Connect with us

ព័ត៌មានជាតិ

កសិករខេត្តត្បូងឃ្មុំ ចាប់ផ្ដើមអនុវត្តការបង្កបង្កើនផលស្រូវ ដើមរដូវវស្សាឆ្នាំនេះបានជិត ១២ភាគរយហើយ

បានផុស

នៅ

នៅដើមរដូវវស្សាឆ្នាំនេះ កសិករនៅខេត្តត្បូងឃ្មុំ ចាប់ផ្ដើមភ្ជួររាស់ដី ដើម្បីបង្កបង្កើនផលស្រូវចំនួន ៣ប្រភេទ គឺមានស្រូវ​ស្រាល ស្រូវកណ្តាល និងស្រូវធ្ងន់ បានជិត ១២ភាគរយហើយ គិតត្រឹមថ្ងៃទី ៩ ខែឧសភា ឆ្នាំ ២០២២នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ផាន់ អ៊ាន អាយុ ៥៨ឆ្នាំ រស់នៅភូមិស្នាកណ្តាល ឃុំដូនតី ស្រុកពញាក្រែក ខេត្តត្បូងឃ្មុំ បានឲ្យដឹងថា គ្រួសារគាត់ ក៏ដូចកសិករក្នុងភូមិដែរ គឺនិយមដាំស្រូវរំដួលណាស់ ព្រោះវាបរិភោគមានរសជាតិឆ្ងាញ់ មានទីផ្សារលក់ដូរស្រួល។ ក្នុងចំណោមប្រជាពលរដ្ឋជាង ៣០០គ្រួសារ គឺពី ៦០ទៅ ៧០ភាគរយ ដែលបានដាំស្រូវរំដួលនេះ។

សម្រាប់ឆ្នាំនេះ អាកាសធាតុ មិនសូវអំណោយផលទេ ដោយមិនសូវមានភ្លៀង អ្នកស្រីបានសាបព្រួសស្រូវចំនួន ២ដងរួចមកហើយ តែស្រូវមិនសូវដុះសោះ មូលហេតុមេឃក្តៅពេក។ ចំពោះពូជស្រូវនេះក្នុង ១គីឡូក្រាមតម្លៃ ២៥០០ ទៅ ៣០០០រៀល ក្នុងដីទំហំ ៣០អា អាចប្រើពូជ ៥០គីឡូក្រាមផងដែរ។

លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ បានឲ្យដឹងដែរថា កសិ​ករក្នុងខេត្តត្បូងឃ្មុំ បានដាំដុះដូចជា ពូជស្រូវ ៥១.៥៤.៤៩ សែនពិដោរ និងស្រូវរំដួល ហើយក៏មានពូជស្រូវក្នុងស្រុក ផងដែរ។ ចំពោះការបង្កបង្កើនផលរដូវវស្សាឆ្នាំនេះ កសិករអនុវត្តភ្ជួររាស់សម្រេច បាន ៨ ៨០០ ហិកតា ស្មើនឹង ១១,៥២% នៃផែនការដាំដុះ និងដាំដុះស្រូវវស្សាសម្រេចបាន ៥ ៦៤៥ហិកតា ស្មើនឹង ៧,៣៩% នៃផែនការដាំដុះស្មើនឹង ៦៤,១៥% នៃផ្ទៃដីភ្ជួររាស់។

ក្នុងនោះស្រូវស្រាល បានចំនួន ២ ៥៧៥ហិកតា ស្រូវ កណ្តាលបានចំនួន ២ ១៥០ហិកតា និងស្រូវ ធ្ងន់បានចំនួន ៩២០ហិកតា។ លោកប្រធានមន្ទីរ បានឲ្យដឹងទៀតថា ក្នុងចំណោម ៧ស្រុក/ក្រុង នៃខេត្តត្បូងត្បូងឃ្មុំ មាន ២ស្រុក ដែលបានភ្ជួររាស់ដីបង្កបង្កើនផលស្រូវ បានច្រើនជាងគេ គឺស្រុកត្បូងឃ្មុំ និងស្រុកពញាក្រែក ហើយរាល់ការដាំដុះកម្លាំងមន្ទីរតែងចុះណែនាំ ផ្តល់បច្ចេកទេស ការប្រើប្រាស់ជី ការកំចាត់សត្វល្អិត និងការជ្រើសរើសពូជ ព្រមទាំងបាន ផ្សព្វផ្សាយដល់កសិករជានិច្ច៕

អត្ថបទ៖ សាន វិឡែម

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម