ព័ត៌មានជាតិ

រចនាសម្ព័ន្ធក្រសួងទេសចរណ៍ មានអង្គភាពចំណុះ និងបែងចែកការងារយ៉ាងណាខ្លះ?

បានផុស

៣ ខែ មុន

នៅ

ថ្ងៃសុក្រ ១១ សីហា ២០២៣

ដោយ

រាជរដ្ឋាភិបាលបានចេញអនុក្រឹត្យស្តីពីការរៀបចំ និងការប្រព្រឹត្តិទៅរបស់ក្រសួងទេសចរណ៍។ ក្រសួងទេសចរណ៍ត្រូវបានរាជរដ្ឋាភិបាលកម្ពុជាប្រគល់បេសកកម្មឲ្យដឹកនាំគ្រប់គ្រង និងអភិវឌ្ឍវិស័យទេសចរណ៍នៅព្រះរាជាណាចក្រកម្ពុជា។

ដំណើរការប្រព្រឹត្តិទៅនៃក្រសួងទេសចរណ៍មានការរៀបចំរចនាសម្ព័ន្ធនិងមុខងារភារកិច្ចរបស់អង្គភាពចំណុះ ដើម្បីធានាបានគុណភាពនិងប្រសិទ្ធភាពក្នុងការបំពេញការងារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រចនាសម្ព័ន្ធក្រសួងទេសចរណ៍មានការបែងចែកដូចតទៅ៖

ក- ថ្នាក់កណ្តាល

-ខុទ្ទកាល័យរដ្ឋមន្តី
– អគ្គនាយកដ្ឋានរដ្ឋបាលនិងហិរញ្ញវត្ថុ
– អគ្គនាយកដ្ឋានអភិវឌ្ឍន៍ទេសចរណ៍និងសហប្រតិបត្តិការអន្តរជាតិ
– អគ្គនាយកដ្ឋានគ្រប់គ្រងឧស្សាហកម្មទេសចរណ៍
– វិទ្យាស្ថានជាតិទេសចរណ៍
– អគ្គាធិការដ្ឋាន
– នាយកដ្ឋាននីតិកម្ម
– នាយកដ្ឋានសវនកម្មផ្ទៃក្នុង។

ខ- អង្គភាពមូលដ្ឋាន

គ- គ្រឹះស្ថានសាធារណៈក្រោមអាណាព្យាបាលរបស់ក្រសួងទេសចរណ៍។

លោក ថោង ខុន រដ្ឋមន្រ្តីក្រសួងទេសចរណ៍

ខុទ្ទកាល័យរដ្ឋមន្រ្តី

ខុទ្ទកាល័យរដ្ឋមន្ត្រីទទួលបន្ទុកបេសកកម្មទាំងឡាយ ដែលកំណត់តាមបទប្បញ្ញត្តិនៃអនុក្រឹត្យស្តីពីការរៀបចំនិងការប្រព្រឹត្តទៅរបស់ក្រសួងនិងរដ្ឋលេខាធិការដ្ឋាន។

អគ្គនាយកដ្ឋានរដ្ឋបាលនិងហិរញ្ញវត្ថុ

អគ្គនាយកដ្ឋានរដ្ឋបាលនិងហិរញ្ញវត្ថុ ជាសេនាធិការឱ្យក្រសួងទេសចរណ៍លើការងាររដ្ឋបាលនិងកិច្ចការទូទៅ ការងារធនធានមនុស្ស ការងារគណនេយ្យនិងហិរញ្ញវត្ថុ ការងារសន្តិសុខនិងសុវត្ថិភាពទេសចរ និងសម្របសម្រួលសកម្មភាពរដ្ឋបាលជាមួយក្រសួង ស្ថាប័ន អង្គការជាតិអន្តរជាតិ ដៃគូអភិវឌ្ឍ វិស័យឯកជន និងអង្គភាពថ្នាក់ក្រោមជាតិ។

អគ្គនាយកដ្ឋានរដ្ឋបាលនិងហិរញ្ញវត្ថុ មាននាយកដ្ឋានចំណុះដូចខាងក្រោម៖

– នាយកដ្ឋានរដ្ឋបាលនិងកិច្ចការទូទៅ
– នាយកដ្ឋានធនធានមនុស្ស
– នាយកដ្ឋានសន្តិសុខនិងសុវត្ថិភាពទេសចរ
-នាយកដា្ឋនគណនេយ្យនិងហិរញ្ញវត្ថុ។

នាយកដ្ឋាននីមួយៗត្រូវដឹកនាំដោយប្រធានមួយរូប និងមានអនុប្រធានមួយចំនួន។

អគ្គនាយកដ្ឋានអភិវឌ្ឍន៍ទេសចរណ៍និងសហប្រតិបត្តិការអន្តរជាតិ

អគ្គនាយកដ្ឋានអភិវឌ្ឍន៍ទេសចរណ៍និងសហប្រតិបត្តិការអន្តរជាតិ ជាសេនាធិការឱ្យក្រសួងទេសចរណ៍ក្នុងការធ្វើផែនការ ជំរុញ និងអភិវឌ្ឍទេសចរណ៍និងសហប្រតិបត្តិការអន្តរជាតិ។

អគ្គនាយកដ្ឋានអភិវឌ្ឍន៍ទេសចរណ៍និងសហប្រតិបត្តិការអន្តរជាតិ មាននាយកដ្ឋានចំណុះដូចខាងក្រោម៖

– នាយកដ្ឋានផែនការអភិវឌ្ឍន៍ទេសចរណ៍
– នាយកដ្ឋានវិនិយោគទសចរណ៍
– នាយកដ្ឋានអភិវឌ្ឍន៍ផលិតផលទេសចរណ៍
– នាយកដ្ឋានសហប្រតិបត្តិការអន្តរជាតិនិងអាស៊ាន
– នាយកដ្ឋានសិក្សាទីផ្សារនិងផ្សព្វផ្សាយទេសចរណ៍ក្រៅប្រទេស។

នាយកដ្ឋាននីមួយៗ ដឹកនាំដោយប្រធានមួយរូបនិងមានអនុប្រធានមួយចំនួន។

អគ្គនាយកដ្ឋានគ្រប់គ្រងឧស្សាហកម្មទេសចរណ៍

អគ្គនាយកដ្ឋានគ្រប់គ្រងឧស្សាហកម្មទេសចរណ៍ ជាសេនាធិការឱ្យក្រសួងទេសចរណ៍ និងជាអគ្គលេខាធិការដ្ឋាននៃគណៈកម្មាធិការជាតិវាយតម្លៃទីក្រុងស្អាត ដែលទទួលបន្ទុកគ្រប់គ្រងនិងសម្របសម្រួលការងារក្នុងឧស្សាហកម្មទេសចរណ៍ និងទទួលខុសត្រូវក្នុងការជំរុញចលនាប្រឡងប្រណាំង “ទីក្រុង ស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ”។

អគ្គនាយកដ្ឋានគ្រប់គ្រងឧស្សាហកម្មទេសចរណ៍ ដឹកនាំដោយអគ្គនាយកមួយរូបនិងអមដោយអគ្គនាយករងមួយចំនួន អនុលោមតាមបទប្បញ្ញត្តិជាធរមាន។

អគ្គនាយកដ្ឋានគ្រប់គ្រងឧស្សាហកម្មទេសចរណ៍ មាននាយកដ្ឋានចំណុះដូចខាងក្រោម៖

– នាយកដ្ឋានគ្រប់គ្រងសេវាកម្មស្នាក់នៅទេសចរណ៍និងម្ហូបអាហារ
– នាយកដ្ឋានគ្រប់គ្រងទីភ្នាក់ងារដឹកជញ្ជូននិងមគ្គុទ្ទេសក៍ទេសចរណ៍
– នាយកដ្ឋានគ្រប់គ្រងសេវាកម្សាន្ដនិងកីឡាទេសចរណ៍
– នាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍
– នាយកដ្ឋានជំរុញទេសចរណ៍ក្នុងស្រុកនិងអប់រំការយល់ដឹងជាសាធារណៈ
– នាយកដ្ឋានវាយតម្លៃទីក្រុងស្អាត
-នាយកដ្ឋានសេវាគាំពារទីក្រុងស្អាតនិងជំរុញការប្រឡងប្រណាំង។

នាយកដ្ឋាននីមួយៗ ដឹកនាំដោយប្រធានមួយរូបនិងមានអនុប្រធានមួយចំនួន។

វិទ្យាស្ថានជាតិទេសចរណ៍ជាមណ្ឌលសិក្សានិងជាសេនាធិការឱ្យក្រសួងទេសចរណ៍ក្នុងការសិក្សា និងស្រាវជ្រាវវិស័យទេសចរណ៍ក្នុងគោលបំណងបង្កើតគោលនយោបាយ យុទ្ធសាស្ត្រ និងផែនការអភិវឌ្ឍន៍ទេសចរណ៍ប្រកបដោយប្រសិទ្ធភាព គុណភាព និងនិរន្តរភាព និងសហការជាមួយផ្នែកពាក់ព័ន្ធ ក្នុងការដាក់ចេញនូវគោលនយោបាយអភិវឌ្ឍន៍ទេសចរណ៍ ការជំរុញរៀបចំផែនការ យុទ្ធសាស្ត្រអភិវឌ្ឍន៍ វិស័យទេសចរណ៍ ចូលរួមធ្វើការកែសម្រួល វាយតម្លៃការអនុវត្តការងារទេសចរណ៍ឱ្យចំទិសដៅ និរន្តរភាព និងប្រសិទ្ធភាព ព្រមទាំងជាមជ្ឈមណ្ឌលសម្រាប់ប្រមូលផ្តុំនូវធនធានបញ្ញាញាណ បទពិសោធ និងចំណេះដឹងទេសចរណ៍។

វិទ្យាស្ថានជាតិទេសចរណ៍ ដឹកនាំដោយនាយកវិទ្យាស្ថានមួយរូប មានឋានៈស្មើអគ្គនាយក និង អមដោយនាយករងវិទ្យាស្ថានមួយចំនួនមានឋានៈស្មើអគ្គនាយករង។

វិទ្យាស្ថានជាតិទេសចរណ៍ មាននាយកដ្ឋានចំណុះដូចខាងក្រោម៖

– នាយកដ្ឋានស្ថិតិទេសចរណ៍
– នាយកដ្ឋានសិក្សាស្រាវជ្រាវនិងគោលនយោបាយទេសចរណ៍។

នាយកដា្ឋននីមួយៗត្រូវដឹកនាំដោយប្រធានមួយរូបមានឋានៈស្មើប្រធាននាយកដ្ឋាន និងមានអនុប្រធានមួយចំនួន មានឋានៈស្មើអនុប្រធាននាយកដ្ឋាន។ វិទ្យាស្ថានជាតិទេសចរណ៍អាចបង្កើតបណ្ឌិត្យសភាទេសចរណ៍មួយ ដែលត្រូវកំណត់ដោយអនុក្រឹត្យដោយឡែក។

អគ្គាធិការដ្ឋាន

អគ្គាធិការដ្ឋានជាសេនាធិការឲ្យក្រសួងទេសចរណ៍ ដែលមានភារកិច្ចធ្វើអធិការកិច្ចគ្រប់អង្គភាពក្រោមឱវាទក្រសួង។អគ្គាធិការដ្ឋានដឹកនាំដោយអគ្គាធិការមួយរូប និងមានអគ្គាធិការរងមួយចំនួន។

នាយកដ្ឋាននីតិកម្ម

នាយកដ្ឋាននីតិកម្មមានតួនាទីរៀបចំបទដ្ឋានគតិយុត្តិពាក់ព័ន្ធវិស័យទេសចរណ៍ និងបទបញ្ញត្តិផ្សេងៗលើការងារទេសចរណ៍ដោយសហការជាមួយនាយកដ្ឋានពាក់ព័ន្ធនានា។

នាយកដ្ឋាននីតិកម្មដឹកនាំដោយប្រធានមួយរូប និងមានអនុប្រធានមួយចំនួន។

នាយកដ្ឋានសវនកម្មផ្ទៃក្នុង

នាយកដា្ឋនសវនកម្មផ្ទៃក្នុង ជាអង្គភាពចំណុះផ្ទាល់របស់រដ្ឋមន្ត្រីក្រសួងទេសចរណ៍ដែលទទួល បន្ទុកអនុវត្តភារកិច្ចតាមអនុក្រឹត្យលេខ៤០ អនក្រ.បក ចុះថ្ងៃទី១៥ ខែកុម្ភៈ ឆ្នាំ២០០៥ ស្តីពីការរៀបចំនិងការប្រព្រឹត្តទៅនៃសវនកម្មផ្ទៃក្នុងនៅតាមបណ្តាស្ថាប័ន ក្រសួង និងសហគ្រាសសាធារណៈ។

នាយកដ្ឋានសវនកម្មផ្ទៃក្នុង ដឹកនាំដោយប្រធានមួយរូបនិងមានអនុប្រធានមួយចំនួន។

អង្គភាពមូលដ្ឋាន

នៅតាមរាជធានីខេត្តនីមួយៗ មានមន្ទីរទេសចរណ៍រាជធានីខេត្តដែលទទួលបន្ទុកអនុវត្តនិងសម្របសម្រួលសកម្មភាពនានារបស់ក្រសួង។

នៅតាមក្រុងស្រុកខណ្ឌនីមួយៗ មានការិយាល័យទេសចរណ៍ក្រុងស្រុកខណ្ឌចំនួនមួយដែល ទទួលបន្ទុកអនុវត្តនិងសម្របសម្រួលសកម្មភាពនានារបស់ក្រសួង ក្រោមការគ្រប់គ្រងរបស់មន្ទីរ។

ការរៀបចំនិងការប្រព្រឹត្តទៅនៃមន្ទីរទេសចរណ៍រាជធានីខេត្តនិងការិយាល័យទេសចរណ៍ក្រុងស្រុកខណ្ឌត្រូវកំណត់ដោយប្រកាសរបស់រដ្ឋមន្ត្រីក្រសួងទេសចរណ៍។

គ្រឹះស្ថានសាធារណៈក្រោមអាណាព្យាបាលក្រសួងទេសចរណ៍

ក្រសួងទេសចរណ៍មានគ្រឹះស្ថានសាធារណៈដែលស្ថិតក្រោមឱវាទរបស់ខ្លួន ទទួលបន្ទុកជាជំនួយដល់ក្រសួងទេសចរណ៍ក្នុងការសិក្សាស្រាវជ្រាវសិក្សាទីផ្សារ និងផ្សព្វផ្សាយវិស័យទេសចរណ៍កម្ពុជា អប់រំ និងបណ្តុះបណ្តាលធនធានមនុស្សក្នុងវិស័យទេសចរណ៍ និងប្រមូលចំណូលទេសចរណ៍។

គ្រឹះស្ថានសាធារណៈទាំងនោះរួមមាន៖

– ក្រុមប្រឹក្សាភិបាលសិក្សាទីផ្សារនិងផ្សព្វផ្សាយទេសចរណ៍
– សាកលវិទ្យាល័យទេសចរណ៍និងបដិសណ្ឋារកិច្ចក្នុង
– សាលាវិជ្ជាជីវៈទេសចរណ៍
– គ្រឹះស្ថានអង្គរ។

ការរៀបចំនិងការប្រព្រឹត្តទៅរបស់គ្រឹះស្ថានសាធារណៈទាំងនោះ ត្រូវបានកំណត់ដោយអនុក្រឹត្យដោយឡែក។ គ្រឹះស្ថានសាធារណៈដទៃទៀត អាចនឹងត្រូវបានបង្កើតឡើងក្នុងករណីចាំបាច់ យោងទៅតាមតម្រូវការ និងស្ថានការណ៍វិវឌ្ឍនៃវិស័យទេសចរណ៍នៅកម្ពុជា។

គ្រឹះស្ថានសាធារណៈនានា ដែលស្ថិតក្រោមអាណាព្យាបាលរបស់ក្រសួងទេសចរណ៍ ត្រូវកំណត់ដោយអនុក្រឹត្យដោយឡែក៕