ព័ត៌មានជាតិ

ពលរដ្ឋឃុំរការពប្រាំ នឹងទទួលបានប្រឡាយទឹក ១ ខ្សែ ប្រវែងជិត ១ ៥០០ ម៉ែត្រ នាពេលខាងមុខ

បានផុស

១១ ខែ មុន

នៅ

ថ្ងៃព្រហស្បតិ៍ ៥ មិថុនា ២០២៥

ដោយ

អ៊ិន ពិសី

ប្រជាពលរដ្ឋរស់នៅក្នុងឃុំរការពប្រាំ ស្រុកត្បូងឃ្មុំ នឹងទទួលបានប្រឡាយទឹក ១ ខ្សែ ប្រវែងជិត ១ ៥០០ ម៉ែត្រ នាពេលខាងមុខនេះ។

កាលពីព្រឹកថ្ងៃទី ៤ ខែមិថុនា ឆ្នាំ ២០២៥ ម្សិលមិញនេះ ការប្រជុំបើកសំណើដេញថ្លៃគម្រោង នៅឃុំរការពប្រាំ ស្រុកត្បូងឃ្មុំ បានប្រព្រឹត្តទៅតាមនីតិវិធី ក្រោមការឃ្លាំមើលពីកម្លាំងទីចាត់ការផែនការវិនិយោគខេត្ត រដ្ឋបាលស្រុកត្បូងឃ្មុំ និងអ្នកសង្កេតការណ៍សារព័ត៌មានជាច្រើនអង្គភាពផងដែរ។

កិច្ចប្រជុំនេះ មានក្រុមហ៊ុនចំនួន ១៧ បានចូលរួមប្រកួតប្រជែងដោយសេរី យុត្តិធម៌ តម្លាភាព។ ភាពស្របច្បាប់ បានទៅក្រុមហ៊ុន វេង ស្រ៊ុន ដែលហ៊ានដេញតម្លៃទាបជាងគេ ហើយទទួលបានសិទ្ធិក្នុងការស្តារប្រឡាយ ១ ខ្សែ ប្រវែងជិត ១ ៥០០ ម៉ែត្រ ប្រយោជន៍ស្តុកទឹក ដើម្បីយកទឹកទៅស្រោចស្រពដំណាំកសិកម្មរបស់ប្រជាពលរដ្ឋក្នុងឃុំទាំងមូល។

លោក យ៉ឹម ចិន្តា ជាប្រធានគណៈកម្មការលទ្ធកម្មឃុំ បានបញ្ជាក់ថា ជ្រើសរើសអ្នកទទួលការជាសាធារណៈតាមរយៈការប្រកួតប្រជែងមានលក្ខណៈត្រឹមត្រូវ និងយុត្តិធម៌។ ជ្រើសរើសរកអ្នកទទួលការដែលដាក់តម្លៃដេញទាបជាងគេ ធានាបាននូវគុណភាព និងនិរន្តភាពគម្រោង។ ផ្តល់ឱកាសស្មើៗ គ្នា ដល់អ្នកទទួលការ ដើម្បីចូលរួមនៅក្នុងដំណើរការដេញថ្លៃក្រោមលក្ខខណ្ឌត្រឹមត្រូវ និងស្មើភាព។ បង្ហាញដល់ប្រជាពលរដ្ឋគ្រប់រូបបានឃើញ និងដឹងពិតប្រាកដថា នីតិវិធីទាំងឡាយត្រូវបានគោរព និងធ្វើតាមយ៉ាងត្រឹមត្រូវ ប្រកបដោយតម្លាភាព និងសន្សំសំចៃ។ ប្រកាសជាសាធារណៈឲ្យប្រជាពលរដ្ឋនៅមូលដ្ឋាន (អ្នកទទួលការ) បានដឹងថា គម្រោងអភិវឌ្ឍន៍របស់ខ្លួនកំពុងដំណើរការហើយ។

លោកមេឃុំ បន្តទៀតថា បន្ទាប់ពីក្រុមហ៊ុនដេញថ្លៃ បានទៅលើក្រុមហ៊ុន វេង ស្រ៊ុន តម្លៃទាបជាងគេ គឺ ៥៣ លានរៀល ក្នុងតម្លៃប៉ាន់ស្មាន ជិត ២៥០ លានរៀល នោះហើយទទួលបានសិទ្ធិក្នុងការស្តារប្រឡាយទឹក ១ ខ្សែ ប្រវែងជិត ១ ៥០០ ម៉ែត្រ បាតតូច ៨ ម៉ែត្រ និងជម្រៅជិត ២ ម៉ែត្រកន្លះ។ កសិករ អាចយកទឹកទៅស្រោចស្រពលើផ្ទៃដីក្នុងឃុំទាំងមូល។ ក្តីរំពឹងរបស់ឃុំ ឆ្នាំក្រោយ ប្រជាពលរដ្ឋ នឹងផលិតការងារកសិកម្មបានល្អក្នុងទិន្នផលខ្ពស់ជាងរាល់ឆ្នាំ នាពេលកន្លងមក៕

អត្ថបទ ៖ សាន វិឡែម