ផ្លែសារីកំពុងត្រូវប៉ាន់សម្រាប់អ្នកលក់ម្ជូរតាមដងផ្លូវក្នុងក្រុងបាត់ដំបង

សព្វថ្ងៃគេសង្កេតឃើញថា ផ្លែសារីកំពុងដាក់លក់ព្រោងព្រាតនៅតាមទីតាំងលក់ម្ជូរនានាក្បែរដងផ្លូវក្នុងក្រុងបាត់ដំបង ដោយឡែកសម្រាប់ការដាំដើមសារីរបស់ប្រជាកសិករមួយចំនួនតូចក៏អាចលើកស្ទួយក្នុងជីវភាពប្រចាំថ្ងៃផងដែរ។

រុក្ខជាតិមួយប្រភេទនេះ លោក មករា ដែលលោករស់នៅស្រុកភ្នំ ខេត្តបាត់ដំបង បានលើកឡើងថា បច្ចុប្បន្ន លោកមានដើមសារីជាច្រើនដើមនៅក្នុងដីចំការរបស់លោក ដែលសព្វថ្ងៃនេះកំពុងហុចផលជាបណ្ដើរៗ ដោយវាអាចជួយសម្រួលក្នុងជីវភាពប្រចាំថ្ងៃមួយចំណែកតូចផងដែរ។

លោកបានបន្តទៀតថា ពេលផ្លែ សារីចាស់ ស្រុកផល ឬទុំ គឺលោកបេះយកទៅលក់នៅទីផ្សារ ឬក៏មានពេលខ្លះ អ្នកលក់ម្ជូរដែលស្គាល់ផ្ទះរបស់លោកក៏បានចុះទៅទិញដល់ដើមដោយក្នុងតម្លៃចាប់ពី៤ពាន់ ទៅ៦ពាន់ ក្នុងមួយគីឡូក្រាម ដោយសព្វថ្ងៃនេះផ្លែសេរីមិនសូវនៅសល់លើដើមទេពីព្រោះនៅក្នុងក្រុងបាត់ដំបងមានទីតាំងលោកម្ជូរព្រោងព្រាតធ្វើឲ្យប្រភេទផ្លែនេះមានទីផ្សារល្អ។

គួរបញ្ជាក់ដែរថា បើយើងក្រឡេកមើលទៅពណ៌សម្បុរនៃផ្លែសារីធ្វើឲ្យអារម្មណ៍យើងហាក់ដូចជាចង់ភ្លក់ជាមួយនឹងអំបិលប្រទេសហេតុដូច្នេះហើយទើបអ្នកលក់ម្ជូរចូលចិត្តយកផ្លែប្រភេទនេះទៅដាក់តាំងលាយចម្រុះជាមួយផ្លែម្ជូរដទៃទៀត ដើម្បីទាក់ទាញអារម្មណ៍ដល់អ្នកដែលចូលចិត្តម្ជូរឲ្យចង់ទិញយកទៅពិសាព្រោះវាមានរសជាតិជូអែមៗ។

បច្ចុប្បន្នលោកមករា កំពុងបន្តពង្រីកការដាំដុះបន្ថែមទៀតដូចជាម្ដេញជាដើមដែលកំពុងហុចផលបណ្ដើរៗហើយនាពេលបច្ចុប្បន្ននេះ៕

អត្ថបទៈ  សោ និយមរ័ត្ន