ខេត្តស្វាយរៀង​នឹង​រៀបចំ​កម្មវិធីសង្ក្រាន្ត​ស្វាយរៀង ​ពី​ថ្ងៃទី១៤ ដល់ថ្ងៃទី១៦ ខែមេសា

ស្វាយរៀង ៖ រដ្ឋបាលខេត្ត​ស្វាយរៀង​ បានចេញ​សេចក្តីជូន​ដំណឹង​ស្តី​ពី​ការ​រៀប​ចំកម្ម​វិធី​សង្ក្រាន្ត​ស្វាយរៀង ដែល​មាន​ការ​សហការ​ជាមួយ​សហភាព​សហព័ន្ធ​យុវជនកម្ពុជា​ខេត្ត​ស្វាយរៀង ដើម្បីអបអរសាទរ​បុណ្យ​ចូល​ឆ្នាំថ្មី​ ប្រពៃណី​ជាតិ​ខ្មែរ ឆ្នាំថោះ បញ្ចស័ក​ ព.ស២៥៦៧ គ.ស ២០២៣ ពោល​គឺ​ចាប់​ពី​ថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៣​ ពីម៉ោង៨និង៣០នាទីព្រឹក​តទៅ។

ក្នុងនោះ​ផងដែរ ក៏មាន​កម្មវិធី​កម្សាន្ត​សប្បាយផ្សេងៗ​ដូចជា កម្មវិធីល្បែង​ប្រជាប្រិយ កម្មវិធី​តំបន់​ត្រជាក់ចិត្ត កម្មវិធីដាក់តាំងបង្ហាញសមិទ្ធផលខេត្ត ស្តង់ពិព័រណ៍ និងកន្លែងថតរូប កម្មវិធីសួនកុមារ កម្មវិធីប្រគុំ តន្ត្រីខ្នាតធំ និងបាញ់ទឹក កម្មវិធីរត់ប្រណាំង និងប្រណាំងកង់ និងកម្មវិធីដំណើរទៅកាន់បុព្វកាល និងល្ខោនពេលរាត្រី ព្រមទាំងមានការតាំងពិព័រណ៍លក់ផលិតផលជាតិ និងអន្តរជាតិ។

សេចក្តីជូនដំណឹង​នេះ​ចាត់ទុកថា អញ្ជើញ​ពុកម៉ែបងប្អូន អ៊ំពូមីងមា ទាំងក្នុងខេត្ត និង​ក្រៅខេត្តចូលរួមទស្សនាលេងកម្សាន្តសប្បាយ ឲ្យបានច្រើនកុះករ ដើម្បីញ៉ាំងឲ្យកម្មវិធី សង្ក្រាន្តស្វាយរៀង ប្រព្រឹត្តទៅដោយបរិយាកាសអធិកអធម និងសប្បាយរីករាយ៕