំហំពេញលេញនៃការខូចខាត និងសម្របសម្រួលកិច្ចប្រឹងប្រែងជួយសង្គ្រោះ។ មជ្ឈមណ្ឌលព័ត៌មានរញ្ជួយដីអាស៊ានកំពុងតាមដានស្ថានភាព និងផ្តល់ព័ត៌មានថ្មីៗ…៕

ដោយ រ៉ាន់ រើយ