ព័ត៌មានជាតិ
យល់ដឹងអំពីការប្រើប្រាស់ប្រាក់រៀល និងប្រាក់ដុល្លារ នៅលើទីផ្សារអចលនទ្រព្យ និងសេដ្ឋកិច្ចកម្ពុជា
ប្រាក់រៀលមានសារៈសំខាន់ក្នុងការលើកស្ទួយអត្តសញ្ញាណជាតិ។ ជាមួយគ្នានេះ ប្រាក់ដុល្លារក៏បានជួយកំណើនសេដ្ឋកិច្ច តាមរយៈការធ្វើពាណិជ្ជកម្មនាំចេញនាំចូល និងជំនួញជួញដូរផ្សេងៗផងដែរ។
លោក ឡោ វិចិត្រ ប្រធានសមាគមអចលនទ្រព្យសកល រាជធានីភ្នំពេញ បានលើកឡើងថា ការទិញលក់អចលនទ្រព្យ ដោយប្រើប្រាស់ប្រាក់ដុល្លារ មានស្ថិរភាពប្រសើរជាង ប្រាក់រៀល ដោយសារប្រាក់ដុល្លារ ជារូបិយបណ្ណមានលំនឹង និងត្រូវបានប្រើប្រាស់ជាសកល។ លើសពីនេះទៀត លោកថា ប្រាក់ដុល្លារបានបង្កើនភាពទាក់ទាញអ្នកវិនិយោគពីបរទេសឱ្យមកទិញអចលទ្រព្យនៅកម្ពុជា។
លោកលើកឡើងដូច្នេះថា« រូបិយបណ្ណដុល្លារ មានលំនឹងជាងគេ ប្រើប្រាស់ទូលាំទូលាយជាងគេ ក៏ដូចជា មានតម្លៃល្អ ពិសេសនៅក្នុងវិបត្តិកូវីដ-១៩ យើងឃើញរូបិយវត្ថុជាច្រើនបានធ្លាក់ថ្លៃ រួមមាន រូបិយវត្ថុផោនរបស់អង់គ្លេស, យ៉េន(ជប៉ុន), បាត(ថៃ), លុយដុង(វៀតណាម), និងប្រាក់អឺរ៉ូ ជាដើម»។ ដោយឡែកប្រាក់ដុល្លារ នៅតែរក្សាតម្លៃល្អ។
បើតាមអ្នកជំនាញអចលទ្រព្យរូបនេះ ចំណុចសំខាន់មួយទៀត ការទិញលក់អចលទ្រព្យ ឬរបស់ដែលមានតម្លៃថ្លៃ ដូចជាទិញរថយន្តជាដើម គេប្រាកដជាប្រើប្រាស់ប្រាក់ដុល្លារ ព្រោះងាយស្រួលក្នុងការគណនា។ បើទោះជា លោក ឡោ វិចិត្រ មើលឃើញថា ការប្រើប្រាស់ប្រាក់ដុល្លារ មានភាពចាំបាច់ និងងាយស្រួលយ៉ាងនេះក្តី តែលោកក៏បានជំរុញឱ្យមានការបង់ពន្ធប្រថាប់ត្រា ឬពន្ធអចលនទ្រព្យ គិតជាលុយរៀលដូចបច្ចុប្បន្ន ដើម្បីបង្កើននូវកិត្យានុភាព ក្នុងការប្រើប្រាស់រូបិយវត្ថុជាតិ។
ងាកទៅមើលជ្រុងសេដ្ឋកិច្ចវិញ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកហេតុផលថា ជាគោលការណ៍ច្បាប់ ប្រទេសជាតិមួយត្រូវប្រើរូបិយវត្ថុរបស់ខ្លួន ទើបធានាបានចរន្តសេដ្ឋកិច្ចប្រចាំថ្ងៃ ប្រចាំខែ និងប្រចាំឆ្នាំ។ លោកបានគូសបញ្ជាក់ថា រូបិយវត្ថុជាតិមានតួនាទីសំខាន់ ក្នុងការរក្សាកំណើន និងប្រើប្រាស់សម្រាប់តម្រូវការផ្សេងៗគ្រប់វិស័យទាំងអស់។ ដោយឡែកនៅកម្ពុជា រដ្ឋបានអនុញ្ញាតឱ្យប្រើប្រាស់ប្រាក់ដុល្លារ សម្រាប់ចរាចរណ៍នៅក្នុងទីផ្សារទាំងតូចទាំងធំ។ ត្រង់ចំណុចនេះ លោកបណ្ឌិត ហុង វណ្ណៈ បានលើកឡើងថា កម្ពុជា ឆ្លងកាត់សង្រ្គាមស៊ីវិលបន្តបន្ទាប់ ដែលដាននៃសង្គ្រាមនេះ ធ្វើឱ្យប្រាក់រៀលអាក់ខានក្នុងការប្រើប្រាស់ឱ្យមាននិរន្តរភាព។
ចាប់ពីឆ្នាំ ១៩៩៣ ប្រាក់ដុល្លារបានចរាចរណ៍ខ្លាំងចូលទីផ្សារកម្ពុជា ពោលគឺនៅក្នុងអំឡុងពេលអ៊ុនតាក់ចូលមកជួយរៀបចំការបោះឆ្នោត។ លោក ហុង វណ្ណៈ លើកឡើងថា ពេលនោះជំនួញជួញដូរ ទិញលក់ផ្សេងៗ និងការសន្សំទុកក្នុងខ្លួន គឺភាគច្រើនប្រើប្រាស់ប្រាក់ដុល្លារ។ លោកមើលឃើញថា ក្រោយមករដ្ឋក៏មានគោលការណ៍ក្នុងការកាត់បន្ថយការប្រើប្រាស់ប្រាក់ដុល្លារផងដែរ ប៉ុន្តែមិនសូវមានប្រសិទ្ធភាពខ្លាំង និងមិនហ៊ានដកចេញ ដោយសារប្រាក់រៀល មិនទាន់មានការទទួលស្គាល់ពីបណ្តាទីផ្សារអន្តរជាតិធំៗ ហើយសេដ្ឋកិច្ចរបស់យើងនៅមានកម្រិតនៅឡើយ។ ខុសពីប្រទេសមួយចំនួន ដូចជា ចិន ជប៉ុន វៀតណាម ថៃ ជាដើម ដែលប្រទេសទាំងនេះ មានសន្តិភាពយូរ ធានាបាននូវគុណតម្លៃនៃរូបិយវត្ថុរបស់គេ។
អ្នកជំនាញសេដ្ឋកិច្ចបានបន្តថា ការប្រើប្រាស់សាច់ប្រាក់ផ្អែកទៅលើកម្លាំងសេដ្ឋកិច្ចសង្គម ការធ្វើពាណិជ្ជកម្មអន្តរជាតិ ទំនុកចិត្ត គុណតម្លៃនៅក្នុងការប្រើប្រាស់ជាក់ស្តែង។ លោកថា« នៅពេលប្រទេសយើងកាន់តែមានការរីកចម្រើនខ្លាំងក្នុងវិស័យសេដ្ឋកិច្ច កំណើននៃប្រាក់ចំណូលចូលជាតិកាន់តែខ្ពស់ នោះប្រាក់រៀលរបស់យើងនឹងចាប់ផ្តើមមានតម្លៃ»។
បន្ថែមលើនេះ លោក ហុង វណ្ណៈ បានលើកហេតុផលថា ទាក់ទិនតម្លៃនៃការផលិតលុយ រដ្ឋត្រូវចំណាយច្រើន ខណៈដែលប្រាក់ ១០០ដុល្លារ មួយសន្លឹក ដូរមកប្រាក់រៀល ស្មើនឹង ៤០ម៉ឺនរៀល(លេខមូល) នេះបង្ហាញអំពីភាពខុសគ្នានៃតម្លៃក្នុងការប្រើប្រាស់។
លោកថា រដ្ឋទុកឱ្យមានការប្រើប្រាស់ប្រាក់ដុល្លារនេះ គឺដើម្បីទប់សភាពការចៀសវាងអតិផរណាទៅលើប្រាក់រៀល នាំឱ្យប្រាក់រៀលធ្លាក់ចុះតម្លៃ។
បើតាមលោកបណ្ឌិត ហុង វណ្ណៈ កម្ពុជា អាចប្រើប្រាស់ប្រាក់រៀលទាំងស្រុង នៅពេលដែលរក្សាបានកំណើនសេដ្ឋកិច្ចខ្ពស់ អាចចន្លោះពីឆ្នាំ ២០៣០-២០៥០ ហើយពលរដ្ឋមានការយល់ដឹងច្រើន និងកំណើននៃកម្លាំងផលិតកម្មខ្ពស់។
ដោយឡែក ធនាគារជាតិនៃកម្ពុជា បានបញ្ជាក់ថា ការប្រើប្រាស់ប្រាក់រៀល គឺពិតជាមានសារៈសំខាន់ណាស់ ពីព្រោះប្រាក់រៀលបានជួយលើកស្ទួយអត្តសញ្ញាណជាតិ។ ប្រាក់រៀលកសាងជំនឿទុកចិត្ត ជំរុញសាមគ្គីភាព បណ្តុះការបង្រួបបង្រួម និងស្មារតីជាតិនិយមនៅក្នុងប្រទេស៕
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង