ព័ត៌មានអន្ដរជាតិ

៤នាក់ស្លាប់ និងជាង ១ ៣០០នាក់ត្រូវជម្លៀសចេញ ដោយសារភ្លៀងធ្លាក់ខ្លាំងនៅកូរ៉េខាងត្បូង

បានផុស

១ year មុន

នៅ

ថ្ងៃសុក្រ ១៨ កក្កដា ២០២៥

ដោយ

Chheang

បន្ទាប់ពីភ្លៀងធ្លាក់ឥតឈប់ឈរជាច្រើនថ្ងៃ បង្កជាទឹកជំនន់ និងបំណាក់ដីនៅតំបន់ជាច្រើនក្នុងប្រទេសកូរ៉េខាងត្បូង យ៉ាងហោចណាស់មនុស្ស ៤នាក់បានស្លាប់ និងជាង ១ ៣០០នាក់ត្រូវបានជម្លៀសខ្លួនចេញ ខណៈអាជ្ញាធរបានព្រមាននៅថ្ងៃសុក្រទី១៨ខែកក្កដានេះថានឹងអាចមានជំនន់ទឹកភ្លៀងខុសរដូវបន្ថែមទៀត ដែលទាមទារឲ្យពលរដ្ឋមានការប្រុងប្រយ័ត្នខ្ពស់ជាទីបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្រសួងមហាផ្ទៃ និងសុវត្ថិភាព ជនរងគ្រោះរួមមានស្រ្តីម្នាក់ ដែលបានស្លាប់នៅពេលដែលជញ្ជាំងនៅតាមជើងភ្នំបានដួលរលំសង្កត់លើរថយន្តនៅក្នុងទីក្រុង Osan និងបីនាក់ទៀតបានស្លាប់នៅក្នុងឧប្បត្តិហេតុទឹកជំនន់ដាច់ដោយឡែកនៅខេត្ត Chungcheong ដោយបុរសម្នាក់ត្រូវបានគេប្រទះឃើញស្លាប់ក្នុងរថយន្តលិចទឹក ម្នាក់ទៀតហូរតាមទឹកជំនន់ស្លាប់ និងម្នាក់ទៀតស្លាប់នៅជាន់ក្រោមដីក្នុងផ្ទះដែលត្រូវទឹកលិច។

គិតត្រឹមព្រឹកថ្ងៃសុក្រ មនុស្សយ៉ាងតិច ១ ៣៨២នាក់ត្រូវបានជម្លៀសចេញ ដែលភាគច្រើននៃពួកគេត្រូវបានជម្លៀសចេញពីតំបន់ទំនាប ឬតំបន់ភ្នំដែលមានហានិភ័យខ្ពស់នៃបំណាក់ដី។ ជម្រកបណ្ដោះអាសន្ន ត្រូវបានបង្កើតឡើងនៅសាលារៀនក្នុងស្រុក និងមជ្ឈមណ្ឌលសហគមន៍។

ហេដ្ឋារចនាសម្ព័ន្ធក៏បានរងផលប៉ះពាល់យ៉ាងធ្ងន់ធ្ងរផងដែរ។ យោងតាមរដ្ឋាភិបាលក្នុងតំបន់ ផ្លូវរាប់សិបខ្សែត្រូវបានទឹកជន់លិច ឬមិនអាចឆ្លងកាត់បាន អគារជាង ៨០ត្រូវបានខូចខាត ឬទឹកជន់លិច ហើយសាលារៀនជិត៤០០កន្លែងរងផលប៉ះពាល់។ ការដាច់ចរន្តអគ្គិសនីត្រូវបានរាយការណ៍នៅក្នុងទីក្រុងភាគខាងត្បូងមួយចំនួន ខណៈដែលសេវាដឹកជញ្ជូន ជាពិសេសជើងហោះហើរក្នុងស្រុកត្រូវបានរំខាន។ ជើងហោះហើរជាង៤០ ត្រូវបានលុបចោលនៅអាកាសយានដ្ឋានក្នុងតំបន់ ដោយសារការព្រួយបារម្ភអំពីសុវត្ថិភាព។

រដ្ឋបាលឧតុនិយមកូរ៉េខាងត្បូង បានចេញការព្រមានអំពីភ្លៀងធ្លាក់ខ្លាំងជាបន្តបន្ទាប់សម្រាប់តំបន់ភាគខាងត្បូង និងកណ្តាលនៃប្រទេស ដោយថានឹងអាចមានទឹកជំនន់ និងការរអិលបាក់ដីបន្ថែមទៀត ហើយបានជំរុញឲ្យអ្នកស្រុកជៀសវាងការធ្វើដំណើរ ត្រូវស្នាក់នៅក្នុងផ្ទះ និងតាមដានការផ្សាយព័ត៌មាន។

សូមជម្រាបថា នេះគឺជារដូវក្ដៅលើកទីបីជាប់គ្នាហើយ ដែលកូរ៉េខាងត្បូងបានរងគ្រោះដោយសារភ្លៀងមូសុងខុសរដូវដ៏ខ្លាំងក្លា ដោយបង្កើនការព្រួយបារម្ភអំពីការត្រៀមខ្លួនរបស់ប្រទេសសម្រាប់គ្រោះមហន្តរាយដែលទាក់ទងនឹងអាកាសធាតុ៕