សម្ដេច ហ៊ុន ម៉ាណែត កោតសរសើរក្លឹបបាល់ទាត់ព្រះខ័នរាជស្វាយរៀង ទទួលបានជើងឯករង ពាន AFC CHALLENGE LEAGUE

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានកោតសរសើរ និងអបអរសាទរក្លឹប​បាល់ទាត់​ព្រះខ័នរាជស្វាយរៀង ដែលទទួលបានជើងឯករង ពាន AFC CHALLENGE LEAGUE។

សម្ដេច ហ៊ុន ម៉ាណែត បានលើកឡើងថា៖«ក្លឹបព្រះខ័នរាជស្វាយរៀង ជាក្លឹបតំណាង​ឱ្យប្រទេស​កម្ពុជាប្រកួតក្នុងពាន AFC CHALLENGE LEAGUE ដោយបាន​ធ្វើការប្រកួតជម្រុះ​ជាច្រើនដំ​ណាក់​កាល និងឈ្នះជាបន្តបន្ទាប់ជាមួយ​នឹងបណ្ដា​ក្លឹប​បាល់ទាត់ផ្សេងៗទៀតនៅក្នុងតំបន់មុន​នឹងឈានមកដល់ការប្រកួតវគ្គផ្តាច់ព្រ័ត្រនេះ ដែលនេះ គឺជាមោទកភាពសម្រាប់ប្រទេសកម្ពុជា លើវិស័យកីឡាបាល់ទាត់ បើទោះជាមិន​ទទួលបានលទ្ធផលវិជ្ជមាននៃការប្រកួតវគ្គផ្តាច់ព្រ័ត្រ​កាលពីម្សិលមិញក៏ដោយ»​។

សម្ដេច ហ៊ុន ម៉ាណែត ក៏សូមថ្លែងអំណរគុណដល់គ្រប់កីឡាករ គ្រូបង្វឹក ក្រុមការងារ​ រួមទាំងថ្នាក់​ដឹក​នាំ របស់ក្លឹបព្រះខ័ន​រាជស្វាយរៀង ទោះបីជាមិនអាចក្លាយជាជើងឯកក្នុងពាន AFC CHALLENGE LEAGUE ប៉ុន្តែទាំងកីឡាករ គ្រូបង្វឹក ក្រុមការងារ​ រួមទាំងថ្នាក់ដឹកនាំ បាន​ខិតខំអស់ពីកម្លាំងកាយចិត្ត ក្នុងការប្រកួតប្រជែងរហូតដល់ទីបញ្ចប់ ហើយការចាញ់ឬឈ្នះជារឿង​ធម្មតានៅក្នុងការប្រកួតកីឡា។

សម្ដេចនាយករដ្ឋមន្ត្រីក៏ថ្លែងអំណរគុណដល់អ្នកគាំទ្រ រួមទាំងប្រជាពលរដ្ឋទាំងអស់ ដែល​បានចូលរួមគាំទ្រ​យ៉ាងពេញទំហឹងបូករួមទាំងអ្នកដែលបានទៅចូលរួម​គាំទ្រដល់ទីតាំង​ប្រកួត​ចំនួន​ ៥១,៦១០នាក់ និងអ្នកដែលបានចូលរួមគាំទ្រតាមគ្រប់រូបភាព និងគ្រប់ទីកន្លែង ដែល​ការណ៍នេះ នឹងកាន់តែជំរុញវិស័យកីឡាបាល់ទាត់​កម្ពុជាឱ្យកាន់តែមានការរីក​ចម្រើនបន្ថែម​ទៀត ដោយប្រកាន់ខ្ពស់លើសីលធម៌ គុណធម៌នៃស្មារតីកីឡាយ៉ាងខ្ជាប់ខ្ជួន។

សូមជំរាបថា ក្រុមព្រះខ័នរាជស្វាយរៀង បានត្រឹមរងជើងឯកពានរង្វាន់ AFC Challenge League 2025 បន្ទាប់ពីចាញ់ FK Arkadag លទ្ធផល ២-១ ក្នុងរយៈពេល១២០នាទី ក្នុងពហុកីឡដ្ឋានជាតិមរតកតេជោ នៅរាត្រីថ្ងៃទី១០ ខែឧសភា៕