សិប្បកម្មកែច្នៃគ្រាប់ស្វាយចន្ទី ស្ទឹងត្រែង ប្តេជ្ញាពង្រីកខ្សែច្រវាក់ផលិតកម្ម ឱ្យបាន៦ពាន់តោន ក្នុង១ឆ្នាំ

ផលិតផលកែច្នៃគ្រាប់ស្វាយចន្ទី នៅខេត្តស្ទឹងត្រែង បាននាំចេញទៅក្រៅប្រទេសកើនឡើងជាលំដាប់ ដោយមាន​ការទទួលស្គាល់ពីគុណភាព និងរសជាតិ។ ទន្ទឹមនឹងកំណើននេះ ម្ចាស់សិប្បកម្មកែច្នៃគ្រាប់ស្វាយចន្ទី ស្ទឹងត្រែង បានប្តេជ្ញាចិត្តពង្រីកខ្សែច្រវាក់ផលិតកម្មរបស់ខ្លួនបន្ថែមទៀត។

អ្នកស្រី មុត ចរិយា ស្ថាបនិកសិប្បកម្មកែច្នៃគ្រាប់ស្វាយចន្ទីស្ទឹងត្រែង បានឱ្យដឹងថា សិប្បកម្ម របស់អ្នកស្រីស្ថិត​នៅភូមិ​ស្រែក្រសាំង ឃុំស្រែក្រសាំង ស្រុកសៀមបូក ខេត្តស្ទឹងត្រែង គ្រោងនឹងពង្រីកខ្សែច្រវាក់ផលិត​កម្មរបស់​ខ្លួនពីជាង ១ តោន ក្នុងមួយឆ្នាំ ក្នុងពេលបច្ចុប្បន្ននេះ ឱ្យដល់ ៦០០០ តោន ក្នុងមួយឆ្នាំ នាឆ្នាំ ២០២៤ ខាងមុខ ដើម្បីបំពេញ​តម្រូវការទីផ្សារ។

អ្នកស្រី បានលើកឡើងទៀតថា បច្ចុប្បន្ននេះ ទីផ្សារគ្រាប់ស្វាយចន្ទី នៅក្រៅប្រទេស ដែល អ្នកស្រី បាននាំចេញទៅ រួមមាន អាល្លឺម៉ង់ អង់គ្លេស អាមេរិក ជប៉ុន កូរ៉េ អូស្ត្រាលី និងបារាំង ជាដើម ។

ក្រោយបើកដំណើរការសិប្បកម្ម បានត្រឹមតែជាង ២ឆ្នាំប៉ុណ្ណោះ អ្នកស្រី ចរិយា បានពង្រីកទុនវិនិយោគពី ២ ម៉ឺនដុល្លារ ដល់ជាង ១ លានដុល្លារ និងបានធ្វើឱ្យទីផ្សារអន្តរជាតិ ទទួលស្គាល់គុណភាពស្វាយចន្ទីរបស់កម្ពុជា និងបង្កើន​ការនាំ​ចេញជាបន្តបន្ទាប់ ។ អ្នកស្រី បាននិយាយថា កត្តាដែលជំរុញនេះ គឺដោយសារការផ្សព្វផ្សាយតាមរយៈការចូលរួម ពិព័រណ៍នានា នៅក្រៅប្រទេស និងសន្និសីទស្វាយចន្ទីពិភពលោក នៅទីក្រុងឌូបៃ ប្រទេសអារ៉ាប់រួម កាលពីដើមឆ្នាំនេះកន្លងទៅ។

អ្នកស្រី បានបន្ថែមដូច្នេះថា ៖«នៅខែធ្នូនេះ យើងបាននាំចេញទៅហុងកុង មួយទៀត ដោយទីផ្សារថ្មីនេះ នឹងក្លាយជាទីផ្សារដ៏ធំជាងគេរបស់កម្ពុជា។ ហើយឆ្នាំក្រោយយើងនឹងបន្តនាំចេញទៅចិនហូឡង់ ខណៈដែលយើងក៏កំពុងសាងសង់ឃ្លាំងសម្រាប់ស្តុកផលិតផលរបស់យើង នៅអាមេរិក ផងដែរ ។ បន្ទាប់ពីនោះ អាមេរិក នឹងក្លាយជាទីផ្សារធំមួយទៀត សម្រាប់កម្ពុជា» ៕

អត្ថបទ៖ សុខា